¹ La engele eho Watutiani wandjia ahue wo Yesu wtndai ondjéi mosungu la wokumu wo likolo? ² Yesu amowelia mana mokeke,amobatia awondja wou. ³ Ase asiate iwaseki la memene inga ino otiatitimeseni,ase inga otiakukoleni nda wana wakeke otolingelani la wokumu wo likolo. ⁴ Alikambo ate ongo moto akoatitimesa nda oholo mana mokeke inde okodjaa mosungu la wokumu wolikolo. ⁵ Ase moto ongo okoyamba mana mokeke la nkombo e mbai ayambi mbai mene. ⁶ Ase inga moto mwesi amobingesa akikimi moto mwesi mokeke ondimi,mbai ewongi wolamu la inde wanange libanga lisungu la kingo,ase wamolumbe la ebale. ⁷ Magba la moki la likambo e wikikimi! Ase wikikimi wikoki odjei,kasi magba la moto ongo okobingisa ekikimi eho! ⁸ Inga ewo eowe,té ekolo eowe eobingesa ekikimi,etena ase woelumbe lihiele,ewongi wolamu olingele la mokalo,ekolo etenei la ewo elemei teaté olingele la makolo male la mawo male la misa ma libela. ⁹ Inga liso la owe liobingesa ekikimi,lilongose,eti wolamu odje la maiso male waolumbe la misa ma Gehena. ¹⁰ Huakani woimobetesa mwesi nda owana wakeke oholo,alikambo iwaselini ate waahumbwa wau walikolo wakoeneke wiengele kpàa,elongi e wawa ongo ondjéi ongo likolo. ¹¹ Alikambo ate Mana omoto andji ohalesi wawungi. ¹² Woenini woni? inga moto mwesi andja la pata kama esi,ase inga esi ewunga,atodee ndjinge tukulibwa la libwa ndjadi la mokoli,la akaluki enge ewungi? ¹³ Ase inga ayene,iwaselini la memene oemele ngbii oleki te ndjinge tuku libwa la libwa ndjinge iwungi ti. ¹⁴ Ndenge kikima,eti obali wo sangbanu ongo ondjéi ongo likolo omowu ngesi mwesi nda wana wahawa. ¹⁵ Inga mangwa aokelela Wobe,keke omotote,owe la inde ino wale inga awokela omoenese mangwa wobe. ¹⁶ Kasi inga atiwoke,motota moto mwesi te wale alikambo ate la wa demu wale te wasato loi loho wewane. ¹⁷ Inga atibale owao iwo, asa la lingomba ase inga atona koto oki lingomba andje atiowe nda mopagano alidi nda moputesi mamelo. ¹⁸ Iwaselini la memene ndjinge kpàa ikonanga ino ahala la mbume ikonangana ongo likolo ase ndjinge kpàa ikodukola ino ahala la mbume ikodukwana ongo likolo. ¹⁹ Iwaselini alidi ate inga wale kati enu waokana ahala la mbume la woongi ema esi ndjongo, ekondimana la wawa ongo ondjéi ongo likolo. ²⁰ Inga ango wale te wasato wagbotonono la nkombo e mbai, mbai indjéi ndondo ewu. ²¹ Ase Petelo andongbia ahue la inde ase asiate Likumu,ikoki omokeli mino ombai magba mbala woni inga akela mbai wobe?Ekondjaa ndi mbala sambo? ²² Yesu amwaselia ate iwaseliti ate esuke mbala sambo,kasi mbala tuku sambo mbala sambo. ²³ Alikambo ate wokumu wo likolo wondjéi nda likumu liesi okeli okatangi wambele wande atee wato wande wawotomu. ²⁴ Ango ondjakali inde otangi wamondjelia la moto mwesi ongo ondjakali la wambele koto lioomu. ²⁵ Ango otindjali inde la ema eputake likumu lande atomia ate wa motambe inde la moli onde,la wana wande,la wiho wande kpàa alikambo ate nongo ende esile. ²⁶ Moto owotomua alumbia la mbume,alelia la inde asiate Likumu ndjokela mbai magba ikoputa nongo owe. ²⁷ Amokelia magba Likumu la wango wato wa wotumu amodeya akia,amolimbesia nongo enge endjaki inde la eho. ²⁸ Mbuse ende opumbi,ongo moto owotomu agbotononi a la mwesi ongo ondjakali la nongo e wambele kama esi amohelia amohunolia kingo asiato puta nongo e mbai. ²⁹ Minonde alumbia la mbume, amwongia asiate ndjokila mbai magba ikoputa nongo eowe. ³⁰ Kasi ongodi teobali,ase akamolumbia la woyogo,tee ndiapute nongo enge endjaki inde la eho. ³¹ Wino wande wenia ndjongo waokia magba ma sungu ase wakia okamwaseli likumu la wundjinge sambo ileki kpàa. ³² Ase ango memene wotomu amowelia moto onde owotomu ase amwaselia ate Moto owotomu mobe mbai yolimbesi owe nongo owe kpàa alikambo ate oleleli mbai. ³³ Otikokake omokeli mino owe magba,nda ewokeli mbai owe magba? ³⁴ Ase likumu lande amemelia, amohelesia la woyogo, tee ndiango okoputa inde nongo eende. ³⁵ Ndi ndjongo ekokela wawa olikolo, inga mwesi onu atimokele mino nde magba la motema monde.