¹ Mbuse eho wa Falizeyo la wa tiesakoli wa mibeko wadjali la Yelusalema ogbotoni la Yesu pe waaasia. ² Woni watutiani wa owe watitosaka o tata wungo elongoyi la wato wa gala? ³ Awawongoselia;" ino pe, ndjoni ekobukaka ino sambo dja Mwengéi la gbondo e otata onu? ⁴ La ndenge eho, Mwengéi aasali ate motemia sangwaa la ngwa, alidji: ongo okwasa obe atie sango la nango akotota etumbu e logo. ⁵ Kasi ino oasini ate: moto ongo okohasa inga la sango te la nango linge likokaki mbai oohi lidjéi libondja atie Mwengéi. ⁶ Aengiti la omotemei sango la nango. Olongosia likPomeli e Mwengéi la tina e otata wonu. ⁷ Wakosi, Izaya asakoli olamu la tina enu, ango eyasali inde. ⁸ Wawato wakoyaheneseke nda wato wa mbai wakotemiaka mbai la minoko, kaiko mitema mahu midjéi lihele la mbai. ⁹ Wakokotemiaka mbai ndenge e ikosako, la ohekeli mateya mango madjei mibeko ma wato. ¹⁰ Yesu awawelia wato pe aasia: ndjokani mbai pe tenani gbondo olamu. ¹¹ Eti djinge ikolingelaka la monoko ndjawo ikoumesaka moto osoto, kasi winge ikopumbaka la monoko. Ehonde likoumesaka moto osoto. ¹² Mbuse watutiani wande wayandongbia pe wa mohaselia:"oyewi ate wa Falizeyo wayatungesaali la ooki mango makpomi? ¹³ Awongosia mote kpàa mungo mooniti wawa o likolo mokotenama. ¹⁴ Waadhee wadjéi wagbii maiso wango wakosumaka weti wagbi maiso mboka, inga mogbii maiso akosuma oweti mogbi maio, wakokwa iwo kpàa ndondo e liwela. ¹⁵ Petelo atotia makpomi pe amohaselia" tsosolisa li lisekpe. ¹⁶ Yesu aasia" Ino koto, odjéini yo la odjangi okenge? ¹⁷ Ososolaki yo ni ate djinge ilingeli la monoko likokeke la solo, mbuse ikoke la linee? ¹⁸ Kasi ndjinge ikopumbaka la monoko lidjii la motema, djawo ikopumbaka la monoko lidji la motema djawo ikoumesaka wato osoto. ¹⁹ La ndenge eho, la motema nde ikodjaka mamungo mbee, ooli wato, ikobo, osono ohuanesi wenge moli la motopele,iwa, oasi obe la tina e moto, okpomi la moto obe. ²⁰ Ene linge likoumesaka moto osoto; kasi olaki odjangi okpoli mawo, linge litiumesaka moto osoto. ²¹ Yesu alongwali ango pe akeeli la moki mo Tyli la Sidona. ²² Moli mwesi o kanana ongo odjaali la enge ngambo agbamali"Ndjoka magba, Likumu, mana ombai omoli akotungesamaka la etota eesi" ²³ Atimowongweselali loi te loi kima, watutie wayandongbia pe wamoweelia"Mowongosa, la la loyi ate akohumbaka pui mbuse esu. ²⁴ Awongosia" Itomamali la tina e meme ndjinge iwungi la liwota la Isalaele." ²⁵ Kasi ongo moli adjia pe amayia mahuli liwoso la inde ahasia"Likumu, sunga mbai." ²⁶ Awongosia" Eti olamu ototi okoke o wana pe owalumbeli wana wa mbwa. ²⁷ Ongo moli aasia," Ndjongo Likumu, kasi wana wambwa wakolaka ilakelo djinge keke keke ikokwaka sese e mesa e Likumu lawu." ²⁸ Mbuse Yesu amohaselia"Moli, oyambi oowe odjéi osungu, ekelame ndenge ebali owe" obandi enge tango, mana onde omoli akalia. ²⁹ Yesu alongweya enge ebete pe akia kelekele e Ligbutu lisungu la Galileya. Atelia la mokoli ayabatia. ³⁰ Wato ngbii wayandongbia atiende, ndondo ewu edjakali la watenguli, wato wagwi maiso, wabubu, wato waiketi pe wato wadjeti ikoni ndenge la ngenge, wadjia la iwo atie Yesu awakalesia. ³¹ Wato kpàa wahemelali oheni wabubu okpomi, wato wa iketi wa kalia, watenguli wasombia olamu, wato wa lolanda waenia, wamotemeiya Mwengéi o isalayele. ³² Yesu awawelia watutieyi awahaselia"Itumi la lomungo la tina e wa wato la likambo ate wakelia masio masato ndi wadjéi la mbai kasi wati la ema elakake. Ibaliti owawongoli la ndjala, la mbangi watilembe la mboka." ³³ Watutieyi wande wa mohaselia"Nda ndenge e koki iso odjwi ehele ebete e manganga ndjo makoke laate wa wato ngbii ndjo walake? ³⁴ Yesu awahuelia "Odjéini la makoke maenga?" wamowongoselia: sambo. ³⁵ Mbuse wabatesia wato la mbume. ³⁶ Atotia makoke sambo la suu, mbuse ende omotondi Mwengéi, awahekelia watutiani wande, wahekele wango wato kpa. ³⁷ Iwo kpàa walakia pe wagbetia, mbuse eho wabatia djinge itikalaki la isaka sambo. ³⁸ Wango walakali wadjakali wato koto inei, owalongosi wali la wana. ³⁹ Mbuse awongosia wato, atelia la wato pe akakia la moki mo Manganga.