¹ La wungo wuse mene, Yesu apumdesi la monguta asee akabatia kelekele e ligbutu alikambo la opudesi. ² Wato ngbii wabolea ahue la inde, la ndjongo inde alingelali la molela, abatali ongo wato wamalia kelekele e malia. ³ Yesu adjakali wasi masekpe alikambo la wasi la iwo, sambo ngbii, ndjinge yasakali inde laiwo moto mwesi apumbali okii okaoni pukapuka. ⁴ Ango odjakali nde olumbakoli pukapuka djadi ikwakanali kelekele e mboka mbulu iumali mine idjilakia. ⁵ Esuki edi ekuali la ebete e mabanga la ebete enge etidjake mbume sungu, pukapuka itoli gala alikambo ate mbume itidjake sungu te. ⁶ Ango ebatali moi molongosia kasi djaho, ase kasi djaho yomali suaa alikambo ate ndjili itibekakolali te. ⁷ Esuki edi e pukapuka ikwakanali ndondo e keke keke iumali ihelali kasi ndamu djaho. ⁸ Ase pukapuka djadi ikwakanali ndondo e mbume ndamu, ase iwotali pukapuka djadi iwotali pukapuka kama esi, djadi tuku isato. ⁹ Yesu asali alidi: okani wolamu, inga odjéini la matoi. ¹⁰ Watutiani waumia ahue la Yesu ase wamohuelia: alikambo lande ekopomaka owe la iwo la masekpe? ¹¹ Yesu awawongoselia ino okondjigani lokenge lowewi sambo djinge iyasi ndondo e wokumu wo likolo, wa wato wakondjaki yo woho te. ¹² Alikambo ate moto ongo odjéi la wadjenge akokondja wadi ase akodjaa la wadjenge ngbii, ase moto odjéi la waho wakeke, wakopuesa ndi wango wadjéi inde la waho wakeke. ¹³ Alikambo laho likoasaka mbai la iwo la masekpe alikambo ate wakodendaka ase wenitiaka te, la wakokaka, ase waokitiaka gbondo eho te. ¹⁴ Ndjongo ndjoi dja mwaaseli Isaya maengesame: alikambo lawu la wasindjo Mwengéi asi okani wolamu ase otoewani gbondo te okodengani wolamu, ase otoeneni te. ¹⁵ Te la gesele molimo mo waha wa wato moumiga ndou,wadihiga matoi mawu, wanangiga maiso mawu alikambo ate maiso mawu matiene te ase matoi mawu matioke te, alikambo molimo mowu motiewe gbondo te alikambo ate watia ndondo e ahue la mbai ase iwakalese. ¹⁶ Ase ino, mwemu modjéi la ino, maiso manu makoeneke, ase matoi manu makokaka! ¹⁷ Ikwasaka la ino loi wo memene: waaseli gbii la wato ngbii wa Mwengéi wabalali weni luhulu loi wokoeneke ino, ase watieneli te la wabalakali oki luhulu loi wokaka ino, ase watiokali te. ¹⁸ Ndjongo okani gbondo e lisekpe la moto o woni. ¹⁹ Wato wa woki loi wo wokumu wo Mwengéi ase waewiti gbondo te, wadjéi nda kelekele e mboka ebete ekwali pukapuka: Etota adjia alongosia loi wungo wokwi la mitema wawu. ²⁰ Wadi wadjéi nda mbume dja mabanga, mango makwi pukapuka ndondo eho, wakokaa sambo ase wandimia la mwemu. ²¹ Ase wakodeke sambo djinge ikolingelaka la mitema mawu te, wakoakelelaka maho sa engele ekeeke. Ase inga ekoni euma te wodidi alikambo la loi wo Mwengei. ²² Wadi wadjéi nda pukapuka ndondo ekeke: wakali loi ase mamungwene ma mokalo mamuhumu moki, la mwemu la wikosako wawa djenge enangami la sambo djaho, ndjongo wawotiti pukapuka te ndjongo wawotia pukapuka. ²³ Ndjongo wato wadi wakondji pukapuka la mbume ndamu waoki loi ase waewi gbondo eho. Djadi kama esi djadi tuku motoba, ase djadi tuku isato. ²⁴ Yesu awaselia lisekpe ladi: wokumu wo likolo wodjéi nda ema enge moto mwesi aonali pukapuka ndamu la elanga ende. ²⁵ La likolo ango odjakali wato kpàa la wilo, motone mo moto oho adjia aonia wisoki wibe ndondo engano, ase akia. ²⁶ Ango otoli ngano ase iwotia pukapuka, wisoki wibe witoiya koto. ²⁷ Wato wa wotomu wa memene elanga wapotia wasi la inde likumu, onali pukapuka ndamu la elanga e owe ndjongo wisoki wibe wihiwi widji eni? ²⁸ Inde awawongoselia: motone nde okelali luhulu loi ndjongo wato wa wotomu wamohuelia inde obali ate toke olongosi wisoki wibe? ²⁹ Inde awaselia iwo: te alikambo ango okolongose ino wisoki wibe, okolongoseni koto ngano. ³⁰ Deni djaho eume mongindi te ndi engele ekotena ino pukapuka engele ehonde ekoasa mbai la wato wa wotomu waoteni pukapuka liwoso longoseni wisoki wibe, ase owinangeni ma wokema woke alikambo la omatumbi, mbuse eho okolingesani ngano la monguta mo mbai mo woisi pukapuka. ³¹ Yesu awaselia iwo lisekpe ladi: wokumu wo likolo wodjéi nda pukapuka e mositade, enge etotali moto, aonia ndondo e elanga ende. ³² Idjéi pukapuka kekekeke oleki pukapuka djadi kpàa ase inga itoiga idjéi wisoki wiesi wileki wisoki wiumia mite ndjongo kpàa mbulu iumia okeli wilako wau likolo la wite waho. ³³ Yesu asia la iwo lisekpe ladi wokumu wo likolo wodjéi nda le Vire enge etoti moli, ase awanesia djaho ebete eikima la kilo tuku iwale la itano dja Farine tee ndi engele enge ekovimba mapa kpaa. ³⁴ Yesu adjakali osololi la masekpe alikambo la woasi sambo djinge kpàa atie wato ngbii; inde atiasakali la iwo te inga atiase la masekpe te. ³⁵ INde akelakali ndjongo, alikambo aengese la wungo woasali Mwaseli ikoasa la iwo ndi la masekpe ikoasa la iwo sambo djinge iyaisi olongoi te engele e okelami wo mokili. ³⁶ Ndjongo Yesu awadeya wato ngbii ase alingelia la monguta.Watutiani wande wakia atie nde ase wasia twasela iso gbondo e lisekpe la wisoki wibe ndondo e langa. ³⁷ Yesu awa wongoselali ndjo: moto owoni pukapuka ndamu djéi mbai mana o moto. ³⁸ Elanga edjéi mokili, pukapuka ndamu enesi loi lo wato wango wadjéi wato wa wokumu wisoki wibe enesi loi lo wato wango wadjéi wato wa Satana. ³⁹ Motone mo oni wisoki wibe edjéi Satana.Engele e oki pukapuka edjéi gboo e mokili wato wa oluiki pukapuka edjéi waumbwa. ⁴⁰ Nda elongosi iwo wisoki wibe alikambo la olumbi la misa, ekodja ndindjongo engele e gboo e mokili. ⁴¹ Manango o moto akowatoma aahumbwa wande wakolongose ndondo e wokumu wonde wato wa wikosako, wato wango wakokelaka maumu, wato wango wakokelaka wobe. ⁴² Ase wakowalumba ndondo le pulu ebete ekolela iwo la okpemeseni maino. ⁴³ Ase; wato wa omotemei Mwengéi wakongala nda moi ndondo e wokumu wo sangbau. Okani wolamu, inga odjéini la matoi. ⁴⁴ Wokumu wo likolo wodjéi nda wadjenge wayaisi la elanga. Moto mwesi agbotia wadjenge waho ase awasia alidi inde adjéi la mwemu, ndjongo nda ekii inde okatambi wiho kpàa winge widjéi inde la waho. ⁴⁵ Alidi wokumu wolikolo wodjéi nda moto ootambi, ongo okolukaka mayaka mabanga ma motio mosungu. ⁴⁶ Inga agbotiga liesi laho linge la motio mosungu inde akia akatambia wiho kpàa winge widjaki inde la waho, ase asombia libanga laho. ⁴⁷ Alidi wokumu wo likolo wodjéi nda woya wosu, wato walumbia ndondo e ligbutu ase woya wohelia su ndenge la ndenge. ⁴⁸ Inga itumiga, wato wa oluki su, wakogula wohokelekele e malia ase waabati alikambo la wonisu wabate su ndamu ndondo e modjangi ase walumbe su mbembe ndondo e malia. ⁴⁹ Ekodjaa ndjongo engele gboo e mokili: waahumbwa wa kodja olongosi wato wabe ndondo e wato walamu. ⁵⁰ Alikambo la owalumbi ndondo emisa lapulu, ongo wakolela la okpemeseni maino. ⁵¹ Yesu awahulia: wewigani loi loho woesi kpàa? ⁵² Ndjongo wapundesi kpàa wa pui wango waumia watutiani la wokumu wo likolo, wadjéi nda moto o wadjenge ongo omesi ndondo e wadjenge wande wiho wikoli la wiho wa gala. ⁵³ Ango asesali inde wasi mango masekpe maho inde alongoya ongo. ⁵⁴ Ase akia la gbata ebete enge ebekali inde inde apotali opundesi ndondo e monguta mowakongi mo wa Yuda la ebete eho, ase wato kpàa wango wadjakali ango wahuelali ngbii wadjakali woasi lainde akondji wungo wokenge eni? ndenge engi inde okeli wamohue enge ndenge? ⁵⁵ Inde ati mana o sabate te? nango ati Maria te? wamanango Yakobo,Yosefu, Simoni la Yuda te? ⁵⁶ Ase wa manango wa wali wati ndondo esu te? inde akondji wokulu wungo eni. ⁵⁷ Ase enge ewahali iwo omondimi inde, ndjongo Yesu asia la iwo: mwaseli akokondjaka etemia wiati kpàa ase adjangia waho ndondo e gbata ende mene la ndondo e liwota lande. ⁵⁸ Ongo inde akelali wiahueli ngbii te alikambo la wondimi wou.