¹ Djakani sikala ino, lelani, humbani pui e tetelake la magba enge ekoodjelakani ino. ² Wogumake wonu woholi, wisindje djanu wilakami la wapekese. ³ Wolo la palata djanu wigugi, pe ogugi woho ekodja demo etie ino pe ekolaka mweni monu. Oyisini ema esi nda misa la masio magboo. ⁴ Denga, ohelini liputi enge e wasali wango wabukali pukapuka la wilanga wanu enge eengali iwo ototi, edjeiyo ndji ekodhumbiaka pe la ilelo e wabuki pukapuka wango wakoongoko egameseli, elingeli atie Likumu o wita. ⁵ Oyabatini la wiho wilamu la mbume pe oyahini la mwemu mo wenge. Owumesini mitema manu nda nama e maita la lisio wakoolaka eho. ⁶ Omokpeesini, omoolini moto molamu, te okeli ino minga. ⁷ Wamanima, djaani la loho e ndai tee lisio la ewongo e Likumu. dengani, motii mo ilanga akolambelaka pukapuka ndamu e mbume, adjei la loho ndai la tina eho, tee ewongo e liwoso la enge egboo ekolua. ⁸ Ino koto, djaani la loho ndai, okalendeseni loho djanu laate ewongo e Likumu eumiga ahue. ⁹ Wamanima, otiakongeni ino la ino, laate otisambesameni. Denga mosambesi ayamali liwoso la moluhe. ¹⁰ Wa manima, totani ndakisa e nangake motema la odjidji, pe eneseni motema ndayi etie watiesakoli, wango waasali la kombo e Mwengei. ¹¹ Denga, tokwasaka ate wato wango wadjei la mohandja wadjei wato wa mwemu. Ookalini mboli e odjei la mohandja e Yobo pe oenalini ndenge Mwengei asukisali sambo djande, ate Mwengei adjei la libalano ngbii pe akoeneseke motema magba. ¹² Wamanima wa mbai, liwoso la sambo kpaa, otilapeni, inga te likolo, inga te la mbume, inga te eeti ndenge e olapi. Ase dhee ate ogemei wonu odjei ogemei, okili wonu odjei okili, laate otikweni la osambisami. ¹³ Mwesi ndondo onu adjei la odjidji? Ayakonge. Moto mwesi ndondo enu adjei la mwemu? Alembe lembo. ¹⁴ Mwesi ndondo enu adjei la ekoni? Awele wiloko wa lingomba, wayatate la tina ende, wamomonole maita la kombo e Mwengei. ¹⁵ Ndjongo oyatati e ondjimi ekomokalesa moto o ekoni pe Mwengei akomomalesa. Te inga akalali masumu, akomolimbisa. ¹⁶ Ndjongo, limbolani masumu manu ino la ino, pe yakongani ino la ino laate okaleni. Oyatati e moto molamu edjei la okulu ngbii, ekokelaka mpe otomu. ¹⁷ Eliya adjaali moto nda iso. Ayatatali ngbii ate e wongo etilwe, ase etilwaali la mokii moho, tee mbula isato la ndebo motoba. ¹⁸ Ayatatali alidji, likolo litumali la ewongo pe moki moho epumbisali pukapuka djaho. ¹⁹ Wamanima wa mbai, inga moto mwesi ndondo enu awusesania lihele e meemene alidji oeti amowongosia, ²⁰ yewani ate moto ongo omolangosi moto mobe la mboka ende e owusi wonde akokalesa molimo monde la logo pe akodhiha masumu mande ngbii.