¹ Ango lisio la patekote e potali oumi; wadjakali iwo kpaa ebete kikima. ² Mbala kikima moli epumbali likolo nda ehoho enge edjei la lihohela, etumali la monguta ongo oyabatali iwo. ³ Ndemo nda e misa eeneneli atie iwo koto eyakawanali, koto mwesi la mwesi eyabatali likolo la moto e moto ndondo ewu. ⁴ Iwokpaa watumali la elimo satu koto wapotali oasi la minoko madji nda elimo edjali owahekeli iwo mboka la oasi. ⁵ Kaikwase, Wayuda weeti, la pele djinge wakowangaka Mwengei, wadjaali oyabati la Yelusalema walongwali la mikii kpaa minge midjei sese. ⁶ Ndjongo, ango modudu muho mopumbali, ebiba e wango wato wayaboleali koto wakamwali ngbii, te pamba moto la moto adjaali owaoki iwo wakoasaka la monoko monde mo saa. ⁷ Iwo kpaa watikalali mono ohola koto watumali la okamwi, waasali koto ate: ''Dengayo, wango kpaa wakoasaka wadjei wato wa Galilea? ⁸ Nda ndenge tokookaka, moto la moto ndondo esu, la monoko monde enge ewotamali iso la eho. ⁹ Wapalate la Wamede la Waelama, la wato wango wakoyabataka la Mesopotamia, la Yudea, la Kapadosi, Poti la liwange e Azia, ¹⁰ la Piligia la Pamipilia, Ezipito la wisuki wa Libia winge widjei ngambo e Silene, la wato wango wadjei ahala, wango wadjaali la Loma, Wayuda la wa Pozelita, ¹¹ wato wa Keleta la Walabe, tokowaokaka wakoasaka sambu sungu e Mwengei la minoko masu. ¹² Iwo kpaa watumali la okamwi la osombesi koto mamungene; wadjakali oyaaseli iwo la iwo, lu loyi eengi oasi woni? ¹³ Kaikwase weeti wadjakali owaseki, wadjali koto oasi ate: wagbeti bino elelake. ¹⁴ Ase Petele ayamalali mongindji la watutiani liomo la esi, adjambali moli monde, aasali la wango wato ndjo: ''Pele djaa Yudea koto ino kpaa wato wayabati la Yelusalema, yewani wu loyi koto tambani litoyi la wingbundu wa mbai. ¹⁵ Meemene, wa wato walangoyiti maana nda ndenge ekomungwaka ino, laate ehele edjei engele esato e wuse. ¹⁶ Ase ehele edjei sambo djinge eyasanali la mboka e motiesakoli Yoele ate: ¹⁷ Mwengei aasi ndjo: La masio ma gboo, ikoswela wato wa ndenge kpaa ndambo e elimo e mbai, koto wana wanu wa pele la wana wanu wa wali wakotiesakala koto wilenge wanu wakoene wieneseli koto mbange djanu wakolota saki. ¹⁸ Edje te tuke dja mbai dja pele koto la tuke dja mbai dja wali ikowaswela iwo ndambo e elimo e mbai la mango masio, iwo koto wakotiesakola. ¹⁹ Ase ikohekele makamwesi la oyinyei sambo djinge ekodja ongo likolo koto wilembo la mbume ahala sese, makila koto misa la ligite e milungu. ²⁰ Wuse ekoyakukola koto la likolo, ndebo koto ekoyakukola la makila liwoso ate eume lisio lisungu koto e otwa e Likumu ekodja. ²¹ Ase moto kpaa ango okodhumbeya kombo e Likumu akokala. ²² Pele dja Yisalayele, okani ehele wingbundu: Yesu o Nazaleta oholo moto Mwengei aaselali liwoso lanu la tomo e tetelake koto la makamwesi eenesake sambo djinge igeleli koto la wilembo winge Mwengei akelali la mboka ende ndondo enu, nda ndenge eyewini ino amene. ²³ Oholo moto, nda moto ongo okawani la otutei mwano mungo mwananate koto la oyewi wungo Mwengei adjei la eho eyewake sambo liwoso, ino omobakali la ekulusu la mawo e wato wango wakobukaka pui koto omoolalini. ²⁴ Ase Mwengei amobasisali, la ndenge alongosali ehelani e logo, laate etiengali okelani ate ahelane ndji la eho. ²⁵ Laate Davidi aasi la loyi londe ate: Ikoeneke engele kpaa Likumu liwoso la maiso ma mbai, la ebili ate adjei la ewo e mbai e lilome, laate itiyabande te ma keke. ²⁶ Eho lenge motema mo mbai modjei la mwemu, lolemu lo mbai etume la iyelo, aleeti wenge wa mbai ekohoma la liwuna. ²⁷ Laate otitika molimo mo mbai ndondo e mbila, otiha koto mboka ate moto o owe molamu ahole. ²⁸ Oyewesi mbai mboka e mokalo, okotumesa mbai la mwemu e mbanda e owe. ²⁹ Wamanima, ehani la mbai iyoaseleni te la mbangi, la loyi enge emodhendji tata osu Davidi, ongo ogwali, wamoombali koto mbila ende edjei ndondo e iso tee la masio makeke. ³⁰ Ndenge edjakali inde motiesakoli aleeti ayewali ate Mwengei amolapelali ndai ate akomobata moto mwesi la litoto lande likolo e ngbelengo e inde. ³¹ Aenali liwoso koto aasali la loyi e obasi wo Kilisito ate atidheeneli ndondo e mbila, koto wenge wande witihololi. ³² Edjei Yesu nde Mwengei amobasisali, todjei iso kpaa watotoli e loyi loho. ³³ Adjambanali la ewo e lilome e Mwengei, atotali koto atie Wawa elimo satu enge ewunanali, aswia enge ekoeneke ino koto ekookaka ino. ³⁴ Laate Davidi atitelali la likolo, ase aasi inde amene ate: Likumu aasali la Likumu la mbai ate: ''Abata la ewo e mbai e lilome ³⁵ tee ekobata mbai mitone ma owe nda esuleli e makolo ma owe.'' ³⁶ Monguta kpaa mo Yisalayele moyewe la omeemene ate Mwengei amowumesi Likumu koto Kilisito, Yesu oho ongo omobakani ino la ekolusu. ³⁷ Mbuse e ooki ndjongo, mitema mawu mikondjuali, waasali la Petele koto la watutiani wadji ate: ''Wamangbasu tokele woni?'' ³⁸ Petele awaaselali ate: ''Kukolani ekaleli enu alidji mwesi la mwesi onu apatisane la kombo e Yesu Kilisito, la ototi wolimbesi e masumu manu, aleeti okototani likawo e elimo satu. ³⁹ Laate liwuna lidjei etie ino, la wana wanu koto la wango kpaa wadjei lihele, la wango kpaa Likumu Mwengei osu akowawela atie inde.'' ⁴⁰ Aleeti, la wingbundu ngbii ahali litotoli koto adjakali owahekeli mogalia, aasia ate: Yakalesani la ehele oliye ehinani. ⁴¹ Wango wagemeiyali engbundu ende la motema kpaa wa patisanali, koto la lisio laho milimo inga mbuka isato ikalali. ⁴² Wadjakali oyahekeli la matiesakoli e watutiani, koto oboliani iwo la iwo, olaki la oyakongi. ⁴³ Bhoo edjakali okueli molimo kpaa, koto la makamuesi eenesake sambo djinge igeleli, la wilembo wipotali okelani la mboka e watutiani. ⁴⁴ Wango kpaa wagemeiyali wadjali ebete eikima, ⁴⁵ wadjakali otambi wihoo wau koto la ogumake wau, koto okawoli la moto kpaa wambele etotali iwo, ndenge moto la moto adjakali la ewongoli. ⁴⁶ Wadjakali masiyo kpa oboleani la Tepelo, wadjakali olaki okoke ewu ndondo e milako, aleeti wadjali ototi ilaka wawu la mwemu koto la oyahohisi motema, ⁴⁷ wadjakali o mogani Mwengei, koto wato kpaa wadjakali owaenesi logoo. Aleeti Likumu adjakali olingesi masio kpaa la losambo wango wadjakali okali.