¹ La osukesi, wamanima, akongani la kole esu, laate liloba e likumu lasu esombe galagala pe liganane ndenge edjei atie ino, ² la loyi ate tokawane la wato wakookesaka odjidji pe la wato wabe, laate iwo kpaa wati la ogemei. ³ Kasi Likumu adjei olamu, pe akohekeleni otetelake pe akoobanyani la wato wabe. ⁴ Toobatelini ino motema ndondo e Likumu, laate okokelakani pe kelakani sambo djinge tokootiesakolakani ino. ⁵ Likumu asombese mitema manu olamu la libalano e Mwengei mpe odjei la egalela la loyi e Kilisito. ⁶ Toowongi la ino wamanima, la kombo e Likumu Yesu kilisito ate odjeeni lihele e moto kpaa ongo okosombaka la ewedje, kasi te la obileyi ekaleli enge etotali ino atie iso. ⁷ Oyewini ino amene ndenge okokini otokongoli, laate totiasombesali la ewedje atie ino. ⁸ Totilakali makoke ma moto tueti la gesele. Kasi la otomo otetelake mpe la oameli likolo la wuse todjakali okeli otomu laate totikpalese moto tueti ndondo enu mokpali mosungu pe molitake. ⁹ Eti ate toti la okumu, kasi laate toyahekeleli iso amene nda egbangele atie ino laate otutieni iso. ¹⁰ Ango edjakali iso ongo tie enu, todjakali oasi la ino: inga moto atibale okeli otomo atilake. ¹¹ Laate Tokookaka ate weeti wato ndondo enu wakosombaka la ewedje, watikelaka otomo teeti, kasi wakoyalingesaka la sambo djinge ewadhendjiti. ¹² Toweli wango wato pe towatomi la kombo e Likumu lasu Yesu kilisito, ate wakele otomo la logoo, walake makoke mango iwo amene watoti. ¹³ La ino wamanima oti dheekeni okeli sambo ndamu. ¹⁴ Kasi inga moto abaliti enge eyasani la ma madhingo, molongoseni mpe otisombekeneni la lainde laate aoke soni. ¹⁵ Inga te ndjongo otimodhendeni nda monguna monu, mokebesani nda mangbanu. ¹⁶ Kaikonde, Likumu o logoo inde amene aohekeleni engele kpaa logoo e ndenge kpaa. Likumu adjee la ino kpaa. ¹⁷ Ihohini mbaa, mbai polo, la mawo ma mbai, ehele edjei elembo e madhingo kpaa; ndjongonde ekodhingaka mbai. ¹⁸ Magba masungu e Likumu lasu Yesu kilisito edjee la ino kpa. Amina.