¹ Moto kpaa ongo okondima ate Yesu adjei Kilisito awotomi la Mwengei, pe la moto kpaa ongo okomobalaka wawa, akomobala pe mana. ² Toyewi ate tobali wana wa Mwnggei: ango ekomobalaka iso Mwengei la okeleli pui djande. ³ Laate libalano e Mwengei einei ndjo: ate totemeyake pui djande. Kaiko pui djande wolititi. ⁴ Laate ema kpaa ewotami la Mwengei, ekolongaka moki. Pe libalano linge lilongi moki eho lele, ogemei wosu. ⁵ Ndai ongo olongi moki? Inga etidje moto ongo okogemeyaka ate Yesu adjei mana o Mwengei. ⁶ Edjei inde, Yesu kilisito, ongo odjali la ligamesi e malia pa la makila, etidje saa la malia pamba, kasi la malia pe la makila. Pe edjei elimo nde ekohaka litatoli, laate elimo adjei meemene. ⁷ Laate wiho wisato nde wikohaka litatoli. ⁸ Elimo la malia pe makila, pe eho kpaa isato edjei la ookani. ⁹ Inga tokoyambaka litatoli linge wato wakohaka, litatoli likinge Mwengei akohaka eyeti, laate edjei litatoli la Mwengei linge liasi inde la loyi e mana onde. ¹⁰ Moto ongo okogemeyaka mano o Mwengei atoti litatoli la inde amene. Moto ongo otigemeyaka Mwengei amowumesi moto o moleho, laate atigemeye litatoli linge lihami, enge Mwengei ongo odjei motatoli, ahi la mana onde. ¹¹ Denga litatoli laho: Mwengei atohekeli iso mokalo mo libela, pe mokalo moho modjei ndondo e mana onde. ¹² Moto ongo odjei la mana adjei la mokalo moho. Moto ongo oti la mana o Mwengei ati la mokalo moho. ¹³ Iyodhingelini sambo djaho laate oyeweni ate odjeini la mokalo mo libela, ino wango wakogemeyaka kombo e mana o Mwengei. ¹⁴ Tokomobatelaka motema la lu loyi ndjo: inga toongo ema la ndenge ebali iso, akotooka. ¹⁵ Inga toyewa ate akotooka la ema kpaa enge tokoongoko, toyewi ate tokotota wiho waho enge eongani laate tomoongi eho. ¹⁶ Inga moto aenia manango akokelaka lisumu linge litikpalaka la logo, akoongo, pe Mwengei akomoha manango mokalo. Ikoasaka ahala la wango wakokelaka lisumu linge litikpalaka la logo. Edejei la lisumu linge likokpalaka la logo, eti enge lisumu nde ikoasaka ate oyakongeni. ¹⁷ Sambo kpaa edjangi omeemene edjei lisumu, kasi edjei la lisumu linge litikpalaka la logo. ¹⁸ Toyewi kpaa ate moto ongo owotami la Mwengei atikelaka lisumu, kasi ongo owotami la Mwengei akoyabanyaka inde amene pe obe etimopoto. ¹⁹ Toyewi ate tolongoyi atie Mwengei, kaiko moki kpaa modjei sese e okulu e mbe. ²⁰ Toyewi alidji at mana o Mwengei adji, atohia iso akili laate toyewe moto o meemene. Pe todjei la limbutukele mongindji la moto oho o meemene, la mboka e mana onde Yesu Kilisito. Inde ongo Mwengei o meemene pe mokalo mo libela. ²¹ Wana, wakani la wilima.