¹ Yakobo ndumwa ya Ongo na nina kuwethu Yesu-Kristu mo nganda ikumi ni biri sa shanjanaa buholo. ² Muanje kunilumoo kutsibu, banyakyethu muliamutsuka mubithingwa bingi-bingi. ³ Mumimnye kwerithingwa lyenyu bushibwerikiritsa lyenyu alibaha isetsa mithima. ⁴ Lukula eritsing'emithima likole mirimo yalyo, mwishuke liringene butha lahya kiro na kake. ⁵ Hali hangabya muuma kwimwe yushonda bwenge ashabebo ku Ongo yunahana bobuochwire buthakemera bobanamushaba. ⁶ Uliwe uheme liri niikiritsa butha thikathika yo ushondotsa erithikathika alinga bithonda monyanja abiushweyi neyi. ⁷ Kwiyira emundu ulingoyu athaanitsaa mbukuthi emahemo angaangirwa na Nina kuwethu. ⁸ Emundu ulingoyu alinamaene abiri nimbingya monzira siwe soshi. ⁹ Munyekyethu emuchene naye anga ayihala kwi imanaliwe yoluulu. ¹⁰ Ndambi nyisha munyekyethu mushoki kweyolohya liwe kubushi endehwerekera nga bulabya bwa mondokolo anatsukamo. ¹¹ Elitsuba alihuluka na kyuka kihisa akiumya myaka, nesondondo asithoonga ne bubuya bwaro nibwapha. Bathyo kwe bushoki bende thinda morimo yabo. ¹² Aashanirwe emunduyo usimika emuthima mobithingwa kubushi amesinda ebithingwa ebyo ende habwa ngisha ya buingo yo yalaanibawa kuboba tsiire Ongo. ¹³ Emundu woshi nganiathiyibwire mbu amelengwako na Ongo. Kubushi Ongo athathingwa na bibi, kandi Ongo yonawenewene athangalenga kumundu kiro na hake. ¹⁴ Ebuli mundu analengwako ne mbushasiwe nyibi ni sa muthinga neri muhiula hale. ¹⁵ Naho bushi bwe mbusha ebibi byamekuleha, ebibi nibyabuthwa, ne bibi byame ushuka kubuya, nibyalethipha. ¹⁶ Baala bethu banzii, muthaithingaa. ¹⁷ Buli bihembo bibuya, na bihembo bilengekire binahulu yoluulu, nibya kima hishi niabihuluka yomwa thatha we kyereretsi, Kaphe iye athabinduka nga kiphuphu kokinabinduka. ¹⁸ Ongo ashombolaa erithuha buingo mokinwa kibuya, thukochyeriba nga lubutho lumbere mokathi kebyoshi abumbaa. ¹⁹ Muminye bathya, banabethu bansii, bulimuuma abye mwangu werionva he niathibye mwangu werineena kandi neritsibuka. ²⁰ Kubushi eritsibuka lyemundu lithangakola bubuya bwa Ongo. ²¹ Kubathyo muushe hale emikonzi, na mwiyolohya nerishaalukira ekinwa kyaherawa mwishi senyu. Kyo kyangakochya erilamya emithim'enyu. ²² Mwikiritse ekinwa, neritheakyo mathwi muliamuthinga emithim'enyu mwebene. ²³ Kubushi muli mundu woshi yowonva ekinwa athokolerekyo mulimo alingene noyouhenga ebusu buwe momo kiyo. ²⁴ Ayitheeretsa ebusu buwe, niayiendera, nahandihake niabirira kwa shushire. ²⁵ He mundu youyitheeretsa kushekushe emahano mabuya, mahano wa bwiranda ni kwamirira eriikiritsa, henihathali ibya muhulethwa, oyuniende ashanirwa amekola bathyo. ²⁶ Uli mundi wangaanitsa mbu ayithe kihemero, kandi niathangatheya elulimi luwe, athima ethimauwe nekihemero kiwe nibusha. ²⁷ Ekihemero kibuya, kyokithabihe yobushondotsi bwa Ongo wethu thatha kyeki : iangirira sofubi ne baphirwa mominubo yabo neriyitheya yowene kobibi bye kihuo.