¹ Nie, nie olya mugula, nie ntumire aga maruba. We ngarhumire yaga Gayo, muntu nsima kunali. ² Mwira wani nkusengirire ogendekere muli byoshi n'omubulamu nkakuly'omurhima gwawe gugendekerire. ³ Bulya nshagalusire bwenene erhi benewirhu bayishihamiriza okuli, nkakuly'omurhima ogendekerire omukuli. ⁴ Ntagwerhi bushagaluke bunji kulush'okubon' abana bâni balamire omu kuli. ⁵ Mwira wani, onayerekane oku orhaba ndyalya muli ebinojirira bene wirhu, ciru n'abali bigolo. ⁶ Bâdesire ogw'obuzigire bwawe emalanga g'omurhwe gw'abakristu. Mâshi oburhabale bagendekereze olugenzi lwabo, kulya kunasîmisîze Nnâmahanga. ⁷ Bulya barhondire olugenzi lwabo omu kukolera Kristu, bajira ntyo buzira kuyemera oburhabale bw'abapagani. ⁸ Rhwe bemezi rhugwasiragwe rhurhabale bantu ba mwene abo lyo rhukola kuli ogwo mukolo bali bajira, n'ogwo mukolo bali bagujirira okuli. ⁹ Narhumire omurhwe gw'Abakristu maruba masungunu, cikone Diotrefe, muntu oba olnzize abakulikire, arhayemera ebi ndesire. ¹⁰ Co cirhumire hano ngaluka, nayerekana ngasi bubi ali ajira, nyerekane n'ebinwa byage bibi, n'ebyo bunywesi ali arhuderhera. Cikone arhali n'okwo kwone, ci akâlahira n'okuyigulira bene wirhu. Ciru n'abalonzize okubayigulira ali abahanza abul'ilonza oubakûla omu murhwe gw'Abakristu. ¹¹ Yâga mwira wani orhayigaga amabi, cikone oyige aminja. Ojira aminja aba wa Nnamahanga, ojir'amabi erhi arhabona Nnâmahanga. ¹² Abantu boshi bwinja baderhera Demetriya, ciru n'okuli kwone bwinja kumuderhera . Nirhu kwo n'okwo bwija rhumuderhera, ona manyire oku ebi rhuderha biba by'okuli. ¹³ Ngwerhe binji by'okukubwira cikone ntalonzize okubiyandika n'akalamu n'obwino. ¹⁴ Nnangalire oku rhuli hofi rhubonane, n'ago mango lyo rhwashambala n'akanwa. ¹⁵ Omurhûla gube haguma na nawe. Abîra bawe bakulamusize. Olamuse ngasi mwira wirhu.