¹ Ngasi bashizi bakwanine bakabona bannawabo nka bantu bakwanine olukengwa bwenene, lyo harhakib'omuntu wokuderha kubi Izino lya Nnamahanga, n'okubera enyigirizo zirhu. ² Abashizi bannawabo bali bemezi, barhagwasirwi okubabulira olukengwa mpu kwenge bali babo bemezi, cikone bagwasirwe babakolere bwinja kulusha, bulya abayungukira oku mukolo yabo bashizi bali balya bakristu abo bashizi basima. Yunvagi ebingwasirwe okuyigiriza n'okuhinduka. ³ Erhi hankajira owayigiriza ezindi nyigirizo, arhanayemiri ebinwa byokuli bya Nyakasane Yezu Kristu n'enyigirizo z'idini lirhu, ⁴ oyo muntu erhi obucibone bumuzonzire, arhanamanyiri bici. Agwerhagi irala lilwazire linali lya kadali n'embaka z'ebinwa. Omwo mwo murhenga obwagalwa n'embaka n'ebijaci, n'embere mbi, ⁵ n'akadali karhahwa omu kagarhi k'abantu bajira emirhima ehabusire na balya barhaciyishi okuli. Banakagerereza mpu okuyemera Nnamahanga eba njira ya kugaza. ⁶ Okuli, buba bugale bunene oku muntu, erhi ankashagalukira ebi agwerhe. ⁷ Bulya rhurhali dwirhe akantu muno igulu, rhurhakanaheka bici. ⁸ Erhi ankaba rhugwerhe ebiryo n' emyambalo rhunabishagalukire. ⁹ Cikwone abalonza okugala banahirime omu marhangulo, amarala manji gw'obuhwinja n'amabi gwo murhego gubagwarha. Ebyo byo biyoha abantu omw' iherero n' omw'ishererezo. ¹⁰ Bulya okusima enfaranga kwo kulerha ngasi mabi. Haligi abazilalikira ciru balinde bahera kuli n' obwemere, balibuze emirhima yabo n' amalumwa manji. ¹¹ Cikone wehe muntu wa Nnamanga, oyake ebyo byoshi. Onalongereze obushinganyanya, nokucishwekera kuli Nnamahanga, n' obwemere, n'obuzigire, n' obushibirizi n' obutudu. ¹² Olwe bwinja entambala y'obwemere, oseze obuzine bwensiku namango wahamagaliragwa, n'obu wajiriraga obuhamirizi bwawe bwinja bwo bwemere embere z'amashanja. ¹³ Emalanga ga Nnamahanga, oha ngasi kantu koshi obuzine, n'emalanga ga Yezu Kristu, ye waderhaga ogwage bwinja gw'obwemere emalanga ga Pontyo Pilate nkurhegesire nti ¹⁴ oyunve oku amarhegeko gadesire obuli galanga gacire buzir'izabyo, kuhika olusiku Nyakasane Yezu Kristu ayisha. ¹⁵ Nnamahanga yene, olya oba Mukulu kulusha abandi boshi na wakuvugwa omunkwa, mwami w'abami na Nahano wa bannahano, lyo ayerekana okwo hano amango atwaga gahika. Yene yene ojira akalamo karhayurha, yeba omu bumoleke burhayegerwa ho na muntu, ntaye osagimubona na nta muntu wankahashi mubona. Kuli ye obukuze n'obuhashe ensiku n'amango! Bibe ntyo. ^{18 17} Ohanule abagale bamwer'iguli, barhakagi cibona, bamanya bakahira obulangalire bwabo kuli obwo bugale bwa nsiku nsungunu ci bacikubagire Nnamahanga, orhugabira ebintu byoshi mpu rhubikolese. Bacihangane okukajir'aminja, bagalire omu bijiro binja, bakahana n'omurhima mwinja, banakashangira ebirugu byabo baguma n'abantu. ¹⁹ Ntyo kwo balunda mwo omuhako munji na muzibu oku mango gayisha lyo bahasha okuba n'obuzine bw'okunali ²⁰ Timoteyo mashi ololage bwinja bwinja birya wahabirwe. Oyake emyanzi erhagwerhi nda namugongo, erya erha yimbanwa n'obwemere. Eyo myanzi yera abantu baderha mpu kumanya, n'obwo omu buhwinja baderha ntyo. ²¹ Bulya bantu baguma baguma bakola bacikunga mpu bakola bayishi okwo, banaciberulaga obwo oku bwemere. Mashi olukogo lwa Nnamahanga lube haguma ninyu.