¹ Bulala rhunakola haguma na Nyamuzinda, rhubahanwire mumenye obonjo bwa Nyamuzinda murhaburholaga oku busha. ² Bulal' aderhere: omu kachanji k'okuyemerwa nakuyunva, omu lusiku l'obuchunguke nakurhabala, tala akasanzi k'okuyemerwa kokano tala olusiku l'obuchunguke loluno. ³ Rhurhanihire chintu choshi ch'okusirhaza, y'akasi karhaba chintu ch'oku shungw'omudoke. ⁴ S'aliko, rhulirhwachijira bahamiriza, nk'abakozi ba Nyamuzinda, omu kulindira bwenene, omu malumwa, n'omulufiro, n'omu bibazo; ⁵ Omu kushurhwa, omu kuhirw'omu mpaniko, omu mijinya, omu mpanya, omu kurhaj'ero, omu kurhalya; ⁶ Omu kuchichesa, omu kumenya, omu kulembera, omu bwinja, omu Muka Muchesibwa, omu buzigire burhaherhe bulyalya, ⁷ Omu mwazi gw'okunali, omu misi ya Nyamuzinda; haguma n'entwaro z'okunali z'okuboko k'okulyo n'amalembe; ⁸ Omu kagarhi k'obukuze n'eshoni, omu kagarhi k'oku derhwa kubi n'okuderhwa bwinja, kulolwa nka mubeshi aliko muntu mushinganyanya; ⁹ Nk'abarhayinjikene, aliko bayinjikene bwenene, nk'abafire, aliko balamire, ¹⁰ Nk'abagayisizwe, aliko bantu b'obusime esiku zoshi, nk'abakene, aliko rhuchiza banene, nk'abarhagwerh'echintu, aliko baherhe byoshi. ¹¹ Obunu bwerhu bwamashwekulwa emwenyu, ego Bakorinto, emirhima yerhu yamayushulwa. ¹² Murhafundezezwe omu kagarhi kerhu, s'aliko mufundezezwe omu mirhima yenyu. ¹³ Intyo, mujuhe nk'oku mwa habirwe (ndi naderha nenyu nka bana bani), mukuz'emirhima. ¹⁴ Murhachishwekeraga omu buja burhali bwenyu. Enshimanano eri ngahe ahakagarhi k'okuli n'obubi? changwa ngah'enshimanano eri ahakagarhi k'akamole n'omwizimya? Enshimanano eri ngahe aha kagarhi ka Kristu na Beliali? ¹⁵ Changwa chigabi chichi aha kagarhi k'omushinganyanya n'orhali mushinganyanya? ¹⁶ Enshimanano ehe yakaba aha kagarhi k'olurhamba lwa Nyamuzinda n'ebishushanyo? Bulala rhuli lurhamba lwa Nyamubaho, nk'oku Nyamuzinda abi derhere: Nji nayumbaka na ndambagire omu kagarhi kabo; nji naba Nyamuzinda wabo, nabo nji baba lubaga lwani. ¹⁷ Chochirhumire, murheng'omu kagarhi kabo, munachikule haguma nabo, Nahano ashambere; murhahumaga oku chiyandwire nji na nabayankira. ¹⁸ Nji nab'emwenyu Darha, nenyu nji mwaba bagala na bali bani, Nahano w'esiku zoshi ashambere.