¹ Ne omin yóm Ngà Ubiha mkó du yóm ghituhen dket bè yóm sulat lenulun. Ne tódô baling neb bè longit, wen dô sóól uras kegenen. ² Ominu yó mton yó kem hitu hógów Dwata eles tendo gel mdà bè solu Dwata, sket benlay le lu féw. ³ Wen sotu hógów Dwata tonu tódô mógów ebè yóm gónó mtem yóm gel hboo le ebè Dwata, ne mdà bè yó. Wen tukung blówón kulóngen. Ne tey wen yóm gel hboo le blay le du boluyen insinsu mò ntemen anì yó, yóm kebelen mò mung bè yóm gel kni le bè Dwata yó kem tau hemtahu béléen. Yóm gónón mtem du, hono blówón, nô bè solu yóm gónón myón yóm fen kmamal. ⁴ Tahu se. Bè yóm ktemen du yóm hógów Dwata mdà bè solu Dwata yó, lemwót yóm kebelen tódô mung bè yóm kni le bè Dwata yó kem tau hemtahu béléen. ⁵ Ne ominen bud ma yóm tukung insinsu yóm hógów Dwata yó, ne wen ofi nwahen bè yóm gónó le gel mtem mò lemen du, ne tódô gotu tudaen ete tonok. Sen‑gengen se lemugung ne lemték, lelen smilà, ominen mbel yóm tey linol bong te tonok. ⁶ Omin le gotu htifes yó kem hitu hógów Dwata mogot féw. ⁷ Ne mféw yóm tanayen. Sennganen se mulók kulón ne ofi nbol litô tódô htantang ete tonok. Botong gbut gónón mlób tonok, ne gbut se bè yó kem koyu. Ne kentihen yó kem bnes, tódô gotu mlób. ⁸ Ominen mféw yóm gewuhen. Tódô tonu se yóm lómón ke bulul bong, bede hono dilóf gtudà elem mohin. ⁹ Ne botong gbut bè él mohin tódô baling litô. Ne gbut bè yó kem kentihen mowil lemen, gotu matay. Ne gbut se bè yó kem kafal te mohin, gotu gbà. ¹⁰ Ominen mféw yóm getluhen. Tódô tonu yóm tey blotik bong mosok gu bè longit, lómón ketomen solok lunay. Botong gbut bè yóm kdéen él mlel gónón e gdek, ne bud gbut se bè yó kem tbul él. ¹¹ Ne yó boluy yóm blotik btang yó, “Héét.” Tahu se, botong gbut kdéen él mlel baling héét, ne tey dê tau matay lan le gemginum yóm él héét yó. ¹² Ominen mféw yóm gfaten. Ne tódô gbut bè yóm kdaw, là kóen bud mnóng. Ne gbut bè yóm bulón ne bè yó kem blotik, là kô le bud mnóng. Yó gónóm mon, tódô gbut bè yóm sendaw laen kô dù layagen. Dalang se yóm kifu, tódô gbut bè yóm sotu kifu, laen kô dù layagen. ¹³ Ominu bud mkay ketngelu, tódô gungolu se yóm tey udél banug móyóng heklowong ditu ta gu te kmawang. Yó udélen, monen, “Wóyóy, wóyóy, wóyóy. Ya yu kem tau te tonok. Tey hlayam ye sok mféw yóm tlu dù hógów Dwata kedeng.”