¹ Ominu bud mkay ketngelu, ne tódô tonu yóm Ngà Ubiha mdà te bulul Sayun. Wen lematu bud fat folò fat libu tau mung du, yó kem tau sket wen snulat lem uyó le yóm kun boluy yóm Ngà Ubiha ne boluy yóm Maen. ² Ne wen udél gungolu gu bè longit, hol lómón ke lungkul yóm tey hikong, duhen ke uni yóm lugung bong. Hol lómón ke sguyun yóm tey dê heglung. ³ Yó nmò yó kem lematu bud fat folò fat libu tau yó, gotu le mdà bè solu yóm gónón myón yóm fen kmamal, ne bè solu yó kem fat mtulus ne yó kem tau tuha. Gotu le semngal yóm lomi sngal, ne laen se kô dumu tau gembek dmalang du yóm sngal yó, tek són lu. Bè yóm kdéen tau te tonok, són lu yóm deng nsok. ⁴ Ni kem tau semngal ni, hono le kem tau laen dù belenen yóm gel nmò le, ne là kô le deng gemnóm lówó libun. Hono kem tau gel lemolò yóm Ngà Ubiha balù nô gónón e mógów. Deng nsoken lu lem blóng kem dumu tau, hol lómón ke lu tanay yóm bungu hulu gefet mò blay ke Dwata lewu le yóm Ngà Ubiha. ⁵ Laen kô kéng le ni kem tau ni, ne laen se kô bang gónó le gemsanil kul yó kem dumu tau. ⁶ Kogolen bè yó, tódô tonu yóm sotu hógów Dwata móyóng hegeta te kmawang. Yó nmoen, tulónen yóm Tulón Hyu laen dù sónen lemwót bè Dwata. Tódô kentihen tau bè klamangen benwu gónón e gefet yóm tulónen yó, tódô gefet bè ket but tau, bè ket kay udél, ne bè ket ból tau. ⁷ Tódô hgelen udélen, monen, “Hol nadat ye Dwata. Hol sendóyón ye dé yóm tey kegetahen. Deng hto ne yóm butengen kmukum kem tau. Hol dóyón ye se yóm Dwata deng tehe mò yóm longit ne yóm tonok ne yóm mohin kkólen bè yóm kdéen él tembul.” ⁸ Ominu bud mton yóm gewu hógów Dwata móyóng huli. Yó kun udél, monen, “Deng gbà ne. Deng gbà ne yóm tey syudad Babilun. Hol lómón ke tehe gel hlengelen yóm kdéen tau bè klamangen benwu, duhen yó sem gel kwiten kul mò samuk.” ⁹ Ominu mton yóm getlu yóm hógów Dwata bud móyóng huli, hgelen udélen, monen, “Ke wen tau hemtahu bè yóm lóbô tanay sut ne bè yóm lennged hmoen, ne ke wen hemmóyô yóm kun ilô nmò le lem uyó le duhen ke te henmù le, ¹⁰ angat tey kebut Dwata kul, hol lómón ke wen ninum alì lóbô laen dù bolen hinumen kul. Bè yóm angat ktafaken kul, sónmò le heslaf ditu lem lanaw ofi wen kbudahen tendo dmilóf. Yóm keheslaf le yó, hyu bud ton yó kem hógów Dwata gu bè longit ne yóm Ngà Ubiha. ¹¹ Laen kô dù sónen kebel yóm ofi gónó le alì glayam. Tódô seflós kdaw ne kifu yóm tendo keheslaf yó kem tau mung hemtahu bè yóm lóbô tanay sut ne bè yóm lennged hmoen, yó kem tau deng hemmóyô du yóm ilô yóm kun boluy.” ¹² Yó gónóm mon, yake hol le hfulung hbala yó kem tau Dwata. Lu se yó kem tau mimón du yó kem kun hlau Dwata, ne teneb le bè Jisas. ¹³ Ne bud gungolu se yóm mudél gu bè longit, monen, “Ni snulatem. Hligal yó kem tau ke matay le bè yóm igò le lemolò yóm gónó le mogot.” Ne ominen mudél se yóm Tulus Dwata, monen, “Tahu se yó. Tey kehligal le kul, abay se deng le gehegnô bè yó kem blat tehe gel nmò le. Yakà dengen eles nô bélê le yóm ulék yóm hyu tehe gel nmò le yó.” ¹⁴ Ominu bud mkay ketngelu, ne tódô tonu lobun bukay, ne wen myón tahen hol lómón ke tau. Wen blówón suub le bè kuluhen, ne wen tey galab telem nogoten. ¹⁵ Ne bud wen sotu hógów Dwata tonu hewà gu lem yóm Gónô Dwata, tey hgelen udélen tmaba ebè yóm myón ta lobun, monen, “Nam e gmalab dé, abay se deng hto ne yóm kdaw kuta. Deng gotu hulô ne yóm nuta te tonok.” ¹⁶ Tahu se, gmalab yóm myón ta yóm lobun, ne sulék nutahen yóm klamangen benwu. ¹⁷ Ne bud wen sotu hógów Dwata tonu hewà gu lem yóm gónô Dwata bè longit. Bud kmulóng galab telem se kun. ¹⁸ Ne bud wen sotuhen lemwót gu bè yóm gónó le gel mtem yóm hboo le ebè Dwata. Ni se yóm hógów Dwata mogot ofi bè yó. Hgelen udélen tmaba ebè yóm hógów Dwata le mogot galab telem, monen mò du, “Nam e nuta se kóm yó kem bungu grép te tonok. Deng bang kuta kul ne.” ¹⁹ Tahu se, na a muta yóm hógów Dwata yó, ne gotu sentifunen yó kem grép nutahen. Ne ominen yó mkok kul elem yóm gónó le gel kemmes kul mò gónóhen hoyos élen. Yó hningónen yóm yó, duhen yóm tey kebut Dwata yó kem tau là hemtahu béléen. ²⁰ Ne tahu se. Bè lewà yóm syudad gónóhen kemmes kul. Ne tódô gotu mlel yóm tey litô, mukas tlu latu kilumitruhen gónón e molo. Ne yó kngelem yóm litô molo yó, botong sotu mitru bud sóól.