¹ Sotu keedaw bè yó, bud tmolok bè kilil Lanaw Galili Jisas, ne tey tau wen sbung ebéléen. Yó gónóm mon, lemwót Jisas tódô myón lem yóm ówóng hetów ta él, ne lemwót yó kem tau gotu le nô bè kilil él. ² Tey dê toloken ku, ne gel hlanen bè helingón, yó monen, ³ “Ni hol hnungol ye. Wen sotu tau nen e sohul bnéken bè denaduhen. ⁴ Bè yóm ksohulen du, wen se temsik ebè lan. Sut yó kem onuk koyu, ne tódô gotu tnukô le. ⁵ Wen se sohulen gdek elem yóm tonok bnotu yóm gónón laen hol tonoken. Là kóen legen deng sana tmowok, abay se là mfól tonoken. ⁶ – ⁷ Timbow sut kdaw bè yóm deng ktowoken, tódô kendel menes, abay se là holen nelem dolilen. Ne bud wen se sohulen gdek e talak yóm gónón enget mfól kluon semnual. Ne tmowok, tódô mung segeng bè yó kem kluon semnual, okóm deng mem matay yóm towok halay lem blóng le, ne là kóen dog mungu. ⁸ Okóm wen se sohulen gdek ebè yóm gónón hyu tonok, tey hyu ktowoken ne tembud ne tey mungu. Wen se kanguyen mungu tlu folò, ne wen se mungu nem folò ne wen se mungu lematu.” ⁹ Omin Jisas bud mon du mò kul, “Yóm tau wen klinguhen, hol hmungol.” ¹⁰ Timbow le gotu seko yó kem dumu tau, mógów le ebéléen yó kem sfolò lewu gel lemolò du, ne wen kem dumu tau mung kul, snólók le yó kem deng hningónen bélê le. ¹¹ Mon Jisas mò kul, “Wen yóm là heglileb Dwata du bè yó kem dumu tau bè yóm kmò kogoten tau, okóm deng hetengon kuy. Bong bèyó kem dumu tau, mlan bèhlingón yóm gel ktoloku kul. ¹² ‘Anien he kegel ton le, là kô dilô ledu. Baluen he kegel gungol le, là kô glileb ledu. Ke yó dum glileb le, kaem semfulék le ebè Dwata, ne hnifóten bélê le yó kem salà le.’ ” ¹³ Ne bud mon Jisas mò kul, “Là tngón ye du kô lanen yóm hningónu yó koni bè yóm tau smohul? Ke là tngón ye du yóm yó, tedu tô kmò ketngón ye du du yó kem dumu gel hningónu? ¹⁴ Ni sii lanen. Yóm bnék sohul yóm tau yó, duhen yóm Udél Dwata. ¹⁵ Yóm lan gónón e temsik yó kem dumu bnék sohulen, duhen yó kem tau hmungol du yóm Udél Dwata, ne sut Seitan tódô nwahen bélê le. ¹⁶ Ne yóm tonok bnotu gónóhen e gdekyó kem dumu, duhen yó se kem tau hmungol du yóm Udél Dwata, ne tey ktimu óyô le du. Okóm tek udi yóm kehtahu le du, abay se là holdilo le du. ¹⁷ Sok wen gfà duhen ke hlayam sut bélê le lemwót bè yóm tô kehtahu le, tódô kendel kenogolle. ¹⁸ Yóm bnékgdekelemyóm angat gónón alìmfól kluon semnual, duhen yó se kem tau la hemtahu le be Dwata, ¹⁹ okóm dê bnukù nawa le bè klowil le, ne gfét le bè kebel le kendengen le, ne tey dê hekem dumu henoyonawa le. Yó gónón baling lanayóm tô kehetahu lene laen dog bunguhen. ²⁰ Tum tonok hyu gónón e gdekyó kem dumu bnék sohulen, duhen yó se kem tau hmungol du yóm Udél Dwata ne henmóyô le neyó gónón tey mungu. Wen se mungu tlu folò ne wen se mungu nem folò ne wen se mungu lematu.” ²¹ Ne bud mon Jisas mò kul, monen, “Laen dù tau hemtom solok ke mom bud hnokoben, duhen ke mom suen bè gónón glilung. Okóm ke wen tau hemtom solok, tódô hyónen bè gónón geta anì lemayag. ²² Yóm gebnos nim kmoen ni, enget gefan elem hulin kdaw. Yóm glimun nim kmoen ni, enget tengon le elem hulin kdaw. ²³ Yóm tau wen klinguhen, hol hmungol.” ²⁴ Bud mon Jisas mò kul, “Hol hentilob ye dé hmungol du nikem gel gungol yeni. Ke tilob khungol ye du, Dwata se heglileb du kuy yóm lanen, ne du se angat bud temnù du bélê ye yóm deng ketngón ye. ²⁵ Ke deng wen gwahen yóm tau, bong hebud tnù Dwata du béléen. Okóm yóm tau ke là suen du lem hendemen yóm deng gungolen, balù yóm udì tehe tngónen, enget bud kó Dwata béléen.” ²⁶ Bud mon Jisas mò kul, “Yóm kogot Dwata tau, hol lómón keyóm tau smohul bnék bè dnaduhen. ²⁷ Bè yóm deng ksohulen du, tódô bayaen. Ke kifu, tódô tungô. Kemwas, bud btik mò nmò. Neyóm bnék deng huluhen yó, tódô glimun tonok ne henlelen tmowok sekun. Okóm yóm tau smohul du, làkô tngónen du yóm mò kmò ktowok yóm huluhen. ²⁸ Tódô lemwót bè tonok segónón tmowok yóm lem hulu efet mungu. Tanayen, nen glimun, ominen dmoun, ngangen ne efet mlem. ²⁹ Timbow gefet, tódô kendel nuta yóm funen, abay se kedawen deng muta du.” ³⁰ Ne bud mon Jisas, “Tedu de gónó tekuy e hkél du yóm kogot Dwata tau? Ne hlingón du de gónó tekuy ehmingón du? ³¹ Sotu gónó tekuy hmingón du, hol lómón ke yóm lem hulu alì lemnek bè kdéen deng hulu yóm sotu tau bè lamihen. ³² Ngangen tmowok efet bong, efet lembang kem hangahen, botong le smala tahen yó kem onuk koyu.” ³³ Yóm gel ktolok Jisas, tey dê hlingón nmoen bélê le. Tódô toloken kul yóm mo gono le temngon du. ³⁴ Laen kô dù toloken kuke là heningónen du. Okóm bè yó kem gelemolò du, ke són lu getulónen kuyóm henigaden. ³⁵ Timbow sdef kdaw bè yó, mon Jisas mò yó kem gellemolò du, “Hlós tekuy ne efatu lanaw.” ³⁶ Tahu se, tódô tnagak leyó kem tey tau wen, ne motun le elem yóm ówóng gónó Jisas myón, ne omin le lemwót. Ne wen se kem dumu tau mówóng mung kul. ³⁷ Yóm igò le tolo mówóng talak lanaw, tódô mbel yóm tey lenos bong, lel tey lewók, botong tô gotu glimun lewók yóm ówóng le, tek udì duen gónó le là lemneb. ³⁸ Okóm ke Jisas deng mom gtungô, temdanan te kama fi bè sékê yóm ówóng. Lemwót yó kem gel lemolò du, bentik le Jisas, mon le mò du, “Ó Amo, moem tlek tungô kut ni du? Móyón tekuy lunul.” ³⁹ Omin Jisas yó hboluk btik ne mudél ebè yóm lenos, monen, “Botongem ne.” Ne bud monen ebè yóm lewók, “Hetinufi ne.” Tahu se, tódô meko yóm lenos ne temno te lanaw. ⁴⁰ Mung kudél Jisas ebè yó kem gel lemolò du, monen, “Mò ye kat teylikò ni du? Laen deng kehetahu ye he kô?” ⁴¹ Ya tey sidek kelikò le, stulón le, mon le, “Tmau du mni? Balù lenos ne lewók, sana kimón le du.”