¹ Timbow kogolen bèyó, bud mulék ebè Kapérnaum Jisas, ne tódô kendel tengón yó kem tau yóm deng kekólen bè gónóen. ² Ya tey dê tau bud stifun ebéléen, tódô henok lem gónô efet laen dog dù gónó lenô yó kem dumu, balù bègwa. Ne ominen tmolok kul yóm Udél Dwata. ³ Yóm igoen temolok,gedek le bè yó se yó kem fat tau, wen tau sentihang le ebéléen, yóm tau matay sfu lówóhen. ⁴ Okóm laen dù lan le husek ebè Jisas, bà mon tey tau wen. Yó tódô nmò le, nit le ete ketef yóm tau wen desen yó, wen gónó le hemnas du ditu ta bè yóm gónó Jisas seblà nô, ne tódô hoyolo le ebè Jisas yóm tau là gógówen yó koni. ⁵ Timbow ton Jisas yóm alì kehtahu le béléen, yó gónón tódô mon du ebè yóm tau matay sfu lówóhen yó, “Ó Man, deng hnifótu ne yó kem salaem.” ⁶ Ne wen se bè yó kem tau gel tmolok hlau myón bè yó, yó hendem le, ⁷ “Moen ke lómón ni kudélen tau ni? Kóem hsengeden knóen bè Dwata. Laen kô dù tau gembek hmifót salà, tek són Dwata.” ⁸ Tódô tengón Jisas yóm nô lem hendem le, yó gónón mon du mò kul, “Moen de ke lómón yó kmò kehedem ye? ⁹ Là kóen na a mahil mon du,‘Hnifótu ne yó kem salaem.’ Ne là se kóen mahil mon du, ‘Btiki, ne mógówi.’ ¹⁰ Ni new hol hton kuy yóm kwen kegebek hemifót salà yóm Ngà Dwata yóm tolo kenóen te tonok.” Ne omin Jisas mon du ebè yóm tau deng matay sfu lówóhen yó koni, monen, ¹¹ “Ni monu mò kóm, Man, medai ne, ne nitem yóm gónó le semtihang kóm yóe, ne muléki ebè gónóem.” ¹² Ne tahu se, bè yóm igò le temngel, tódô betik yóm tau yó koni, ne newahen yóm tehe gónó le semtihang du, ne tódô lemwót mulék. Ya tey ketenga le du, ne tey kedóyón le ke Dwata, mon le, “Là kô deng sulék ton me du kum nim ton meni.” ¹³ Kewót Jisas bè yó, bud mógów etu bè kilil Lanaw Galili. Ya tey bud tau stifun ebéléen, ne wen bud toloken kul bè yó. ¹⁴ Timbow bud helós bè yó, tonen yóm sotu tau fen gel metuk bwis boluyen Libay, ngà Alfiyus, meyón bè fsinaen. Bè yóm keton Jisas du, tódô monen mò du, “Ó Wè Libay, loloem ou.” Ne tahu se, tódô lemwót Libay, loloen Jisas. ¹⁵ Kogolen bè yó, meken Jisas ne yó kem ge lemolò du bè gónô Libay.Tey dê bè yó kem dumu tau gel metuk bwis dalang se yó kem dumu tau gemsalà mung ke Jisas, ne mong le seyón meken bélê le bè yó. ¹⁶ Wen kem Farisi meton ku. Ni kem Farisi ni, hono kem tau temolok hlau. Timbow ton le yóm kesegbót Jisas bè yó kem tau gemsalà, ne yó kem tau fen gel metuk bwis bélê le, tódô le mógów ebè yó kem gel lemolò ke Jisas, ne mon le mò kul,“Moen yó du yóm tau gónó ye hetolok ke deng mem segebót meken bèyó kemtau yóe?” ¹⁷ Mung kungol Jisas du yóm mon leyó, yó gónón mon du mò kul, bede hningónen, monen, “Yóm tau ke laen dù desen, là kô snoloen du kun yóm tau mulung. Són yóm tau wen desen mebel du. Duhen ni sem nógówu edini ni, làte tenabahu ku yó du kem tau tedeng kmò le, okóm yó dé tenabahu yó kem tau gemsalà.” ¹⁸ Sotu kdaw bè yó, lemwót yó kem tau gel lemolò ke Jan gel mabtays ne yó kem Farisi, go tu le hewasa. Wen se kem tau mógów ebè Jisas, mon le mò du, “Yó kem tau gel lemolò ke Jan ne yó kem Farisi, gel le hewasase ku. Okóm yó kem gel lemolò kóm, là kô nmò le du. Moen de ke là nmò le du?” ¹⁹ Ne benalà Jisas lu, bede hlanen bè hlingón, monen, “Kewen mò ken bè mulu, là kô gebek le du ke là gomong le meken yó kem tau tinok le edu yóm igoen tolo nô bélê le yóm logi myehen. ²⁰ Okóm enget wen ke kedawen, tódô nwa le bélê le yóm logi myehen. Yó he kton ye kul hewasa.” ²¹ Ne wen bud mon Jisas mò kul bè yóm là kehyu sembool du yóm kun tolok bè yóm tolok gena, bede bud hlanen bè helingón, monen, “Laen kôdù tau ke klefengen bè yóm nes bolok yóm nes hanà lomi. Keyó nmoen, ngem ke kemsong yóm nes lomi, ten‑geeden hekesê yóm nes bolok. ²² Ne sotuhen, laen kô dù tau ke ilihen yóm tifas hanà tolo lomi elem yóm sning kulit ógóf deng legen, yóm là buden menut. Kemoen kekmodok yóm tifas yó ne mem betù yóm gónóhen e mili du, abay se lemto bè yóm deng kekodoken. Ne mem gotu gamà yóm tifas, ne baling sidek yóm gónóhen nô. Yó dé kun yóm tifas ke hanà tolo lomi, ilihem bè yóm sening kulit ógóf hanà tolo lomi senéen.” ²³ Sotu kdaw bè yó, lemwót le Jisas neyó kem ge lemolò du, melan le helalak yóm teniba, bede gebangà bè yóm Kedaw Kehegenô. Lemwót ni kem ge lemolò du, selob lema bungu halay gu talak teniba mò neteb le. ²⁴ Timbow mton yó kem Farisi, mon le mò ke Jisas, “Tenngelem dé yó kem gel lemolò kóm, deng mom nulé le yóm hlau tekuy bè Kdaw Kehegnô yóm nmò le yó.” ²⁵ Bnalà Jisas se lu, monen, “Deng hónô senfala ye se yóm tehe nmò Dabid ne yó kem tauhen bè yóm kdaw laen dù ken le, ne tey kbitil le. ²⁶ Tódô husek Dabid bè Gónô Dwata, okóm Abiyatar yóm hol geta bè yó kem gel demsù ebè Dwata bè yóm kedaw yó. Ne nwa Dabid yóm tenafay deng blay le ebè Dwata, ne ominen mken du. Blaem bè yóm hlau tekuy, là kóen hyu kken tau hkawang du yóm mambang yó, tek són yó kem gel demsù ebè Dwata mken du. Ewenem ke Dabid, botong kenen, ne benlayen se yó kem tauhen. Bede là kô benolow Dwata du ku yóm keken le du.” ²⁷ Bud mon Jisas mò kul, “Là kô yó du gónó Dwata mò yóm tau kemò fen lemolò yóm kdê hlolò bè Kdaw Kehegnô. Okóm yó dé gónón mò yóm Kdaw Kehegnô mò lanen tmóbóng tau. ²⁸ Yóm Ngà Dwata, du se wen kegebek fen temolok du kuy yóm heyu mò du bè yóm Kedaw Kehegenô.”