¹ Ó kem ngà, lemwót bè yóm deng kehetahu ye, hol gel nimón ye kem tuha ye, yakà ni du se yóm hol heyu bélê ye. ² - ³ Wen yóm hlau Dwata gbak ebélê ye, ne ni se yóm hol tanay hlau wen fasad mung du. Yó monen, “Hol nadatem maem ne yéem anì hyu kógów klowilem, ne anì tahà ktauhem te tonok.” g ⁴ Ne yu kem tuha, bê ye abay nmò yóm gónó le lembut yó kem ngà ye. Okóm lemwót bè yóm deng kehetahu ye, hninggel ye hmau kul ne tmolok kul. ⁵ Ne yu kem tau dok, hol gel nimón ye yó kem tau mfun kuy lemwót bè yóm kadat ye kul. Hewót ye lem but blutut ye yóm kimón ye kul, hol lómón se ke Krays yóm nimón ye. ⁶ Bê ye olo heton du ta ke wen nemò ye mò tô gónó le dmóyón kuy. Okóm hol hewót ye lem but blutut ye yóm kemò ye du yóm kun kóyô Dwata, yake tau ye dok bè Krays. ⁷ Hligal ye dé bè yóm kemò ye nemò. Yakà bè kuy gónó mogot du yóm gónó ye mò du, là kô són du bè tau. ⁸ Hentulón ye nawa dé, ke heyu yóm nemò ye, bud hyu senéen yóm ofol blayen kuy yóm gónó tekuy mogot, senged se ke tauhi dok duhen ke là. ⁹ Dalang se kuy yu kem tau wen doken. Yake hol lómón yó koni yóm kuy kmò ebè yó kem dok ye. Bê ye bud gel henwó lu. Yakà tek sotu du gónó ye mogot, duhen yóm gónó tekuy mogot bè longit. Bè yóm angat kekukumen kuy, laen kô mtukul knihuhen bélê ye. ¹⁰ Ni se mò sónen yóm udélu ebélê ye. Hol hegel ye nawa ye lemwót bè yóm deng kesesotu ye bè yóm gónó tekuy mogot, ne lemwót bè yóm tey kegbeken bélê ye. ¹¹ Dikót ye dé yó kem ngom sfatay deng blay Dwata kuy anì laen dù gemò Seitan bélê ye bè yóm dê lanen tô smukat kuy. ¹² Abay se là kô tau du yóm nit tekuy sfatay, okóm yóm dê mtulus gel dók Seitan gu te kmawang. Ne wen se kfasang le mekem yóm tey kekifuhen. ¹³ Yó gónóm mon, géhél dikót ye ne yó kem ngom sfatay deng blay Dwata kuy anì laen dù gmò Seitan bélê ye ke bangen muluk kuy. Bà nô kegen Seitan tô ma kuy, là kô ye na a ghudul. ¹⁴ Duhen yó, eles tekuy gel htifes dé. Yó henged hilet mget bè ówók tekuy, duhen yóm klaen dù kéng tekuy. Yó henged onit eles tendo gel lesek tekuy, duhen yóm ktedeng nawa tekuy. ¹⁵ Yó henged tlumfà tekuy, duhen yóm tendo gel ktulón tekuy yóm Tulón Hyu gónó tau mit sefyu ebè Dwata. ¹⁶ Ne yó henged klung eles tendo gel kitin tekuy, duhen yóm kehtahu tekuy bè Dwata. Lemwót bè nim klung tekuy ni, là kóen tódô bélê tekuy yóm kdê hanak mofi gel gtì Seitan tekuy. ¹⁷ Yó henged sloung tók eles todo gel sudù tekuy, duhen yóm deng kegewà tekuy. Ne yó kfilan blayen tekuy yóm Tulus Dwata, duhen yóm Udél Dwata. ¹⁸ Bè kdê ni kem ni koni, hol hemung ye du yóm gel kni ye bè Dwata, tódô henlel ye htóbóng béléen. Balù kihu sut bélê ye, hol ye gel mni bè Dwata, halak ye bè Tulusen. Yó gónóm mon, bê ye hlingay, ne hol bê ye abay htakas. Bè yóm gel kni ye, gel homong ye yóm kdéen tau Dwata. ¹⁹ Ne hol gel utóm ye ou snéen bè yóm gel kni ye anì benlay Dwata ou kehulung tmolok, ne anì laen dù klikou temngon du bè kem tau yóm Tulón Heyu tehe gebnos bélê le. ²⁰ Yakà ni du gónó Dwata hógów dou, ne ni se yóm lewót gónóhu geblanggù. Hol hni ye ou anì là likoe mit du yóm Tulón Hyu deng sigang Dwata tahu. ²¹ Hógówu Tikikus edyó bélê ye anì tulónen kuy he yóm dou kmò dini. Du se sotu dumu tekuy sogot nawa, ne là kóen monol nawahen mò du yóm kun nmò yóm gónó tekuy mogot. Gotu tulónen kuy he yóm kdéen. ²² Yó gónóhu hógów du edyó bélê ye anì wen gónó ye temngón yóm kum kmò dini, ne anì wen gónón gemduf kuy snéen. ²³ Yó hem Dwata, yóm Mà tekuy, ne yóm gónó tekuy mogot Jisas Krays hol bemlay kuy yóm kenek nawa ne yóm kesebong nawa, ne hol hembegel du yóm kehetahu ye. ²⁴ Dwata he hol tmóbóng yóm kedéen tau là monol nawa le ebè yóm gónó tekuy mogot Jisas Krays.