¹ Ó kem dumu me setwoli, laen dù bud muhu smulat du ne yóm kdaw angat ksut ni kem ni. ² Abay se deng hónô tngón ye se kuy yóm kektuten tau yóm kdaw kkól yóm gónó tekuy mogot, hol lómón kektuten tekuy yóm tau mnagaw kifu laen hemkól du. ³ Ofo kul tô mon du yó kem tau, “Hyu ne ni. Deng tinof ne laen bud knikò tekuy.” Okóm tódô mekto sut bélê le yóm tey glumfak le. Tódô le gotu ktut, lómón kektut yóm libun kmuleng blututen, ne là kô wen lan le hemlóy du snéen. ⁴ Okóm kuy, kem dumu me setwoli, là bud ye nô lemen ne kuy yóm gónón kmifu, ne là bud kentuten kuy ne yóm kdaw yó, lómón yóm kektuten kuy yóm tau mnagaw. ⁵ Yakà deng ye baling tau nô lem gónón lemayag. Là bud tekuy nô lemen ne yóm gónón kmifu. ⁶ Duhen yó, bê tekuy dnalang yóm kul kehlingay yó kem dumu tau, lómón tô le lemnga tungô. Eles tekuy hol mingat dé, ne hol tekuy hfulung hedem. ⁷  Abay se ke sok kifu, gel le henga yó kem tau, ne gel le hlengel snéen. ⁸ Okóm tekuy du, deng te tau lem layag, yake hol tekuy hfulung hedem. Eles te tendo kmulóng klung. Ne yó henged klung tekuy, duhen yóm kehtahu te, ne yóm kesbong nawa. Ne yó henged sloung tók sudù tekuy, duhen yóm kgel nawa te yóm angat kegewà tekuy gu lem hatay. ⁹ Là kô yó du gónó Dwata mélék tekuy ke angat te gomong tnafak. Okóm yó dé gónón mélék tekuy anì benlayen tu klowil laen dù sónen hlanen bè Jisas Krays yóm gónó tekuy mogot. ¹⁰ Yó se gónó Jisas fen matay anì gomong tekuy mowil béléen, senged se ke tolo te mowil bè yóm kkólen, duhen ke deng tekuy mlef. ¹¹ Duhen yó, hol ye gel setgel, ne hol ye gel stóbóng, lómón yóm gel nmò ye nim kmoen ni. ¹² Kem dumu me setwoli, bud wen hesgalu me kuy. Hol nadat ye yó kem tau gel mò nmò lem blóng ye, abay se lu yóm semgalak kuy ne tmolok kuy bè kehtahu ye. ¹³ Hol nadat ye lu dé, ne hol hotu ye nawa ye kul lemwót bè yóm kmò le nmò lem blóng ye. Hol nmò ye yóm gónón menek nawa ye yóm kdê ye. ¹⁴ Bud sotu hesgalu me kuy, kem dumu me setwoli. Hol eles bnólów ye lu yó kem tau mduk. Hol ten‑gel ye nawa yó kem tau gel hlóng likò. Tnóbóng ye yó kem tau là dengen ngelem kehtahu le, ne hol hanay ye nawa ye ebè kdê le. ¹⁵ Hol ten‑gama ye anì laen dù malà du sidek ke wen sidek nmò le bélê ye. Yó dé hol nmò ye, henyu ye kmò ye ebè yó kem dumu ye deng hemtahu dalang se ebè kdéen tau. ¹⁶ Hol tendo gel hlaan ye nawa ye. ¹⁷ Bê ye senkas mni bè Dwata. ¹⁸ Kihu mefet bélê ye, hyu duhen ke là hyuhen, senged nóm kdóyón ye ke Dwata. Yó se yóm hol kun kóyô bélê ye Dwata bè yóm deng kessotu ye bè Krays Jisas. ^{19 22} Hol ye gel temgama anì laen dù gónón gseng ebélê ye yóm Tulus Dwata. ²⁰ Bê ye kenbê yóm gel hetngónen kuy yóm gel hlanen bè kem dumu tau, ²¹ okóm hol henklol ye ke tahu lemwót béléen. Ke hyu, henmóyô ye  ne hol ye hlayuk du kuy yóm kdéen nmò sidek. ²³ Yó hem Dwata gónón lemwót yóm kenek nawa tekuy. Du se hol hólós kuy anì laen dù belenen sidek yóm knawa ye ne yóm kehedem ye ne yóm klówó ye bè yóm kdaw kkól Jisas Krays yóm gónó tekuy mogot. ²⁴ Yóm Dwata tehe tmaba kuy ekni, du se mò du bélê ye nim monu ni koni, abay se là kóen monol nawahen ebélê ye se kun. ²⁵ kem dumu me setwoli, hol gel tendo utóm ye mi snéen bè Dwata. ²⁶ 26 Sok ye gel stifun yóm kdê ye hemtahu dyó, hol ye gel sfódó. ²⁷ Hesfalahu kuy nim sulat ni lem blóng yóm kdéen tau hemtahu dyó. Nim hmou kuy ni, hlanu bè yóm kwalis blayen dou yóm gónó tekuy mogot. ²⁸ Yó hem gónó tekuy mogot Jisas Krays hol tmóbóng kuy.