¹ Bè yóm tanay nmò Dwata mò lan le hloni ebéléen yó kem Ju, wen hloloen kul bè yóm kmò le du. Ne wen gónô Dwata hmoen kul mò gónó le gel mò du yóm hloloen kul. ² Yóm gónô hdà le yó, Gónô Dwata gel nit le mógów. Wen lewu dfélen. Yóm tanay dfélen, boluy le du Dfél hetfing ebè Dwata. Wen soloken, ne wen lemisahen mò gónó le gel hmasà yóm mambang mò blay le ebè Dwata. ³ Ne yóm gewuhen dfél, yó boluyle du, Dfél gónón nô Dwata. Bede wen tey tilob nes mfól seng bè sóólen. ⁴ Wen lemisa lenafin blówón nô lemen mò gónó le gel mtem ebè Dwata yóm alì minggel boohen boluyen insinsu. Ne wen slungan bong lenafin blówón nô lemen snéen. Yó boluy le du, slungan gónón nô yóm fasad Dwata. Wen sotu sobuy blówón nô lemen gónó le hemyu du yóm tehe ken le ekni boluyen mana. Ne sotu bud nô lemen, yóm tehe tuged Aron, yóm tuged tehe tódô dmoun. Ne bud nô lemen snéen yóm lewu botu kufil gónó Dwata tehe smulat du yó kem hlauhen kul. ⁵ Bè yóm slungan yó, wen lewu lennged tenwél wen hafak le, sbalà hdà le tahen mò ilô yóm knô Dwata bè yó. Yóm hafak le, tódô gnolungen ta yóm gónó Dwata hmifót salà. Okóm là gket me tmulón du kuy ni kmoen ni kdê yó kem tehe nmò le tu ekni. ⁶ Yó se mò kmò le du yó kem yó koni. Bè yóm tanay dfélen, ket kdaw le mógów elemen yó kem tau demsù ebè Dwata na le e nmò yóm kul nmò bè yó. ⁷ Okóm yóm gewu dfélen, tek sotu tau gusek elemen, tek són yóm tau hol geta bè yó kem gel demsù ebè Dwata, bede tek suléken husek elemen bè yóm sfalay. Ne là kóen na a gusek elemen ke là wen litô nwiten mò dsuen ebè Dwata. Yóm dsuen yó, mò lan Dwata hmifót yóm kun salà, dalang se yóm kul salà deng gmò yó kem dumu tau là gehedem le du. ⁸ Wen hetngónen tekuy yóm Tulus Dwata lemwót bè yóm gel nmò le yó. Yó hetngónen tekuy, là kóen na a hnas yóm Dfél gónóhen nô Dwata ke sana tolo knô yóm tanay dfél bè yóm gónô yó. ⁹ Nim gel nmò le ni, wen hnigaden bélê tekuy ni kmoen ni. Yó hnigaden, yóm gel blay le ebè Dwata, ne yóm ógóf gel dsù le ebéléen, là kô gbeken hgulit du yóm tau mò du. ¹⁰ Bè yó kem gel hlolò le kul yó, olon gbak ebè yóm gel ken le ne yóm gel ninum le ne yóm gel kolob le mò gónó le baling mólós. Yóm kdê hlolò le kul yó, olo kem kul beyen nmò bè lówó. Són kwen mu le du, són yóm klaen deng lomi lan nmò Dwata mò lan le hloni ebéléen. ¹¹ Okóm ni ne, deng sut Krays mò blóng tekuy ebè Dwata. Mlan béléen yóm tóbóng alì hyu deng kól bélê tekuy. Sundu bè yó dum gónô Dwata hdà tau te tonok gónón semblóng tekuy, okóm bè tum hol gónô Dwata bè longit, yóm hol tahu duhen, yóm tódô ket du. ¹² Bè yóm kógów Krays bè yóm gónô yó, tódô hlós husek elem yóm Dfél gónóhen nô Dwata, ne bè yó gónón seflós nô. Bè yóm khuseken, là nwiten du yóm litô kambing duhen ke litô safì mò dsuen ebè Dwata. Okóm hol kun litô yóm nwiten. Lemwót bè yóm kedsuen yó, yó gónón wen lan tekuy gewà gu lem hatay, ne laen tul sónen ne yóm kegewà tekuy yó. ¹³ Yóm sotu tehe hlolò Musis kul, ke wen tau là mólósen lemwót bè yóm deng kehlonihen ebè yóm tau deng matay, yó gel nmò le sal gel wen litô kambing duhen ke litô safì gel hetsik le ebéléen, mung du kohuen yóm sotu safì deng eles hkekeb le. Ke sok deng gotu kmò le du yóm yó, mólós ne kton Dwata du yóm tau là mólósen yó koni. ¹⁴ Ke tehe wen ktueden yóm kul litô yó kem ógóf, milud he ktueden yóm kun litô Krays. Mlan bè kun tóbóng yóm Tulus Dwata laen dù tul katayen, yó gónó Krays tódô hamà du yóm kun klowil mò dsuen ebè Dwata, yóm dsù tódô ket du. Yóm litô dsuen yó, gbeken mkó du bélê tekuy yóm sidek gel hemblat tekuy lemwót bè yóm là kegtóbóngen tekuy yó kem dê tehe gel lolò tekuy. Ne ni kmoen ni, gbek tekuy mò du yóm hmò Dwata tekuy, yóm Dwata laen dù tul katayen. ¹⁵ Yó gónóhem mon, Krays se yóm lomi lan deng nmò Dwata mò lan tekuy hloni ebéléen. Yó gónón mò du anì kdê yó kem tau deng tnaba Dwata, gotu ton le yó kem hyu tehe fasad Dwata kul, yóm hyu laen kô tul sónen. Hol tahu dohò nim ni, abay se deng wen fen matay. Yóm katayen yó, gotu lenwaen yó kem tau bè yó kem sidek tehe gel nmò le bè yóm tehe klolò le yó kem gna hlolò le kul. ¹⁶ Bè adat tau tonok, gu laanen là deng mlef yóm tau, sal gel eles snulaten yóm kmò kólólen du bè kem dumuhen yó kem kimuhen. Okóm yó he kessólól le du yóm kimuhen yó ke deng tógó se kton kem tau du yóm katayen. ¹⁷ Ke tolo mowil yóm tau funen smulat du yó, là kô kendel gfun le du yó kem kimuhen yó kem dumuhen. Yó he kegfun le du ke deng matay se yóm tau mfun du. ¹⁸ Senged se bè yóm gna lan hlolò Dwata kul tganay. Là kóen hyu ke là wen yóm litô yóm ógóf fen matay. ¹⁹ Yóm tanay nmò Musis ekni, gotu senfalahen yó kem hlau Dwata bè yó kem tau. Ne ominen ma yóm litô yó kem safì ne yó kem kambing deng eles hnatay le, ne nbolen él. Ne wen sotu kay hulu nwahen boluyen hisop, benkesen yóm tnikel hulô nmò le gu bè bul ubiha, ominen mdù du lem yóm litô. Gna hentsiken ta yóm bok gónóhen nô yóm hlau Dwata, ominen hetsik du ebè kdéen tau. ²⁰ Yó udélen yóm igoen mò du, monen, “Nim litô ni mò hemget du yóm deng fasad Dwata tekuy.” ²¹ Omin Musis bud lemakit hetsik du ebè yóm gónô Dwata. Kólen bè yó kem kimu wen mu le du bè yóm gel kehloni le ebè Dwata, gotu hentsiken litô snéen. ²² Bè ktahuhen, bè yóm gna hlolò Dwata kul tganay, là holen wen baling mólós bè yó kem kimu le yó ke laen dù litô sù le du. Ne laen se dù tau hnifót Dwata salaen ke là wen yóm fen gamà litóen. ²³ Yó kem kimu wen mu le du bè yóm kehloni le ebè Dwata, hningónen yóm tahu duhen bè longit. Ne là mólós kton Dwata kul yó kem kimu te tonok yó ke là wen litô nô ta le. Okóm bè tu dum tahu kimu Dwata bè longit, là knóónen ke olon litô ógóf hetsik le eta le. Yakà wen yóm hyu sentahen. ²⁴ Yóm gónô Dwata gónó Krays husek yó, sundu gónô nmò tdok tau du, olo hningónen yóm tahu duhen bè longit. Okóm deng kól ditu ne bè longit Krays. Deng mdà bè solu Dwata, abay se du fen semblóng tekuy ebéléen. ²⁵ Yóm tau hol geta bè yó kem tau gel demsù ebè Dwata bè yó kem Ju, ket halayen husek elem tum Dfél gónóhen nô Dwata. Sal wen litô ógóf nwiten elemen. Okóm ke Krays kun, là ket kiwólen du mò du yóm kun dsù. ²⁶ Ke lómón yó nmoen, deng kem dê duléken ne dilóu glayam matay lemwót bè hol kbut benwu. Bede là. Tek suléken hbaling tau bè yóm kdaw deng moni bè yóm hol són benwu, ne laen dù bud seefen du ne yóm yó. Yó gónóhen sut anì nan e dsù klowilen mò hkó salà kdéen tau. ²⁷ Laen kô dù tau se ke là suléken du matay, omin Dwata kmukum du. ²⁸ Senged snéen yóm Krays. Tek suléken matay bè yóm tehe kedsuen klowilen mò hkó salà yó kem tey tau wen. Angat bud semfulék edini, bede là kóen na a bud hkó salà. Okóm yó nógówen, senfuléken yó kem kdéen tau hemtahu deng hemdón mangat du.