¹ Nim Mélkésédék monu ni koni, tehe tau hol geta mogot yóm benwu boluyen Salim, ne lelen du he yóm fen semblóng kem tau ebè Dwata, yóm hol geta bè kdéen. Bè yóm tehe kulék Abraham bè yóm katuen bè yó kem fat tau hol geta hmohon du, bè yóm hanà tolo knóen bè lan, senlong Mélkésédék. Yó nmò Mélkésédék mni béléen bè Dwata ne wen oluhen du. ² Ne lemwót se ke Abraham kun, gotu blayen ke Mélkésédék yóm gesfoloen mò baden ke Dwata bè yó kem kimu deng negefen bè yó kem hohonen. Yó lanen yóm boluy Mélkésédék, duhen “Tau geta tedeng knawahen.” Bud du se hol geta bè benwu Salim. t Yó gónó le moluy du “Tau geta menek kbenwuhen.” ³ Nim Mélkésédék ni, laen kô snulat le mò gónó tekuy temngón du ke tau du tehe maen ne yéen, ne tau du tehe fuen. Senged se bè yóm tehe kdaw ksuten ne bè yóm tehe katayen, laen dù smulat du. Ne lemwót bè yóm là ketngón tekuy du yóm katayen, wen gónón skél bè yóm Ngà Dwata, abay se laen dù tul sónen yóm keseblóngen tau ebè Dwata. ⁴ Ngem yóm tey kegetahen nim Mélkésédék ni. Balù Abraham, yóm tehe fù tekuy alì tótól, sana keblayen du yóm gesfoloen bè yó kem kdê kimu deng negefen bè gida. ⁵ Yó kem tau gel demsù ebè Dwata bè yó kem Ju, hono le tehe semfu gu bè yóm tehe Libay. Wen hlau Musis kul anì lu fen ma yóm gesfoloen mò bad yó kem tau Israél. Bede yó kem tau fen ma bad ne kem tau fen bemlay bad, hono tau sdumu semfu gu bè Abraham. ⁶ Okóm ke Mélkésédék kun, là semfuhen gu bè Libay se kun. Okóm tódô nwahen yóm gesfoloen blay Abraham du, ne wen oluhen ke Abraham bè yóm igoen mni béléen bè Dwata. Igoen Abraham he yóm tau gónó Dwata hol hlan du yóm fasaden. ⁷ Bè ktahuhen, tey geta yóm tau molu senta yóm tau noluhen. ⁸ Yó kem tau gel demsù ebè Dwata, lu fen ma du yóm gesfoloen. Matay le se kul, abay se sana kmò tau. Bong ke Mélkésédék kun, tódô nwahen yóm gesfoloen, bede lemwót bè yóm snulat le bè Sulat Dwata, hol lómón ke là matayen. ⁹ Bong ke Libay kun, yóm tau gónó le gu semfu yó kem tau gel ma yóm gesfoloen, bè yóm keblay Abraham ke Mélkésédék yóm kun bad ebè Dwata, hol lómón ke Libay snéen yóm bemlay, ¹⁰ abay se bè yóm kdaw keslong Mélkésédék ke Abraham, hnikót he ke Libay kun, là dengen tau he. Tolo nô lem lówó Abraham, yóm tau gónón gu semfu. ¹¹ Bè yóm kdaw tehe keblay Dwata yó kem hlauhen bè yó kem tau Israél, yó hol hogoten du yó kem tau semfu gu bè Libay. Ke deng tehe gulit kogot le du, là kô tenles Dwata kul. Okóm là gulit le. Yó gónó Dwata mélék yóm sotuhen, yóm mkél bè Mélkésédék. Là néléken du yóm mkél ke Aron, yóm semfu gu bè Libay. ¹² Bè yóm ketles Dwata du yóm tau mò blóng le ebéléen, tenlesen snéen yóm hlau tehe gna hloloen kul. ¹³ Ne yóm gónó tekuy mogot, yóm tau tles nélék Dwata, là semfuhen gu bè Libay, Tólóng se kun gónó gu semfu. Ne bè yóm gónón gu semfu yó, laen dù bélê le nélék mò blóng le ebè Dwata. ¹⁴ Bong bè yóm gónó tekuy mogot, tódô kdéen tau se temngón du yóm kesfuhen gu bè Juda. Bè yóm tehe gel kehlau Musis yó kem tau mò blóng le ebè Dwata ekni, laen kô dù monen bè yó kem kun sfu Juda. ¹⁵ Tey mahil dmilô du yóm deng ketles Dwata du yóm kdéen, abay se deng sut ne yóm sotu tau mkél ke Mélkésédék mò fen gel blóng tekuy ebè Dwata. ¹⁶ Yóm keseblóngen yó, là lemwóten bè yóm kun kesfu gónó le mélék du, okóm yó gónó Dwata mélék du, abay se tey kfasangen lemwót bè yóm klaen dù sónen yóm klowilen. ¹⁷ Yakà wen yóm tehe mon Dwata bè Sulaten, monen, “Uu se yóm fen hol blóng tau ebéléu, ne laen kô tul sónen yóm kmoem du, hol lómón yóm tehe keseblóng Mélkésédék yó kem tau ebéléu ekni.” ¹⁸ Duhen yó, deng tenles Dwata yóm tehe gna hloloen kul tganay, abay se laen dù nefeten, là gbeken tmóbóng kem tau. ¹⁹ Yó gónó Dwata temles du, abay se yóm hlau Musis yó, là gbeken hgulit tekuy. Bede tey hyu yóm tles Dwata du. Deng wen ne lan nmoen gónó tekuy gehloni ebéléen, duhen yó se hol nefet nawa tekuy ni kmoen ni. ²⁰ Ne sotuhen, bè yóm tehe kélék Dwata ke Jisas mò blóng tekuy ebéléen, hmungen du se yóm kun boluy mò hemget du. Okóm yó kem tau tehe gna gel blóngen, là hmungen du kul yóm kun boluy. ²¹ Tey mget yóm tehe udél Dwata ebè Jisas ekni, yóm monen, “Ou se gónóm mogot, ni hol fasadu kóm, ne là kóen megetles nim fasadu kóm ni: Uu se yóm fen hol blóng tau ebéléu, ne laen kô tul sónen yóm kmoem du.” ²² Duhen yó, lemwót bè yóm deng fasad Dwata ke Jisas yó, yó se gónóhen alì hyu yóm nmò Jisas mò lan tekuy hloni ebè Dwata. ²³ Wen sotu gónón stólóng yóm ke Jisas ne yóm gnan. Yó kem dumu tau mò blóng le ebè Dwata ekni, tey le wadag, abay se matay le se kul, là gfuhen yóm nmò le. ²⁴ Okóm tólóng yó dum ke Jisas, abay se laen dù tul katayen. Tódô hlós yóm kun keseblóng tau ebè Dwata, laen dù tau mò tlesen. ²⁵ Duhen yó, ke hlan tekuy béléen yóm kehloni tekuy ebè Dwata,nô kihu kdaw tekuy tô mò du, hol là gbeken du ke là lenwaen tekuy gu lem hatay. Lemwót bè yóm kun là katay, yó gónón là skó yóm knihen tóbóng bè Dwata bélê tekuy. ²⁶ Duhen yó, Jisas se yóm mò blóng tekuy ebè Dwata, yóm hol hulung tmóbóng tekuy. Tey kólósen. Laen kô dù sidek duhen ke salà ton tekuy béléen, Deng sentólóng Dwata bè yó kem tau gemsalà, ne tey kehegetahen du ditu bè longit. ²⁷ Là kóen na a mkél bè yó kem dumu tau tehe gel blóng le ebè Dwata. Ke bélê le kul, sal gel wen dsù le ket kdaw. Tanay gónó le gel demsù bè yóm kul salà, omin le tmodol demsù bè salà yó kem dumu tau. Okóm là ke Jisas kun. Tek suléken demsù, bede yó dsuen, kun lówó. Yóm kun kedsù yó, laen kô bud seefen. ²⁸ Yóm tau tehe gel nélék le mò blóng le ebè Dwata, gel lolò le yóm hlau Musis. Bede sal wen gónó le là gulit yó kem tau nélék le yó. Okóm wen fasad Dwata tekuy tukô huli yóm hlau Musis, bud hlanen bè yóm boluyen mò hemget du. Lemwót bè yóm fasaden tekuy yó, yó gónón mélék yóm hol Ngaen mò fen blóng tekuy ebéléen. Yóm Ngaen yó, laen kô dù gónón là gulit bè yóm keseblóngen tekuy ebè Dwata, ne laen dù tul sónen snéen yóm kguliten yó.