¹ Hol bê ye abay nmò sónen yóm kuy kesbong nawa, yakà deng ye baling setwoli ne lemwót bè kehtahu ye. ² Hol gel hnódó ye ke wen tau milo sut bélê ye. Deng wen se tau mò du, bede là tngónen du yóm hnódóhen, anì monem, hógów Dwata gu bè longit. ³ Bê ye abay klifót tmóbóng kul yó kem dumu ye geblanggù. Hol lómón kegnóm ye du dé, lómón ke yu yóm geblanggù. Ne yó kem dumu ye deng glayam, bê ye abay klifót tmóbóng kul. Hol lómón kegnóm ye du, lómón ke yu yóm deng glayam. ⁴ Ke sok deng syehen yóm tau, hol nadat tekuy sen yóm kul kesyehen yó, bê abay kneyek lu. Ne ke deng wen yehen tekuy, hol bê tekuy abay ndà. Tnafak Dwata yóm tau smamuk ne yóm tau ndaen yehenen. ⁵ Béen són bè filak gónón nô nawa tekuy. Yake tódô gsengel nawa tekuy bè kihu nô bélê tekuy. Yakà deng wen tehe mon Dwata, monen, “Là kô naw e tnagak kóm. Là kô naw e tódô bayà kóm.” ⁶ Duhen yó, là kóen layab ke mon tekuy, “Dwata se yóm gel tmóbóng do, laen kô bang gónóhu likò. Laen kô dù gmò le béléu yó kem dumu tau.” ⁷ Gel hentulón ye nawa yó kem tau tehe gónó ye galak, yó kem fen tehe gel tmolok kuy yóm Udél Dwata. Hol hendem ye yóm kmò kwit le ktau le efet katay le, ne hol dnalang ye yóm kehtahu le bè Dwata. ⁸ Yóm Jisas Krays, là kóen megetles, lemwót bè kbuten efet kól bè sónen. ⁹ Bê ye abay gmung bè yó kem tolok sekban, kô niten yu hetlas bè yóm tahu lan. Laen kô dumu hembegel du yóm kehtahu tekuy, tek són yóm kun tóbóng Dwata. Là kóen lemwót bè yóm dê hlii le tekuy bè ken. Yó kem tau lemolò du yóm yó, balù udì ke wen tóbóngen kul bè yóm kehtahu le. ¹⁰ Deng wen se mdengen dsù tekuy yóm kdê tekuy deng hemtahu bè Jisas. Okóm yó kem Ju gel demsù bè yóm kul gónô gel demsù, laen dù kwalis le mken du kul yóm dsù tekuy yó. ¹¹ Bè yóm kul gel kedsù mò hkó salà le, lemwót yóm litô yóm ógóf hnatay le, nwit yóm hol geta bè yó kem tau gel demsù elem tum Dfél gónóhen nô Dwata. Bong bè yóm lówó yóm ógóf deng hnatay le yó, dnutung le ditu bè lewà yóm benwu le. ¹² Yó gónóm mon, bè yóm katay Jisas, matay ditu bè lewà yóm benwu le. Hamaen litóen mò hkó salà yó kem tau. ¹³ Duhen yó, tódô tekuy hlós ebéléen ditu bè lewà anì gbót tekuy bè yóm tey kyaken. ¹⁴ Abay se nim benwu gónó tekuy nô ni, olo hlunen. Wen he yóm hol tahu benwu ditu bè longit, ne yó se hendón nangat tekuy ni kmoen ni. ¹⁵ Duhen yó, bê tekuy nmò sónen yóm kdóyón tekuy ke Dwata hlan tekuy bè Jisas, ne hol tulón tekuy bè kem dumu tau Jisas se yóm gónó tekuy mogot. Ni se mò henged dsù tekuy ebè Dwata. ¹⁶ Ne bê tekuy abay klifót yóm ktilob kmò tekuy bè kem dumu tekuy tau ne yóm gel kestóbóng tekuy, abay se ni se mò henged dsù gónón hyu nawa Dwata. ¹⁷ Hol gel nimón ye yó kem tau gónó ye galak bè kehtahu ye, ne hol lolò ye yóm hlolò le kuy. Yakà lu du yóm tendo semflós tmanud kuy, abay se yóm ktanud le kuy yó angat snólók Dwata bélê le. Ke nimón ye lu, yó se gónón lingas nawa le mò nmò lem blóng ye. Okóm ke là, mom dalil gónón blat nawa le, ne laen se kô dù uléken yóm nmò le lem blóng ye. ¹⁸ Hol gel utóm ye mi bè Dwata. Tódô tngón Dwata se ke deng wen blóng me ebéléen. Tey gel kesgalu me du anì laen dù tlek belenen yóm gel nmò me. ¹⁹ Bê ye senkas gel mni béléu anì géhél wen lanu bud mulék ebélê ye. ²⁰ - ²¹ Deng hlowil Dwata yóm gónó tekuy mogot Jisas. Lemwót bè yóm katayen bélê tekuy yó, hol lómón ke du yóm hol geta bè yó kem semgyok ubiha, ne tekuy se yóm hol sen‑gyoken. Yóm litô hamaen bélê tekuy, yó se hol hemget du yóm lomi lan nmò Dwata mò lan tau ebéléen, ne laen kô sónen yóm lan nmoen yó. Yó hem Dwata gónón lemwót yóm kenek nawa tekuy hol tmóbóng kuy anì gbek ye mò du yóm kun kóyô. Ne bud du se hembaling tekuy kem tau mò hol hefligal du hlanen bè Jisas Krays. Hol bê tekuy abay nmò sónen yóm kdóyón tekuy ke Krays. ²² Ó kem do dumu setwoli, hol hanay ye nawa ye hmungol du nim udélu mò gemduf kuy ni, yakem tahà se nim sulatu ni. ²³ Sotu bud nóyô hetngónu kuy. Yóm Timuti, dumu tekuy setwoli, lomi hewà gu lem blanggù se kun. Ke géhél kól dini, hlós bud nitu bè yóm kógówu edyó bélê ye. ²⁴ Hol hgefet ye do bè yóm kdéen malak kuy bè yó, ne bè kdê yó kem kun tau Dwata bè yó yóm gel kólóm me kul. Dalang se ni kem tau hemtahu bè ni bè benwu Itali, tey gel kólóm le kuy. ²⁵ Yó ne kóó. Dwata he hol tmóbóng kuy.