¹ Ominen smólók ke Stéfén yóm tau hol geta bè yó kem gel demsù ebè Dwata, monen, “Tahu kô nim delem le kóm ni?” ² Omin Stéfén malà du, monen, “Yu kem dumuhu setwoli ne kem mau, hol hnungol ye nim tulónu kuy ni. Yóm hanà tehe yu he tganay, tódô hegfan ebè yóm gna tao tekuy Abraham yóm Dwata hol geta bè kdéen. Bè yóm kudél Dwata ebéléen yó, tolo nô bè Misuputamya he Abraham, là dengen mogow ebè Haran. ³ Yó mon Dwata mò du, monen, ‘Tnagakem kem tuhahem ne yó kem dumuhem setwoli dalang se nim benwuhem ni, milihi ebè yóm benwu angat toloku kóm.’ ⁴ Ne tahu se, mdó bè yó Abraham, ne mogow ebè Haran. Kogol yóm katay maen, yó he bud khili Dwata du ebè nim benwu gónó tekuy nô ni. ⁵ Okóm yóm benwu gónó Dwata e hili ke Abraham ni,” mon Stéfén, “balù udì ke wen tonok blayen du ke mò hol kun. Okóm deng fasad Dwata du yóm klamangen, dalang se yó kem tugod gu béléen. Okóm yóm kdaw kfasad Dwata du ke Abraham nim ni, laen kô deng ngà Abraham he. ⁶ Yó udél Dwata ebéléen, monen, ‘Yó kem angat tugodem, angat fat latu halayen kegen le geklifen bè yóm benwu là kul benwu du, ne tey le meflayam bè yó. ⁷ Okóm angat tnafaku yó kem tau hmayam hemsidek kul yó, ne kogolen bè yó, angat wen lanu hegewa yó kem tugodem bè yóm benwu yó, ne bè nim benwu deng fasadu kóm ni angat gónó le tmaba dou.’ ⁸ Ne wen hlolò Dwata ke Abraham, duhen yóm kehtulì mò ilô yóm deng kesfasad le. Ne tahu se, mngà Abraham, duhen Isak. Timbow deng wolu kdawen sut,” mon Stéfén, “tnulì Abraham yóm ngaen. Ne timbow mngà se ke Isak, duhen Jakub, ne bud tnulì Isak se kun. Timbow mngà se ke Jakub, duhen yó kem sfolò lewu logi, ne bud gotu tnulì Jakub lu. Lu se yó kem tehe gna tao tekuy kat tótól. ⁹ Okóm,” mon Stéfén, “yó kem tau setwoli yó, deng mom mélés nawa le yóm twoli bélê le boluyen Jusif, tódô gmung le hembalù du mò hesek ditu bè Idyip. Okóm tendo eles mung du Dwata, ¹⁰ ne lenwaen bè yó kem tey dê gónón glayam bè yó. Bè yóm kdaw kehdà le ke Jusif bè solu yóm tau hol geta bè Idyip, wen tey kehyu nawa blay Dwata du, ne yóm khulung hedem. Lemwót yóm tau hol geta yó, tódô nmoen Jusif gubérnor bè klamangen Idyip, ne hogoten du yóm kdéen tau mò nmò bè gónóen. ¹¹ Ne timbow kogolen bè yó,” mon Stéfén, “ne e msut yóm tey bitil bong. Tódô lenngeben klamangen benwu Idyip, dalang se bè Kanan. Tey keglayam kem tau. Laen dù bang gónó le ma ken yó kem tehe gna tao tekuy. ¹² Timbow geklingu Jakub yóm kwen ken bè Idyip, yó gónóhen mdók yó kem ngaen, duhen yó kem tehe gna tao tekuy, etu na a bemli ken. Yó se hol tanay kógów le ebè Idyip. ¹³ Bè yóm gewu le dulék mógów, hdilô Jusif bè yó kem twoguhen. Ne yó he ketngónen du yóm tau hol geta bè Idyip yó kem fes lówó Jusif. ¹⁴ Omin Jusif ne e tminok ke maen anì mógów se kun ebè Idyip kkólen bè yó kem fes lówóhen, hitu folò limu kwen le. ¹⁵ Tahu se, gotu kde le mógów ebè Idyip, ne ditu gónón hlós matay Jakub, kólen bè yó kem ngaen. ¹⁶ Okóm,” mon Stéfén, “là hlós lebeng le kul bè yó. Bud na le e lebeng lu ditu bè Sékém, bè yóm benwu tehe fasad Dwata ke Abraham. Sù le lu ebè yóm sol tehe benli Abraham filak bè yó kem tehe ngà Hamur mò gónó lembeng. ¹⁷ 17Bè yóm deng klonihen bè yóm kdaw kdengen yóm tehe fasad Dwata ke Abraham bè yóm kehewaen kul gu bè Idyip,” mon Stéfén, “deng le tey wen ne yó kem tehe gna tao tekuy yó. ¹⁸ Bè yóm kdaw yó, tólóng tau ne geta bè Idyip, ne là kô tngónen ke Jusif kun. ¹⁹ Yóm tau hol geta yó, tnistingen yó kem tehe fù tekuy, ne tey kehlayamen kul. Wen udin nmoen bélê le anì tódô sù le lu lem bnes yó kem ngà lomi sut anì matay le. ²⁰ Yóm khéét kukumen yó,” mon Stéfén, “kulel se kun ksut yóm tehe Musis. Blaem tey ngà knóón yóm ngà yó. Tlu bulón yéen semgyok du bè gónô le. ²¹ Timbow sù le lem bnes, tódô ton yóm ngà libun yóm tau hol geta bè Idyip, ne niten ebè gónóen. Tódô lemnok béléen Musis, lómó kmoen du, lómón ke hol kun ngà. ²² Gotu hefnagien du yóm kul kmò ketngón yó kem tau Idyip. Baling tótól Musis lemwót bè khulungen mudél ne bè kehyu nmoen. ²³ Timbow deng fat folò ne halay Musis,” mon Stéfén, “yó nmoen, nauyen yó kem dumuhen tau Israél bè yóm benwu yó anì tngónen kmò klowil le. ²⁴ Bè yóm kógówen yó, geslaen yóm sotu tau Idyip hensideken yóm sotu tau Israél. Yó nmò Musis, nofinen yóm kun dumu tau Israél efet ghatayen yóm tau Idyip. ²⁵ (Ofo kun mon du ke tódô deng dilô yó kem kun dumu tau Israél yóm khógów Dwata du mò lemwà kul, okóm là kô dilô le du.) ²⁶ Tikóng deng bud hayahen bè yó, bud wen ton Musis lewu tau sfatay hono tau Israél. Yó nmò Musis kun, fen tô senfyuhen lu, yó monen, ‘Bê ye mom sfatay igoen honon yu.’ ²⁷ Okóm deng mom tuluden Musis yóm tau alì hemsidek yóm dumuhen yó koni, ne monen mò du, ‘Ilóu uu kô yóm gónó me kmulu? Ilóem uu kô mogot kukum lem blóng me? ²⁸ Tô hnatayem o kô lómón yóm khatayem yóm tau Idyip ekimel?’ ²⁹ Timbow gungol Musis yóm monen yó, tódô lemwót mlóy etu bè tólóng benwu boluyen Midyan. Ditu gónón hlós myehen, ne lewu ngaen logi. ³⁰ Timbow deng fat folò halay Musis kegenen nô ditu bè Midyan, tódô wen hógów Dwata gu bè longit hegfan béléen, bede hlingu bè dilóf ofi, tódô lemtom lem yóm ngà koyu lefungu ditu bè yóm benwu là hyu menwu du, moni bè yóm Bulul Sinay. ³¹ Bè yóm kton Musis du yóm yó, tey ketngahen. Ominen hloni edu anì minggel hol ktonen du. Ne tódô gungolen se yóm udél Dwata ebéléen gu lem yóm dilóf, ³² yó monen, ‘Ou se sana kul Dwata yó kem tehe temeem Abraham, Isak ne Jakub.’ Bè yóm kungol Musis du yóm mudél ebéléen yó, tódô setbol kkelen, bà mon tey sidek klikoen. Là kóen dog bud mlos temngel. ³³ Omin Dwata bud mon du mò du, monen, ‘Kóhem tlumfaem, abay se dengi mdà bè yóm gónón mólós, duhen yóm gónóhu nô ni.’ Tahu se, kó Musis tlumfaen. ³⁴ Bud mon Dwata mò du, ‘Deng tonu yóm alì keglayam yó kem dou tau bè Idyip, gefet béléu yóm alì tnalaw le. Yó gónóhu kemo elaan anì lenwau lu. Géhéli ne,’ mon Dwata, ‘angat hógówu uu etu bè Idyip.’ ³⁵ Nim Musis ni,” mon Stéfén, “ni se yóm tau tehe kenbê le, tehe mon le mò du, ‘Ilóu uu kô yóm gónó me kmulu? Ilóem uu kô mogot kukum lem blóng me?’ Anì monem du se yóm hógów Dwata mò mogot kul yó kem tauhen, ne mò lemwà kul. Yó tmóbóng du, duhen yóm hógów Dwata gu bè longit hlingu bè dilóf ofi bè yóm ngà koyu lefungu. ³⁶ Tahu se, Musis yóm malak kul gu bè Idyip. Tey dê hentaw ton nmoen bè Idyip, dalang se bè yóm kifal le yóm Mohin Hulô efet yóm fat folò halay le tódô lembù bè yóm benwu laen dù tau menwu du. ³⁷ Ni se yóm Musis tehe mon du mò yó kem tau Israél, ‘Angat wen bud hógów Dwata elem blóng ye lómón yóm khógówen do ni mò tmugod du ebélê ye yóm udélen. Yóm tau hógówen yó, tódô lemwót bè yóm sana kuy kwen.’ ³⁸ Nim Musis ni, du se nô lem blóng yó kem tau Israél teganay ditu bè yóm benwu laen dù tau menwu du. Tódô nô lem blóng yó kem tehe teme tekuy. Bud du se yóm tehe mógów eta yóm Bulul Sinay, ne wen hógów Dwata gu bè longit mudél ebéléen. Hlan Dwata bè Musis se yó kem hlau blayen tekuy, yóm hlau laen kô dù tul sónen. ³⁹ Okóm yó kem tehe teme tekuy tganay,” mon Stéfén, “là kô le dog móyô mimón ke Musis, deng mom senkbê le. Sónmò le bud tô móyô mulék ebè Idyip. ⁴⁰ Bè yóm igò Musis tolo golun te bulul, mon le mò ke Aron, yóm twoguhen, mon le, ‘Moi kum dé kem dwata mò malak tekuy, abay se là bud tngón tekuy du yóm Musis yu, yóm tau malak tekuy gu bè Idyip.’ ⁴¹ Tahu se, tódô le lembù mò dwata, hol lómón ke ngà safì logi kmò le du. Yó nmò le, densù le, ne mò le ken bong mò lan le madat du yóm dwata kéng nmò tdok le. ⁴² Yó gónó Dwata kmogol kul. Lemwót bè yóm kbayaen kul, deng mom yó baling hentahu le yó kem blotik. Lu se gónón e gbak yóm tehe hsulat Dwata yóm sotu tehe gna tugoden, yóm monen, ‘Yu kem tau Israél,’ mon Dwata, ‘bè yóm fat folò halay ye nô bè yóm benwu là hyu menwu du, tey ógóf wen hnatay ye mò dsù ye, okóm là kô ebéléu du gónó ye e mò du. ⁴³ Mom yó eles nwit ye yóm kun gónô yóm dwata lenbù nmò tdok ye, boluyen Molék. Dalang se yóm blotik nmò ye mò ilô yóm sotu dwata boluyen Rifan, bud yó tendo eles nwit ye. Hono dwata lenbù nmò tdok yóm gel tnaba ye. Lemwót bè yóm gel nmò ye yó,’ mon Dwata, ‘angat ye gomong kanfu mayuk etu sentu yóm benwu Babilun.’ ⁴⁴ Okóm,” mon Stéfén, “bè yóm tolo knô le bè yóm benwu laen dù tau menwu du, wen snéen gónô gónó Dwata nô lem blóng le tehe gel nit le. Tehe hmò Dwata kul yóm gónóen yó, gotu tulónen ke Musis yóm mò angat kmò le du, hyu hegfanen béléen yóm mò kmoen du. ⁴⁵ Bè yóm gónô tehe hmò Dwata kul yó, hlós tendo gel nwit yó kem lugod le. Bè yóm katay Musis, Juswa tles bud malak yó kem tehe teme tekuy ebè yóm benwu tehe blay Dwata kul. Eles tukô gna kul se Dwata, ne gotu hdóhen yó kem tau menwu ta yóm benwu gónón e malak kul yó. Bè yóm klawi le nô bè yóm benwu yó, eles tendo gel mdà lem blóng le se yóm Gónô Dwata yó efet kól bè yóm kun kdaw Dabid. ⁴⁶ Tey kehyu nawa Dwata ebè Dabid. Yó tô hni Dabid bè Dwata ke hemdà yóm tahu gónô mò gónóhen nô lem blóng le, yóm Dwata sana kun Dwata Jakub, yóm tehe temeen. Okóm là hlus Dwata du béléen. ⁴⁷ 47Deng mom Selumun, yóm sotu ngà Dabid, fen hemdà du yóm gónô yó. ⁴⁸ Okóm,” mon Stéfén, “là kóen nô lem gónô nmò tau yóm Dwata, yóm hol geta bè kdéen. Wen tehe hsulaten yóm sotu tehe tugoden ekni, monen, ⁴⁹ ‘Longit se gónóhu myón kmukum, mon Dwata, ne tonok yóm gónóhu hmótól tihu. Gónô du de tô hdà ye béléu?Gónó ye tô hemdà du de yóm gónô gónóhu angat nô yó? ⁵⁰ Igò sem ou du deng tehe mò du yóm kdéen ton.’ ” ⁵¹ Henlós Stéfén kudélen, monen, “Tey bong mgel kulu ye yóm yu. Là kóen nô bè nawa ye yóm kimón ye ke Dwata. Là kô dog hnungol ye du yóm udél Dwata, mo ye mom hbokong. Hol ye mkél bè yó kem tehe teme ye tganay. Ke wen tô tulónen kul yóm Tulus Dwata, deng mom nseng le klingu le. ⁵² Tulón ye do kun,” mon Stéfén, “ke wen sotu tehe tugod Dwata là deng tehe kem tehe teme tekuy du teganay. Sal tehe gel hnatay le yó kem tau hógów Dwata, yó kem tau tehe gel tmulón yóm angat ksut yóm tau tedeng hógów Dwata. Ne deng sut se yóm hógów Dwata yó, duhentu sem le eted ye elem tdok yó kem tau mogot kukum. Yu se yóm fen le hbonok du. ⁵³ Igoen yu se gónó Dwata e bemlay du yóm kun hlau, yóm hlau tehe hlanen bè yó kem hógówen gu bè longit. Okóm,” mon Stéfén, “là kô dog nimón ye du.” ⁵⁴ Kogol yóm kudél Stéfén ebè yó kem tau hol geta mogot kukum, ya tey sidek kebut le du, sónmò le semteken beeng le. ⁵⁵ Okóm ke Stéfén kun, tódô nô béléen yóm Tulus Dwata. Ne temngel ebè longit, tódô tonen yóm tey keslinang Dwata, ne tonen se Jisas mdà bè kwanan Dwata. ⁵⁶ Mon Stéfén mò kul, “Tenngel ye dé. Tódô hnas longit. Tu dé yóm Ngà Tau mdà bè kwanan Dwata.” ⁵⁷ 57Bè yóm kungol le du yóm udél Stéfén yó, tódô nseng le klingu le yó kem tau hol geta mogot kukum yó, tódô le gotu hetê demlu ebéléen. ⁵⁸ Omin le semsogot du, ne senkteng le mayuk gu bè yóm benwu le yó, tódô hnatay sentudà le botu. Yó kem tau semtudà du botu yó koni, gotu nlus le kgal le, ne tebel le bè yóm sotu tau lomi lemnok boluyen Sol anì mò mentey du. ⁵⁹ Yóm igò le semtudà ke Stéfén botu, tmaba ebè Jisas, monen, “Ó Jisas yóm dou gónó mogot, hogotu kóm ne klowilu.” ⁶⁰ Tuden bukolen ne bud hgelen udélen, monen, “Ó Mà bè Longit, béem dog snolò bélê le ne yóm salà nmò le ni.” Kogol yóm kmonen du yó, ominen milot nawahen.