¹ Sotu kdaw bè yó, deng telu uras kimel, lemwót le Pitér lewu le Jan mógów le ebè yóm Gónô Dwata. Yó se yóm sana gel kmò kdaw na le e gel kni bè Dwata. ² Yóm deng kkól le bè yó, tódô ton le yóm sotu tau kihod myón kelohok yóm sotu bakdol bè Gónô Dwata boluy le du Tikeb Tilob. Nim tau kihod ni, kihod mung bè kesuten. Tódô ket kdaw le mit du bè yó anì gel temfólól mni filak bè yó kem tau gel mógów elem Gónô Dwata. ³ Timbow tonen Pitér ne Jan mlan bè yó, tódô temfólól mni filak bélê le. ⁴ Tódô le temngel ebéléen, ne mon Pitér se mò du, “Hol tenngelem mi dé.” ⁵ Tahu se, hmunu ebélê le, ofo kun ke wen belay le du. ⁶ Okóm mon Pitér mò du, monen, “Laen dù filaku dou, okóm yóm gónóhu wen, yó se blayu kóm. Lemwót bè kun boluy Jisas Krays, yóm tau lemwót bè Nasarit, gónóhu mon du mò kóm, meda e mógówi.” ⁷ Omin Pitér mogot du bè sigel kwananen yóm tau kihod yó anì mdà. Tahu se, tódô sen senlomongen se wen kgis gu lem tihen ne gu lem sokilen. ⁸ Kendel hebetik medà yóm tau yó, ne tódô tedeng kógówen. Ominen mung kul le Pitér ne Jan elem Gónô Dwata. Yóm igoen mógów, sónmoen hekak, ya tey kdóyónen ke Dwata. ⁹ Yó kem tau bè yó, gotu ton le yóm deng kógówen ne yóm kdóyónen ke Dwata. ¹⁰ Timbow deng dilô le du se yóm tau tehe kihod gel temfólól meyón bè bak yóm bakdol, ya tey sidek ketenga le. ¹¹ Omin le Pitér lewu le Jan, helós ebè yóm gónô hegolung tehe Selumun, igoen tendo mogot bélê le yóm tau tehe kihod yó. Ya tey ketnga yó kem dumu tau meton kul, tódô le gotu sguku melóy ebélê le. ¹² Timbow ton Pitér yó kem tey tau segemong ebélê le yó, ominen mon du mò kul, “Ó kem dumuhu tau Israél, moen de ke kat hentaw ye yóm deng kegógów nim tau tehe kihod ni? Mò ye kat hemtaw temngel kum du? Ilóem ofo kuy kô ke lemwót bè kum kegebek yóm kmò me du nim ni, duhen ke lemwót bè kum keheyu kmò? Là kô yó du. ¹³ Ni se nmò yóm Dwata gónó le hemtahu yó kem tehe fù tekuy teganay, le Abraham ne Isak ne Jakub. Hlanen bè Jisas yóm kmoen du, yóm tau tehe hógówen, yóm deng kat hegetahen ni kmoen ni. Okóm du se yóm deng eted ye elem tedok yó kem tau mogot kukum. Tey kesekebê ye du bè solu Paylét, igò Paylét tô móyô hefewà du. ¹⁴ Nim Jisas ni, du se yóm tau laen kô dù bolen yóm kmoen, hono hyu. Okóm deng mem senkebê ye, ne deng mem yó heni ye bè Paylét yóm tau monok anì hefewaen. ¹⁵ Deng mem hefatay ye yóm gónón gu lemwot yóm klowil laen dù sónen, okóm deng bud hlowil Dwata. Mi se hol gebentey du yóm deng bud klowilen. ¹⁶ Tódô lemwót bè kfasang yóm kun boluy gónón baling wen kegisen medà nim tau ni. Deng hónô tengón ye yóm tehe kekihoden, ne deng ton ye snéen yóm deng kkóhen, hlan me bè boluy Jisas. Tódô lemwót bè kehetahu me bè Jisas gónón bud baling hyu nim tau ni. Deng gotu ton ye se nim ni. ¹⁷ Tengónu se, kem dumuhu setwoli,” mon Pitér, “tódô óyô ye mò du bè Jisas yóm nmò ye béléen, là kô tengón ye du. Dalang se yó kem gónó tekuy galak, là kô tngón le du se kul. ¹⁸ Okóm bè yóm keglayam Jisas yó, yó se yóm deng tehe eles hetugod Dwata bè kdê yó kem tehe tugoden teganay, yóm mon le, ‘Nen glayam he yóm Misaya.’ ¹⁹ Duhen yó,” mon Pitér, “hegsel ye ne bè yóm sidek deng gel nmò ye. Semfulék ye ebè Dwata dé anì henifóten yó kem salà ye. Ke ni se nmò ye, ²⁰ tenóbóng Dwata yu se anì mulék hyu yóm kehtahu ye. Ne enget bud hesfuléken edini Jisas, abay se du yóm Misaya, yóm deng tehe néléken mò mogot tekuy. ²¹ Okóm nan nô bè longit he efet deng heto yóm kedaw bud kehelomi Dwata kdê yó kem deng tehe nmoen. Yó se yóm tehe tulónen teganay hlanen bè yó kem tehe tugoden. ²² Yake deng wen yóm tehe mon Musis teganay, yó monen, ‘Enget wen bud hógów Dwata elem blóng ye, yóm Dwata hol gónó tekuy mogot, lómón yóm khógówen dou ni, mò temugod du ebélê ye yóm udélen. Yóm tau engett hógówen yó, tódô lemwót bè yóm sana kuy kwen. Hol nimón ye yóm kdê tulónen kuy. ²³ Yó se tau là mimón du yóm tugod Dwata yó, tódô kó ye bè kem kun tau Dwata ne tódô henatay ye.’ ” ²⁴ Henlós Pitér mudél, monen, “Bud senged se yó kem dumu tugod Dwata teganay. Lemwót bè Samwél kól bè yó kem temodol huli du, sa gel wen tulón le yóm kdê le gebak ebè yóm deng nmò Dwata nim kmoen ni. ²⁵ Deng tehe wen fasad Dwata ebè yó kem fù tekuy hlanen bè yó kem tehe gena tugoden. Là són du ebè yó kem tehe teme tekuy gónó Dwata femasad du yóm yó, gomong tekuy lemen snéen kut. Yó mon Dwata mò ke Abraham teganay, monen, ‘Enget hlanu bè yóm semfu gu béléem yóm enget ketóbóngu kedéen tau talak tonok.’ i ²⁶ Duhen yó,” mon Pitér, “deng nélék Dwata Jisas mò hógówen. Deng gna hógówen elem blóng tekuy mò tmóbóng tekuy, yóm ket tekuy ne sotu, anì kenogol tekuy yó kem sidek gel nmò tekuy.”