¹ Yó ne, deng gefet bè yó kem tau tehe deng nélék Jisas dalang se bè yó kem dumu Ju hemtahu bè klamangen prubinsya Judiya yóm deng kegbót le hemtahu du yóm Udél Dwata yó kem tau là Ju le. ² Bè yóm deng kkól Pitér bè Jirusalim, tey kudél le du yó kem dumuhen hemtahu tolo tey mlom klolò le yóm hlau Musis. ³ Yó mon le, “Moen de ke dengi mom motun bè gónô yó kem tau là Ju le, ne dengi mom todo segbót kul mken?” ⁴ Yó gónó Pitér gotu tmutul du bélê le yóm kdéen lemwót bè kbuten, monen, ⁵ “Bè yóm hanà knóu bè syudad Jupa he, yó nmou mnihe bè Dwata. Ne tódô wen hegfan Dwata béléu. Tódô tonu yóm lómón tô kumù bong hloyol ebéléu gu bè longit, hol lómón ke wen mogot du bè sfatà kililen. ⁶ Ne bè yóm ketngelu elemen, ne tódô tonu yó kem tey ógóf wen nô lemen, yó kem ógóf tnomò tau, ne ógóf lem bnes, ne yó kem mulu te tonok, dalang se onuk koyu. ⁷ Ne wen udél gungolu, monen mò do, ‘Ni Pitér, nam e hnatayem lu mò utónem.’ ⁸ Okóm mom yó balau du, monu, ‘Bée. Bè klawihu tau, là kô deng glemegu du ni kem ni, abay se là hyuhen bè kum hlau.’ ⁹ Bud monen se mò do yóm mudél gu bè longit yó koni, monen, ‘Béem fen tô mon là hyuhen yóm deng mon Dwata hyu mken du.’ ¹⁰ Botong tlu duléken mudél ebéléu yóm mudél yó koni,” mon Pitér, “ominen tódô bud haway ebè longit se yóm hloyol yó. ¹¹ Segeng bè yóm ktonu du yó, gefet le se bè yóm gónô gónóhu nô yó kem tlu tau dók Kurnilyus lemwót bè syudad Seseriya. ¹² Ne tódô mudél ebéléu yóm Tulus Dwata, monen, ‘Béem hegewu nawam mung kul yó kem tau mangay kóm.’ Tahu se, munge kul. Ni kem nem tau hemtahu lemwót bè Jupa nii mung do etu bè Seseriya. Timbow me kól ditu, husek me bè gónô Kurnilyus. ¹³ Gotu tulón Kurnilyus kum yóm kwen hógów Dwata gu bè longit tódô sut bè gónóen. Yó udél yóm hógów Dwata, monen, ‘Mdóki tau ebè Jupa nam e nangay yóm sotu tau boluyen Simun Pitér. ¹⁴ Wen tulónen kóm mò gónóhem gewà gu lem hatay, kkólen bè yó kem fes lówóhem.’ Ni se,” mon Pitér, “tulón Kurnilyus kum. ¹⁵ Tikóng nbutu mudél ebélê le, tódô sut bélê le se yóm Tulus Dwata, lómón se yóm tehe tanay kmò ksuten bélê tekuy. ¹⁶ Ne gtulón bè nawahu se yóm tehe mon Jisas yóm gónó tekuy mogot, yóm monen, ‘Bong ke Jan kun, él ge babtaysen kem tau. Okóm ke Dwata kun, yó kmò kbabtaysen kuy, tódô suen bélê ye yóm kun Tulus.’ ¹⁷ Ne tahu se,” nemo Pitér, “tey mdengen keblay Dwata du yó kem tau là Ju le yóm kun Tulus, hol lómón se yóm keblayen du tekuy bè yóm kehtahu tekuy bè yóm gónó tekuy mogot. Ke yó se yóm nmò Dwata, mau do de tô hemseng yóm kun nemò?” ¹⁸ Timbow deng gotu gungol le yóm tulón Pitér yó koni, tódô laen kô dù bud sfuhen yóm kudél le du. Deng mem baling dóyón le Dwata, mon le, “Tahu se, deng homong Dwata lu se kue yó kem tau là Ju le anì hegsel le, ne anì guta le yóm klowil laen dù sónen.” ¹⁹ Yó kem tau hemtahu tehe sekela lemwót bè yóm khatay le ke Stéfén, wen se bélê le gefet bè prubinsya Funisya, ne wen se ebè Siprus, yóm sotu hungul benwu nô te mohin. Ne wen bélê le gefet ditu bè syudad Antyok. Sal gel tulón le yóm Tulón Hyu, okóm són olo tnulón le yó kem ku dumu Ju. ²⁰ Okóm wen se bè yó kem dumu tau hemtahu lemwót bè Siprus ne bè syudad Sayrin, mógów le bè Antyok se ku, ne gbót tnulón le yó kem tau là Ju le yóm Tulón Hyu gebak ebè Jisas yóm gónó le mogot. ²¹ Ne nô bélê le yóm kun kfasang yóm gónó le mogot, ne tey dê bè yó kem tau bè yó hemtahu du yóm tulón le, ne baling le tau lemolò ke Jisas. ²² Timbow gungol yó kem tau hemtahu bè Jirusalim nim ni, yó gónó le e hógów ke Barnabas etu bè Antyok. ²³ Timbow kól bè yó, ya tey kehyu nawahen yóm ktonen yóm któbóng Dwata ku. Ge gendufen lu anì hol le hetenuf, ne là monol nawa le ebè yóm gónó le mogot. ²⁴ Nim Barnabas ni, tey tau hyu knawahen, sónmoen tendo galak bè Tulus Dwata, ne tey nelem kehtahuhen. Bè yóm ktoloken bè yó, sónmoen se tendo temnù yó kem tau hemtahu bè yóm gónóhen mogot. ²⁵ Kewót Barnabas bè yó, nen e hnebel Sol bè syudad Tarsus. ²⁶ Timbow tonen, nwiten ebè Antyok. Botong sfalay le nô bè yó na a tmolok bè yó kem tau deng hemtahu bè yó. Bè Antyok se tanay gónó le moluy ku Kristyan yó kem tau hemtahu. ²⁷ Sotu kdaw bè yó wen kem tau tugod Dwata gdek bè Antyok lemwót gu bè Jirusalim. ²⁸ Sotu bélê le boluyen Agabus, tódô mdà lem blóng le, wen tulónen ku mlan bè kun kfasang yóm Tulus Dwata. Yó tulónen, móyón mbel tey bitil bong bè klamangen benwu. (Tahu se, bè yóm tolo kun kogot bè Rom Klodyus, deng tódô uliten bè yóm deng eles tulón Agabus.) ²⁹ Yó nmò yó kem tau lemolò ke Jisas bè Antyok, yóm ket ku na sotu, gotu le hemwit yóm ku gbek tóbóng ebè yó kem dumu le hemtahu bè Judiya. ³⁰ Fen hewit le ku le Barnabas lewu le Sol etu bè yó kem tau malak yó kem tau hemtahu bè yó.