¹ Igpaila ko kaniyo ka kanta no sulud no si Phoebe no alagad to simbahan to Cinarya. ² To ngaran to Magbabayjo, dawata now kandan no sikan ka angay litus no oghimuwon to kaot otawan to Diyus, hoy buligi kandin to tibo no inkinaanglan din no mohon-in on so nabulig din kanak. ³ Inpangumusta a ki Pricila hoy ki Aquila no kanak no duma to pog alagad ki Kristu-Hisus. ⁴ Su inpanalig dan o ka kinabuhi dan para kanak. Koy na-an nigpasalamat a kandan hoy kono do no kanak ka nigpasalamat ko kono ka tibo no mo simbahan no kono no mo Hudiyu. ⁵ Ipangumusta a to mo tumutu-u no oglimuran diyo to baloy ran. Ipangumusta a to amana ko no sulud to si Ipinitu no iyan hun-a nigtu-u ki Kristu to lalawigan to Asia. ⁶ Ipangumusta a ki Mariya no nauna amana duma kaniyo. ⁷ Ipangumusta a ki Adruniku hoy ki Huniyas no mo duma ko no Hudiyu no napirisu duma kanak. Noilahan kandan to mo apustulis hoy nohimo no kristuhanon hun-a pad kanak. ⁸ Ipangumusta a ki Apliyatu, ka amana ko no sulud diyo to Magbabayjo. ⁹ Ipangumusta a ki Urbano no duma kanta to pog-alagad ki Kristu hoy ki Istakis no amana ko no sulud. ¹⁰ Ipangumusta a man do ki Apilis no nigmatinumanon ki Kristu ipangumusta at to lunggunan ni Aris abulu. ¹¹ Hoy ki Hirudiyun no Hudiyu iling kanak hoy to mo kristuhanon no sulud to pamilya ni Narsisu. ¹² Ipangumusta a ki Tripina hoy Triposa no nig-alagad to Magbabayjo hoy ipangumusta a ki Pirsida no dakol no himo to Magbabayjo ¹³ Ipangumusta a ki Rufu. Ka alagad to Magbabayjo hoy to inoy rin no nigdumdum kanak no iling to anak rin. ¹⁴ Ipangumusta a ki Adsincritu, Ki Fligunti, Hirmis, Ki Patrubas, Hirmas, hoy to tibo no kristuhanon no mo sulud. ¹⁵ Ipangumusta a ki Pilulugu, Ki Huliya, ki Niriyu, hoy to atuboy rin. Iling man ki Ulimpas hoy to tibo no magtutu-u no duma kandan. ¹⁶ Pangumustahay kow pinabayjo to sinulud to haruk. Nangumusta kaniyo to tibo no simbahan ni Kristu. ¹⁷ Hangyoon ko kaniyo, kamata kow likay ko to sooyjo no mo otow no ogba-ad ba-ad hoy ogsamuk kaniyo pinabayjo to kono no pogtuman to mo ogkadawat now mo ikagiyonon. ¹⁸ Su ka nighimo to soin no mo butang waro nig-alagad ki Kristu no kanta no Magbabayjo ko kono to kandan do no mo kaugalingon hanhanon ogkalimbongan dan ka doisok pad so suman-sumanon pinabayjo to mo lalag hoy pogpaminog to mo guguron no maroyjow. ¹⁹ Nahulu a tongod kaniyo so nataga man ka tibo to kaniyo no pogkabuotan. Ogkaliyag a no ogkataga kow to mo maroyjow no mo butang din waro ko nataga to mo maroot. ²⁰ No ka Diyus no bunsuran to kaawangan no ogduog ki satanas pinabayjo kaniyo. Ogduma purun kaniyo ka grasya to kanta no Magbabayjo no si Hisu-Kristu. ²¹ Nangumusta kaniyo si Timutiyu no kanak no nigbulig kanak, iling man si Lusiyu, si Jisun hoy si Susipatru no mo Hudiyu iling kanak. ²² Kanak, si Trisyu, ka inpasulat to soin, nangumusta kaniyo iling no kaniyo no duma no magtutu-u. ²³ Si Gayu no nigdawat kanak no ka baloy din inhimo no limoranan to mo magtutu-u, nangumusta da-an kaniyo iling man si Frastu, ka tisoriro to suydad hoy ka kanta no sulud no si Kwartu. ²⁴ Purun no ogpanalanginan kow to kanta no Magbabayjo no si Hisu-Kiristu. Amin. ²⁵ Sayjaon ta ka Diyus so ogmokohimo kandin to pogpahiruson to pogtu-u no, sumalo to maroyjow no lalag nu kanak mu inpanlalag no iyan ka ikagiyonon moyitongod ki Hisu-Kristu hoy sumalo to inpapitow no nahulus no kamatuoran no insugu ro no inhulus sulud to malugoy no timpu. ²⁶ Di kuntuon inpapitow no ka iyan no kamatuoran pinabayjo to mo sinulat to mo Purupita hoy no inkagi soin diyo to tibo no nasud tongod to sugu to waro katamanan no Diyus oyjow ka tibo no ogtu-u hoy ogtuman. ²⁷ Himayaon ta ka maalam no Diyus pianabayjo ki Hisu-Kiristu taman tog katamanan Amin.