¹ Ponga to soin. Nandinog ko ka nasublaan no kasamok to dakol no gurupo to mo kaotawan diyo to langit no nigkagi, “Dayjana ka Diyus! Ka kaluwasan, ka himaya hoy ka gahum kandin to kanta no Diyus! ² Tutu-u hoy matularong ka kandin no mo hukum! Su inlogparan din ka nabantug no maroot no malitan no iyan nakaroot to kalibutan pinabayjo to kandin no angkoy. Iglogparan kandin to Diyus tongod so inhimatayjan din ka mo sinugu to Diyus. ³ Nigpangiyak kandan poglibod, “Dayjana ka Diyus! Ka ubul ligkat to dakol no siyurad no nasilaban to waro katamanan! ⁴ Nanlangkob ka kawaan hoy hup at no pangulu hoy ka hup-at no kayi no hinimo hoy nigsimba to Diyus no nigpinuu to turunu. Nigkagi kandan, “Amin! Dayjanon ka Diyus! ⁵ Ligkat to turunu duon no nigkagi, “Dayjana now ka kanta no Diyus, kaniyo tibo no mo sinugu din hoy tibo no mo otow no mahaldokan to Diyus, kilaa hoy kona no kilaa! ⁶ Hoy narinog ko ka napalabihan no kasamok to dakol no otow hoy iling to sagboka no dakol no sampow hoy iling to maagbot no langog to kilat. Narinog ko ka kandan no pogkagi, “Dayjana ka Diyus so nighari ka Magbabayjo no labow no gamhanan! ⁷ Pangiyak hoy karaga ki hoy dayjanon ta ka kandin no pogkagamhanan! Su nig-uma on ka panahon to kasal to nati no karniru hoy andam on ka kandin no pangasawoon. ⁸ Inpasaluob kandin to kinabu no lino no masilow ka kaputi hoy kohinlo. Ka lino iyan ka maroyjow no hinimuwan to kaotawan to Diyus. ⁹ Hoy nigkagi ka Diwata kanak, “Isulat soin: Bulahan ka in omow to pog amot to kumbiti to kasal to nati no karniru. “Hoy nigkagi pad iyan ka Diwata, “Iyan soin ka tutu-u no mo lalagon to Diyus. ¹⁰ Hoy niglangkub a to paa din oyjow pogsimba kandin di nigkagi kandin kanak, “Kono soin himua! Sulugoanon aro iling koykow hoy to duma no iling to pogtu-u no nigpitow to mo kamatuoran no inpadayag ni Hisus. Iyan simbaha ka Diyus! Su ka kamatuoran no inpanlalag ni Hisus no iyan nigdasig to mo Purupita. ¹¹ Hoy nakita ko no natukasan ka langit hoy diyo duon maputi no kuddo. Ka nigkukuddo to soin in ngaranan to kasaligan hoy tutu-u hoy duon to matularong no nighukum kandin hoy nakig-usig. ¹² Iling to silat to hapuy ka kandin mata hoy duon mohon-in no kuruna duon to kandan no ulo. Duon nasulat kandin no ngaran hoy kandin do ka nokoila to soin. ¹³ Nalugub to langosa ka kandin kinabo hoy inngaranan kandin to “Ka lalagon to Diyus, ¹⁴ nigsundol kandin ka mo sundalo to langit no nigkukuddo to mo maputi no kuddo hoy nigkinabu to maputi hoy mahinlo no lino. ¹⁵ Niglibwas to kandin no bubu ka magalang no kampilan no oggamiton din to pogduug to kanasoran. Oghari kandin kandan to booyjo no malogot iyan hoy puguon din ka ubas duon to puguanan to kabulo to Diyus no labow no gamhanan. ¹⁶ Duon kinabo din hoy to kandin no paa nasulat ka ngaran! “Hari to mo hari hoy Magbabayjo to mo Magbabayjo. ¹⁷ Hoy nakita ko ka sagboka no Diwata no nigsasindog diyo to aldow. Inpangiyakan din ka tibo no kabajakuan no niglajang to kalamagan, “Hondoi kow hoy lilimud kow kayi para to dakol no kumbiti to Diyus. ¹⁸ Koona now ka unud to mo hari, to mo hiniral, to mo sundalo, to mo kuddo hoy to nigkukuddo to soin, to tibo no otow, uripon hoy kono no uripon, kilaa hoy kono no kilaa! ¹⁹ Hoy nakita ko ka mamang hoy ka mo hari to ingod apil ka kandan no kasundaluhan no niglimod oyjow ogpakig-usig kandan no nigkukuddo to maputi no kuddu hoy to kandin no kasundaluhan. ²⁰ Narakup ka mamang hoy ka ubaton no Purupita no nighimo to mo kabulonganan to tangkaan to mamang pinabayjo to mo kabulunganan naubatan din soikan napatikan to patik to mamang no soikan nigsimba to larawan to mamang. Ka mamang hoy ka ubaton no Purupita inbanggal no buhi diyo to linow no hapuy no nigkalab no asupri. ²¹ Ka kandan kasundalohan inpanghimatayjan pinabayjo to kampilan no niglibuwas to babu to nigkukuddo hoy inpangoon to kabayjakuan ka kandan mo unud.