¹ Nataman, nigparani kanak ka sagboka to pitu no Diwata no nangalap to yuhong hoy nigkagi, “Hondoi ka su igpapitow ku koykow ka poglogpad ogkalalag no malitan no ogpamaligyob to lawa din no nigpinnuu diyo to lungod to burga no mo woyig. ² Nokoy labot kandin ka mo Hari hoy nonowbog ka tibo no otow to kalibutan tungod to pog inom dan to binu no iyan ka agkoy rin.” ³ Na taman, in umaan ad to Ispiritu to Magbabayjo hoy in uyjag ad to Diwata diyo to mammara no ingod no kono ogkaugpaan. No duo nakita ku diyo no malitan no nig untud to malalab-lalab no mananap no makaliyas-liyas no pitu so ulu hoy sampulu so sungoy, hoy noompot nasulati to mo ngaran no ogpakabaloy-baloy to Magbabayjo. ⁴ No nigkikinabu ka malitan to kinabo no malalab so batok hoy to malalab-lalab, hoy indayjan-dayjan ka lawa rin to bulawan, mahal no mo bato hoy mo pirlas. No niggon-gon sikandin to bulawan no ubab no ponu to maligsom no hinang rin hoy maligsom no agkoy rin. ⁵ Nakasulat diyo to bukod din ka ngaran no maralom so kaluwasan. “Mabantog no Babilunya, inoy to tibo no malitan no ogpamaligya to lawa, hoy tibo ligkat to maligsom no mohinang to kalibutan. ⁶ No nakita ko no nowubog ka malitan to pogkita ku kandin. ⁷ Nokoy naan inkagiyan a to Diwata “Maniyo to noinu-inu ka? Ing-nangonan ko sikoykow ko nokoy-a ka maralom no kaluwasan moyitongod to malitan hoy to in-untaran din no makaliyas-liyas no mananap no pitu so ulu hoy sampulu so sungoy. ⁸ Ka makaliyas-liyas no mananap no nakita nu, manokal pad mando nokoy naan nigpakimatoyon kuntoon. No magaan o sikandin oglihawang puun to tibu no waro tamanan oyjow ogdorooton on iyan ka tibo no otow no waro nakasulat so mo ngaran diyo to libru to kinabuhi bunsod pad to pighimu to kalibutan, ogkoinu-inu ko ogkakita ran o ka makaliyas-liyas no mananap no manokal pad mando hoy nigpakatoy o kuntoo, nokoy naan oglibod dod man-o. ⁹ Kinangolan to katuonan ka pogsabot kayi ka pitu no ulu iyan sikan ka pitu no bubungan no nigpinnuuwan to malitan, hoy nigpasabot dod ma sooyjo to pitu no hari. ¹⁰ No nammatoy o ka lalimma no hari hoy iyan nighari kuntoo ka igkoon-om, hoy waro pad nighinguma ka igkapitu. No omun ko oghingumo o sikandin, kinangolan no kono do sikandin ogkalugoy. ¹¹ Ka makaliyas-liyas no mananap no manokal mando nokoy naan nigpakimatoy o kuntoon, iyan ka igkawalu no hari no sagboka rod to sooyjo so pitu no hari. No ogdorootan dod iyan dodma sikandin. ¹² Ka nakita ku no sampulo no sungoy, iyan sooyjo ka sampulu no hari no waro pad inbunsod nighari. Nokoy naan ogbogayjan sikandin to katungod to poghari to songo uras do, duma to makaliyas-liyas no mananap. ¹³ Na sagboka ka suman-suman to sampulu no hari no igbogoy ran ka gahom hoy katongod dan diyo to makaliyas-liyas no mananap. ¹⁴ Ogkataman, ogpakigbunu sikandan to nati no karniru tongod su agalon sikandin to tibo no mo agalon hoy hari to tibo no mo hari, no iyan din duma ka mo matinumanon no nig ikul kandin no in alam hoy in umow to Magbabayjo.” ¹⁵ No nigkagiyan ad man-o to Diwata, “Ka buugan no woyig no nakita nu no longod to inpinnuuwan to malitan no ogpamaligyo to lawa rin, iyan ka mo otow ligkat to naloin-loin no nasud hoy linalagan. ¹⁶ Ka sampulo no sungoy hoy ka makaliyas-liyas no mananap no nakita nu, ogdumutan dan ka malitan no ogpamaligyo to lawa rin. Og agawaon dan ka tibo no diyo to kandin. Ogkoonan dan ka sapu din hoy ogtutungon dan ka samo. ¹⁷ Igpakita kita ran soin diyo to kandin su nasabuka to Magbabayjo kasuman-suman dan to poghimu to igkaroyjow din. No ligkat duo, igbugoy ran ka katongod dan to poghari diyo to makaliyas-liyas no mananap taman to ogkatuman o ka inlalag to Magbabayjo. ¹⁸ Igpakita kita ran soin diyo to kandin su nasaboka to Magbabayjo kasuman-suman dan to poghimu to igkaroyjow din. No ligkat duo, igbugoy ran ka katungod dan to poghari diyo to makaliyas-liyas no mananap taman to ogkatuman o ka inlalag to Magbabayjo.18 “No ka malitan no nakita nu iyan sikan ka ogkalalag no Siyudad no ogmando to mo Hari to entiru no kalibutan.”