¹ Hoy nakita ku ka loin no dakol hoy koin-inuwan no pitawonon diyo to langit. Nakakita ku ka pitu nu diwata no nig alap to kahaldokanan. Soini ka katapusan no kahaldokanan su katapusan soini to pogpapitow to kabolu to Diyus. ² Hoy nigkita ku ka anat bildu no dagat no duon amot no hapuy. Nigkita ko mando ka mo otow no nakaroog tambola kow hoy to larawan hoy to numiru no simbulo to ngaran. Nigsasindog kandan dapig to bildu no dagat hoy nig alap to mo Alpa no tinalad to Diyus. ³ Nigkanta kandan to kanta ni Muwisis, ka suguanon to Diyus. Hoy kanta no natin karniru, "Agalon to tibo no Nasud matarong hoy mo tutu-u no hinang no!" ⁴ Hontaw man ka kono ogkahaldok koykow. Magbabayjo hontaw man ka kono ogdayjan to pogkagoomanon nu? Koykow ro ka balaan. Ogdani hoy ogdayjan koykow ka tibo ka tibo no kanasuran. So nigkita to tibo ka maroyjow no hinang. ⁵ Natapos soini, nakita ku no naabli ka timpulu no nig ugpaan to Diyus. ⁶ Hoy nig awo diyo to timpulu ka pitu no diwata no nig alap to kahaldokan. Nigtitinabo kandan to maputi no tinabo hoy bulawan diyo to sosobon dan. ⁷ Hoy ka sagboka do to hup-at do to manokal no hinimu nig taladdo to mo diwata to pitu no bulawan no tagu-anan no naponu to kabolu to Diyus no manokal to waro katapusan. ⁸ Ka timpulu naponu to ubol no ligkat to himaya hoy goom to Diyus hoy waro ogmakasolod to timpulu taman to ogkatapus ka kahaldokan to pitu no diwata.