¹ Pogkaponga to sikan, nigkita ku ka karniru no nigsasindog diyo to bubungan to Siyun. Duma to sagboka nu gatus hoy hup-at no pulu hoy hup-at no libu (144,00) no koot-otawan nu nasulatan ka mu bukod to ngaran to nati nu karniru hoy to Amoy rin. ² No nakarinog a to lagong ligkat to langit nu ogpokoling to lugos to dakol nu sampow, hoy iling karaging to dagsang to lugong, hoy ogpokoiling man do to daging to inpangulit no mo Alpa. ³ No nangulaging kandan to bag-u no ulagingon diyo to tangkaan to trunu hoy diyo to hup-at no hinimuwan no oggoynawa hoy to mo igbuyjag. Waro loin no natuu to sooyjo no ulagingon to sooyjo to sagboka nu gatus hoy hup-at no pulu hoy hup-at no libu (144,000) no mo otow nu inlukat ligkat to kalibutan. ⁴ Kandan ka mo otow no waro nokohulid to mo malitan hoy kandan ka nigsinundul to nati to karniru agad hondoi kandin oghondiyo. Kandan ka linukat no mo kaot-otawan ligkat diyo to kalibutan hoy kandan ka igtalapag diyo to Diyus hoy to nati nu karniru. ⁵ Waro iyan kandin nig uubat hoy waro iyan igkarow-oy kandan. ⁶ Hoy duon nigkita ku no loin nu diwata no niglayjag diyo to aw-awangan no nig alap to maroyjow no batbaton no kono ogkahalin to waro ogtamanan igpamatbat sooyjo diyo to kalibutan diyo to mo otow no nanligkat to loin-loin no mo Nasud, mo tribu hoy mo linalagan, hoy mo punduk. ⁷ No nigpanamantaman kandin tongod su nighinguma on ka panawun to poglugpad din. No simbaan now ka nighimu to langit hoy to tano, to dagat hoy to mo subsub to mo woyig.” ⁸ No duon nakasundul nu igkarangub nu diwata nu nigkagi, “Na gugus on! Nagusgus on ka mabantog nu Babilunya! Su inpainum din ka tibo nu Nasud to binu nu iyan ka ogkoy rin! ⁹ No duon nakasundol kandan no igkatatulo nu diwata hoy nigpanamantaman nigpangulayi nu nigkagi, “Ka agad hontow no diwata no ogsimba to makaliyas liyas no mananap hoy to larawan din hoy ogpakulit diyo to bukod din hoy diyo to bulad din, ¹⁰ Ogpokoinom daan kandin to tuuk nu binu to Diyus no in itis diyo to ubab to langit din, no ogpabaybajaran kandin pinabayjo to hapuy asupri diyo to tangkaan to mohon-a no modiwata hoy to tangkaan to nati no karniru. ¹¹ No ogparibabow to waro ogtamanan ka ubul ligkat to igbayjad-bayjad kandan. Kono ogpokoyimmulog no ogkabaybayjaran to aldow hoy marusilom sooyjo nigsimba to makaliyas-liyas no mananap hoy to larawan, hoy nigpakulit to ngaran to mananap. ¹² Koy naan ka koot-otawan to Diyus no nigtuman to mu sugu din hoy nigsalig ki Hisus. Kinangolan no ogparayjun ogpalitutuu.” ¹³ Pogkaponga to sikan, duon narinog ko nu lagong no ligkat to langit no nigkagi, “Isulat nu soin: Ligkat kuntoon, iyan mampo sooyjo so namatoy no duon to Magbabayjo!" No nigtabak ka Ispiritu Santu, “Tutu-u iyan, ogpanalanginan kandan oyjow ogmokohimoloy on kandan to pogkaunag dan, su oglibod diyo to kandan ka maroyjow no hinimuwan dan.” ¹⁴ Hoy duon nigkita ku no maputi nu salagapon nu duon nigpinnuu no honduon to anak to otow nu nigkukuruna to bulawan hoy niggun-gun to magalang nu galab. ¹⁵ Hoy duon pad iyan mando inkita ko nu loin diwata nu niglihawang to timpu hoy nigpanamantaman din ulaluy ka pinpinuu to salagapon to nigkagi “Ay-ayuna ka galab nu hoy aani kad su nuyinugan on ka oggaaniyon diyo to kalibutan!" ¹⁶ Koy naan ingalab on to sooyjo so nigpipinnuu to salagapon ka oggaaniyon diyo to kalibutan. ¹⁷ Hoy duon inkita ku no loin nu diwata niglihawang to timpu diyo to langit hoy duon daan galab din nu magalang. ¹⁸ No duon mando inkita ku no loin nu diwata no nigligkat to Altar no iyan inpiyalan to hapuy. Nigpanamantamanan din kuluyi ka duon maagalang nu galab no nigkagi, “Ay-ayjona nud ka galab nu hoy panlugtasa nud ka mo pung-pung ka mo humoy to paras diyo to kalibutan su nonoyinugan on!" ¹⁹ Koy naan inpanlugtas on to diwata ka mo humoy to paras diyo to kalibutan hoy inpanbanggal din on diyo to maluwag nu kulusanan to langit to Diyus. ²⁰ Hoy inkolog on ka mo ubas diyo to kulusanan no diyo to lihawang to Siyudad. No ligkat to kulusanan nu duon langosa nu nigtuliyas no duon lallima no paa ka karalom hoy daruwa nu gatos (200) nu kilumitru ka kalayjag.