¹ No natamanan, duon amana no koin-inuwan no ogkitoon diyo to langit. Su doon malitan no migsaluub to Aldow hoy diyo migsasindog to buwan, hoy migkukura to sampulo hoy daruwa (12) no bituon. ² Naburos kandin hoy magaan on og losuti, konag ogkaayjon su ogbaliliton on man. ³ No doon mando kain-inuwan no ogkitoon diyo to langit. Duon bobojaygon no dragon no malalab no pito ka ulu hoy sampulo ka sungoy, hoy ka tag sungo ulu doon kuruna. ⁴ Noinkohis din to ikug din igkatulo no baad to mo bituon hoy inbanggal din diyo to tano. No diyad migsasasindog ka dragon to tangkaan to malitan no magaan on oglusuti oyjow ogsakmagon din ka bato ko oglusot on. ⁵ Hoy niglosutan on ka malitan to lukos no bato no iyan ogmando to mo Nasud no waro kayid-u to mo kuntoro din, hoy duon nigsakulow to bato hoy in alap pohondiyo to Magbabayjo diyo to turunu rin. ⁶ No migpalagoy on ka malitan diyo to mammara no ingod no kono ogkaugpoon, no intagana on tahan to Magbabayjo no ogpaaputa din oyjow ogtanulon kandin solod to (1260) no aldow. ⁷ Nataman, duon gubut diyo to langit su nigmabunbunu-oy si Miguel duma to mo diwata din hoy ka dragon duma mando ka mo diwata rin. ⁸ Di naroog to dragon duma to mo diwata rin, hoy warad suguti to Magbabayjo no og-ugpo kandan diyo to langit. ⁹ No inbangal on diyo tano ka bubujaygon no dragon, kandin ka dongan pad no ulod no inngaranan to Yawa, ka Agalon to mo madoot no otow no iyan nigpaangkal to mo otow kayi to ampow to tano inbanggal kandin diyo to tano duma to mo diwata rin. ¹⁰ No duon narinog ko no nigpanamantaman nig ulaloy diyo to langit no mighohonduon, timpu on no ogluwason on to Magbabayjo ka mo otow. Igpapitow rin on ka goom din to poghari hoy ka katongod to Kiristu no in alam din. Su ka diyo to tangkaan to Magbabayjo no talagsumbong to mo sulod ta to aldow hoy marusilom. Inbanggal on diyo to tano. ¹¹ Naroog dan kandan pinabayjo langosa to nati no karniru hoy pinabayjo mando to karoyjawan no inpanlalag dan. No waro dan kanuguni ka kinabuwi dan agad pad ogkamatoy kandan tongod to pogtuu ran. ¹² Di kaholo kow, kalangitan, hoy kaniyu tibo no og ugpo duon! Di mokohihid-u ka tano hoy dagat su niglono-on duon to kaniyu ka Agalon to maddoot no otow no amana nalanglanguti su nataga ma kandin. ¹³ To nakataga ka dragon no igbanggal on kandin diyo to tano, ingapon din on ka malitan no mig anak to lukos. ¹⁴ Di on bogayjan ka malitan to daruwa no pakpak to dakol no ban ug oyjow ogpakalayjang kandin pohondiyo to mammara no ingod no kono ogkaugpoan no ogtanolon kandin to (1,266) no aldow, hoy oyjow ogmakapariyo kandin to bulalakow migkulopo dakul no tano. ¹⁵ No migkulopo ka bulalakow to dakol no woyig no inpasinundol rin to malitan oyjow ogkaanlas kandin. ¹⁶ Di inbuligan to tano ka malitan. Nabuka ka tano hoy migsonop ka woyig no ingkalupo to bulalakow. ¹⁷ Na bulo-bulo ka bulalakow do to malitan hoy niggipanow o kandin no ogpakig lalaban to mo duma pad no mo kabularan to malitan, kandan sooyjo so nigtuman to mo sugu to Magbabayjo hoy to kamaluhutan no inpanulu ni Hisus. ¹⁸ No diyo nigsasindog ka bulalakow to ilis to dagat.