¹ To pogligad on to mo aldow to poghimoloy, ka liblibokas pad to Domingo, nighondiyo si Mariya Magdalena hoy ka sangoy rin nangondiyo oyjow to pog-pitow to lobonganan. ² Hoy hignali duon maagbot no linug hoy sagboka no diwata no nig lono ligkat diyo to langit; inlilid din ka batu hoy nig pinuuwan din soini. ³ Iling to ligkat ka kandin na lango lango hoy maputi ka kinabo din. ⁴ Nangolkol ka talagbantoy tongod to nahaldok lagboy kandan woy nabigtawan. ⁵ Hoy ka diwata nig kagi dut mo malitan, kono kow kahaldok. Namaan a no namitow kow ki Hisus no in lansang diyo to kurus. ⁶ Warad kandin kayi nigbatun kandin sumalo to inkagi rin agpas kow hoy pitawa now ka nig lobongan kandin. ⁷ Hoy hondiyoi now kuntoon hoy nangoni no ka tinoonan din no nigbaton on kandin hoy nig-hun-a-on kandin diyo to Galiliya. Diyo dan ug kitaa kandin. Sum-sumana now ka in kagi ku kaniyu." ⁸ Koy naan ka in agpas kandan nig awwo diyo to nig lobongan no duon kahaldok duma to dakol no kaliyag. Namalaguy kandan oyjow to pog nangon do to tinoonan din. ⁹ Hoy to hignali nig tagbo si Hisus kandan hoy nagkagi kandin, "Ka kalinaw ogduma kaniyu." Nigdani kandan woy nig gon-gon to paa rin woy nigsimba kandin. ¹⁰ Si Hisus nigkagi kandan, "Kono kow kahaldok, hondiyo i now ka mo sulod ku hoy pohondiyo a now to Galiliya, diyo a ran ogkitoon." ¹¹ To duon no nangipanow on ka malitan, pila no sundalu ka nigbantoy diyo to lobonganan, nanguli diyot siyudad hoy inpanangonan dan ka mo agalon to pari to tibo no nahitabu. ¹² Hoy ka mo agalon to pari nakigtagbo to mo agalon to hudiyu oyjow ogpalanu ko nokoy ka oghimuwon hoy ka mo sundalu nigbogayjan dan to dakol no salappi. ¹³ Hoy nig nangonan, "Pannangon now no pog kamarusilom ka mo binasbas din nangondiyo to lobonganan hoy intakow ran ka lawwa to duon no nongihirogo koy. ¹⁴ Ko soini og kamaanan to mo Gubernadur, kanami on ka balagad no og kagi kandan hoy warad on og kabalakahan now. ¹⁵ Nigdawat to talagbantoy to salapi hoy intuman dan insugu kandan. Hangtud kuntoon iyan soini ka balita no inpalogub to mo Hudiyu. ¹⁶ Ka sampulu woy sagboka (11) no binasbas nighondiyo to Galiliya diyo to bubungan no og pohondiyoan kandan ni Hisus. ¹⁷ Hoy to pogkakita ran kandin, nig simba ran si Hisus di ka duma nig duwa duwa. ¹⁸ Nig dani si Hisus woy nig kagi kandan, "Inbogoy kodi ka tibo no gawom to tano woy langit. ¹⁹ Tongod to soini, to pog panhipanow now himuwa now no binasbas ku ka tibo no kootow-otawwan to tibo no kalibutan. Bawutismuhi now to ngaran to amoy, to anak woy Espirito Santo. ²⁰ Hoy tudlui kandan to pogtuman to tibo no insugu ku kaniyu. Hoy sumsumana now: Kodi og duma a kaniyu hangtud to pogkatapus soini ingod.