¹ Inlimud ni Hisus ka sampulu hoy daruwa (12) no mo tinuonan hoy inpamogayjan kandan to gohom hoy katongod to pogpang-alow to tibo no mo busow hoy pogpang-oyjag to ogkangadaluwan. ² Hoy insugu din kandan oyjow to pogsaysay moyitongod to poghari to Magbabayjo hoy to pog-oyjag to ogkangadaluwan. ³ Nigkagi kandin kandan, “Kono kow alap to agad nokoy to pogpangipanow now, kono kow alap to agad nokoy: Mo tokod, kabil, koonon, soloppi, hoy og-ilisan now. ⁴ Agad hondoi no baloy no ogpamanohikan now diyo kow ro iyan ugpo taman to og-awo kow man do diyo to banwa. ⁵ No agad nokoy no baloy no kono ogdawat kaniyu, ongkori now sikan no banwa hoy taktaka now ka alitopong diyo to paa now palintutuu no waro kandan naliyag to Magbabayjo. ⁶ Nigligkat on ka mo tinuonan hoy nangondiyo to loin-lon no banwa, to pogpanaysay to maroyjow no batbatonon hoy nan-oyjag to ogkangadaluwan. ⁷ - ⁸ Si Haring Hirudis no iyan tigmando to Galiliya, nakadinog moyitongod to tibo no noyitabu. No nalibog amana kandan su duon mo otow no nigkagi nouyjag kun si Huwan no Talagbawustismu. ⁹ Nigkagi si Hirudis, “Inpapungolan kud is Huwan to ulu, hontow naan soin no otow no dakol man ka ogkadinog ko moyitongod kandin. No dakol pog-iman-iman ni Hirudis no ogpakakita ki Hisus. ¹⁰ Nanlibod ka mo tinuonan hoy namatbat kandan ki Hisus to tibo no noyimu ran no induma rin on kandan hoy nighondiyo to sagbuka no lunsud no inngaranan to Bitsayda. ¹¹ To pogkataha do to mohon-in no mo otow, nigsundul kandan. No in-al-alukuy kandan ni Hisus hoy inpamatbatan moyitongod to poghari to Magbabayjo hoy in-oyjag dan ka mo nangadaluwan. ¹² No ogdangkoy on ka aldow, nandalapak ki Hisus ka sampulu hoy daruwa (12) no tinuonan hoy nigkagi, “Pohundiya a no ka mohon-in no mo otow to marani no banwa hoy mo kamot oyjow ogmakapitow kandan to ogkakoon. Hoy ogkahirogoon dan su kayi pad to banwa no awa-aw.” ¹³ Di nigkagi si Hisus kandan, “Kaniyu ka ogbugoy to pogkoon dan.” Nigtabak kandan, “Lalimma ro no paan hoy isda ka kayi to soin. No kog omuno naan do iyan, angin ko ogmokohipanow koy pad hoy ogmakabuli to igpakoon kandan tibo?" ¹⁴ (Diyo duon 5000 ka mo lukos) Hoy nigkagi si Hisus to mo tinuonan, "Papinnuuwa ka mo otow hoy palimura to tag-50." ¹⁵ Intuman soi to mo tinuonan hoy inpapinnuu kandan tibo. ¹⁶ Inpurut ni Hisus ka lalimma no paan hoy daruwa no isda hoy niglongag kandin diyo to langit hoy nigpasalamat to Magbabayjo. Hoy inporipori din ka paan hoy inbogoy din soi to mo tinuonan oyjow igpapamogoy to mo otow. ¹⁷ Nangoon hoy nangahantoy kandan tibo. Hoy ponga to sikan nakalimod pad ka mo tinuonan, sampulu hoy daruwa (12) no liyang ta samo to mo otow. ¹⁸ Duon banwa nig-ampu si Hisus no nigpasagsagboka tagood to diyo dod to marani to mo tinuonan din. Hoy nanginso kandan, "Hontow a kun naan sumalo to mo otow?" ¹⁹ Nanabak kandan, "Nangagi ka duma no ikow si Huwan no talagbawutsimu. Nigkagi mando ka duma no ikow si Ilyas ka duma man do nigkagi ikoaw sagboka to mo purupita no nohun-a no nauyjag kuntoon." ²⁰ "Di kaniyu, nokoy ka igkakagi now? Hontow a naan? Nanginso kandin. Di nigtabak si Pidru, "Ikow iyan ka Misiyas no pinaalap to Magbabayjo." ²¹ Di intaugson ni Hisus kandan no kono ogpamatbat agad hontow. ²² Hoy nigkagi kandin, "Ka Anak to Otow kinangolan no oglugparan amana hoy pinakawaro to mo pangulu to mo Hudiyu, to mo agalon to mo Pari hoy to mo mag-anaray to balaud. Oghimatayjan hoy ogbatunon to ikatulo no aldow." ²³ Dow nigkagi kandin to tibo no mo otow ko hontow sooyjo ogkaliyag no ogduma kanak, kinangolan og-ongkod kandin to pogkootow hoy ogtiang to kandin kuros to tibo no aldow hoy ogsunud kanak. ²⁴ Su ka ogkaliyag no ogluwa to kandin no kinabuwi ogkaawoan kayi di sooyjo su ogkaawoan to kandin no kinabuwi tongod kanak, ogpakadawat to kinabuwi no waro ogtamanan. ²⁵ Nokoy man ka ogkakuwo to otow ko ogkaabin din ka tibo no ingod di ogkaawwo ka kandin kinabuwi hoy oglogparan kandin? Waro iyan? ²⁶ Su aman ka ogkasipod a duma to kagiyonon ko agad hontow, igkasipod ko do man kandin to panawon n og-uma on ka anak to otow duma ka mohon-in din hoy ka Amoy din to mohon-in no paliyan. ²⁷ Ogkagiyan ku kaniyu: To duon malimboka kani no kono ogkamatoy taman to ogkakita dan on ka poghari to Magbabayjo." ²⁸ To songo simana on to sikan to pogkaponga ni Hisus to nigkagi to sikan, in-alap din si Pidru, si Huwan hoy si Santiyagu hoy nanakorog kandan diyo to bubungan oyjow og-ampu. ²⁹ Tagood to nig-ampu kandin, nahalin ka kandin no langlangowan hoy nasilang to kaputi to nigkinabo din. ³⁰ Saguguno, niglopow ka daruwa no otow hoy nakig-istorya kandin kandan iyan si Moisis hoy si Ilyas, ³¹ no nigpakita ka duma to poglayag to langitnung poglayag hoy nakig-istorya ki Hisus moyitongod to kamatayjon din diyo to Hirusalim. ³² Nohidhirogo amana si Pidru hoy ka mo duma din. Di nakagimata kandan hoy nakita ran ka poglayag si Hisus hoy ka daruwa no otow no nigsasindog tupad kandin. ³³ Tagood nig-ongkod ki Hisus ka daruwa no otow, nigkagi si Pidru kandin, "Mag-aanad, maroyjow iyan kani ki to soin. Ogpasasindog ki to tatolu no loob, sagboka para koykow, sagboka do ma ki Moisis, hoy sagboka para ki Ilyas." (To tutuu waro kandin makasabut to kandin inpangagi.) ³⁴ Tagood to nig-istoryahanay pad kandan, duon salagapun no indal-ungan kandan hoy nangahaldok ka mo tinuonan no duon salagapon no nigdalungan kandan. ³⁵ Hoy duon lagong no ligkat diyo to sagalapun no nigkagi, "Soinin no Anak ko no napilian ku. Pamminoga now kandan." ³⁶ To naawo on ka salagapun, si Hisus do naan ka nabilin. Waro mogkagi ka mo tinuonan moyitongod to soini tibo no nakita ran to sikan no aldow waro dan inpamatbat, agad hontow to nakita ran. ³⁷ To sunod no aldow no nanupang on kandan ligkat diyo to bubungan hoy duon nigtomu ki Hisus no mohon-in no otow. ³⁸ Hoy ligkat to pundo duon sagboka no otow no nigpangiyak, "Talag-anad, pitawa nu pad bag ka anak ku no lukos! Sagsagboka ku kandin no anak." ³⁹ Og-umaan kandin to busow to saguguno no nigpangiyak hoy nigkolkol no nigbubulo ka baba. Inlogparan amana kandin hoy konad iyan poron ogkod kandin. ⁴⁰ Oghangyuan din ka mo tinuonan din to pogpanambal to Ispiritu di waro kandan mokohimo." ⁴¹ Nigtabak si Hisus, "Pogkawaro pogtuu hoy sayjop ka pogsumansuman now! Oglayjun aman naan ogparuma-duma kaniyu?" Hoy nigkagi kandin diyo to otow, "Alapa now dini ka anak nu." ⁴² To pogparani do to bato diyo ki Hisus. Inlampos kandin to busow diyo to tanohoy nangolkol kandin. Inpaawo ni Hisus ka busow, intambalan din ka bato hoy in-uli diyo to amo din. ⁴³ Hoy nabolong-bolong ka tibo no mo otowto dakol no gohom to Magbabayjo tagood to nangahibulong pad ka mo otow to tibobo inhinang ni Hisus. Nigkagi kandin diyo to mo tinuonan, ⁴⁴ "Kono kow kalingow to inpangagi ku kuntoon. Ka Anak to Otow igpalangosa diyo to mo otow." ⁴⁵ Di waro kandin makasabot ko nokoy ka kahulugan to soini. Inholos soini kandan oyjow kono ogkasabut, nangahaldok on kandan no ogpanginso moyitongod kayi. ⁴⁶ Hoy nigpaap-apuloy ka mo tinuonan ko hontow ka labow kandan. ⁴⁷ Di natag si Hisus ko nokoy ka insumansuman dan. Sikan naan nigpurut kandin to sagboka no bato hoy inpasasindog diyo to kilid din. ⁴⁸ Hoy nigkagi si Hisus kandan, "Ka agad hontow no dawat to soini no bato-a to kanak no ngaran, dawat kanak hoy ka ogdawat kanak, ogdawaton daan kandin ka nigpaalap kanak. Su ka labing ubus kaniyu tibo iyan ka labing dakol." ⁴⁹ Nigkagi si Huwan kandin, "Talag-anad, nakapitow koy to otow no nanambal to mo busow pinaagi to ngaran nu hoy insaparan doy su kono man no sakup to punduk ta." ⁵⁰ "Kono now kandin sapari," kagi ni Hisus kandan hoy ka duma no mo tinuonan, "Su ka kono ogpakig-usig kaniyu dini'g parapit kaniyu." ⁵¹ Hoy no maddani on ka aldow, no oglibungon si Hisus. Nasagboka ka panghuna-huna din to poghondiyo to Hirusalim. ⁵² Inpaalap kandin to mo suguanon no oghun-a kandin hoy nangondiyo kandan to sagboka no balangoy to Samarya oyjow to pog-andam to tibo para kandin. ⁵³ Di waro nigmamminog ka mo otow diyo su oghondiyo man kandin to Hirusalim. ⁵⁴ To pogkammaan dan to sikan, ka mo tinuonan no si Santiyagu hoy si Huwan nigkagi, "Magbabayjo, ogkaliyag ka buwa no ogsugu koy no og-uran to hapuy ligkat to langit oyjow ogkangasilaban kandan." ⁵⁵ SI Hisus niglingi hoy insaparan kandan, ⁵⁶ hoy nigparayjun kandan poghipanow diyo to loin no banwa. ⁵⁷ Tagood to nangipanow kandan, duon sagboka no otow no nigkagi ki Hisus, "Ogduma-a koykow agad hondoi ka ogparolog." ⁵⁸ Nigkagi si Hisus kandin, "Ka mo lako duon ogkangaulian hoy ka mo bayjaku duon mo salah di waro ogkahibataan hoy kahimolayjan ka Anak to Otow." ⁵⁹ Hoy nigkahi kandin to loin no otow, "Duma ka koddi." Ka nigkagi ak otow, "Magbabayjo, og-uli a pad diyo oyjow poglubong to Amo ku." ⁶⁰ Nigtabak si Hisus, "Balagara ka mo patoy no oglobong to kandan mo minatoy. Di ikow, hipanow ka hoy ibat-ibat ka poghari to Magbabayjo." ⁶¹ Duon mando otow no nigkagi, "Ogduma a koykow, Magbabayjo, di paag-agani a pad to pog-uli oyjow ogmakapananghid a diyo to gipulon ku." ⁶² Nigkagi si Hisus kandin, "Agad hontow no ogdaru no layjun ogpanlingi-lingi di to talikuran kono no olog to poghari to Magbabayjo."