¹ Inbatbat ni Hisus soin no sampitonon oyjow ogpanulu no kinangolan kandan ogpanabisabi hoy kono kandan ogkaawban to poglaum, ² "To sagboka no lunsud duon sagboka no mananag-an no waro kahaldok to Diyus hoy waro pogtawod to mo otow. ³ Hoy duon sagboka no balo to sikan no lunsud niglibod-libod no oghondiyo to kandin oyjow oghangyu no ogtabangan to katongod din. Nigkagi ka balo no malitan, 'Buligi a ro bag to mo usig ku.' ⁴ Solod to malayjat no panawon to mananagno waro nigbulig kandin di to katapusan nakakagi kandin to kaugalingon din. Agad waro kahaldok ku to Diyus hoy waro pogtawod ku to mo otow, ⁵ di tongod su ongod man ogtalugon kanak soini no balo, panaliporan kud lang ka katongod din. Su ko kono ko soin oghimuwon og-ongod kandin oglibod hangtud no ogkoubus ka pailub ku.' ⁶ No nigparayjun ka Magbabayjo, 'Pamminoga niyu ka igkagi to sikan maroot no huwis. ⁷ Kuntoon, kono ba no ka Diyus ka ogpangabang to kandin no sakup no ogpamuyju to tabang aldow hoy marusilom? Niglamo-lamo ba kandin to pogtabang kandan? ⁸ Ogkagihan ku kaniyu no ka ogpangabang kandin ogbuligan din hoy og-agpason din to poghimu. Di ogmakakita ba to pogtuu ka anak to otow kani to ingod to pog-uma din?" ⁹ Inbatbat ni Hisus soin no sampitonon diyo to nigtuu no maroyjow kandan no otow hoy nigdow-oy to tibo, ¹⁰ "Duon saruwa no otow no nighondiyo to timpulu oyjow og-ampu: ka sagboka taga-Parisiyu hoy ka sagboka talagsukut to salapi. ¹¹ Ka Parisiyu nigsasindog hoy nig-ampu, 'Nigpasalamat a koyko O Diyus, no konaa no lohoron, kono no limbunga hoy kona a moyilig to mo boyi iling to duma. ¹² Waro a nigkoon to daruwa no aldow kada simana hoy ogtalaranan ku sikoykow to sampulu to tibo ku no ani.' ¹³ Di la talagsukut to salapi nigsasindog diyo to mariyu hoy kono gani oglongak to langit. Napanagpi din ka susulobon din hoy nigkagi, 'O Diyus, kohoy-uwi a no sagboka no makasasalo! ¹⁴ Hoy nigkagi si Hisus, "Ogkagiyan ku kaniyu no ka talagsukut to salapi hoy ka Parisiyu, iyan ka inkaliyagan to Diyus to pogpouli din diyo to kandan. Su ka tibo no ogpalayjat to kougalingon igparilalom hoy ka tibo no ogpariralom to kougalingon igpalayjat to Diyus." ¹⁵ Duon mo otow no nang-alap to doroisok no mo bato diyo ki Hisus oyjow ogsamsamon ni Hisus. Nakita kandan to mo tinuonan ni Hisus hoy nangaboloan. ¹⁶ Di in-umow kandan ni Hisus hoy inkagihan, "Balagara niyu ka mo bato no ogdalapak kanak. Kono niyu pugungi su ka gingharian to Diyus iyan tag-iya ka mo bato. ¹⁷ Timan-ani niyu soini: Agad hontow no kono ogdawat to Gingharian to Diyus iling to sagboka na bato kono ogpakasolod to sikan. ^{18 19} Sagboka no agalon to mo Hudiyu ka nanginso kandin, "Maroyjow no Talagpanulu, nokoy man ka oghimuwon ku oyjow ogkapurut ku ka kinabuwi no waro katapusan? Nanginso si Hisus kandin, "Maniya to intawag a no no maroyjow? Waro maroyjow, ko kono ka Diyus do. ²⁰ Nataga ka to balaud: Kono kow panlibog, kono kow himatoy, kono kow pannakow, kono kow pamatbat to ubat, tawura niyu ka amoy hoy inoy niyu." ²¹ Nigtabak ka otow, "Nigtuman ku ka tibo no mo balaud ligkat pad to pogkabato ku." ²² To pogkarinog ni Hisus, inkagihan din datu no otow, "Sagboka pad ka kinangolan no oghimuwon. Ibaligya nu ka tibo nu no mo kalaglagan hoy ibogoy ka halin diyo to mo publi oyjow ogpakadawat ka to bahandin diyo to langit hoy libod ka hoy sundul kanak." ²³ Di to pogkarinog dutu naaras amana kandin su datu man amana kandin. ²⁴ Nakita ni Hisus no naaras amana ka otow, hoy pigkagiyan kandin, "Malisod to mo datu ka ogpakasolod to Gingharian to Diyus! ²⁵ Mas masayjun pad to sagboka no Kamilyu to ogsorop to longaa to dagom kono to datu no ogsolod to Gingharian to Diyus." ²⁶ Ka mo nakadinog to soin nanginso, "Ko sikan manaan, hontow ro man ka ogkaluwas?" ²⁷ Nigtabak si Hisus, "Ka kono ogkoyimu to otow ogkayimu to Diyus." ²⁸ Hoy nigkagi si Pidru, "Hinumdumi nu in-oyjowan doy ka baloy doy oyjow ogsundul koykow." ²⁹ Nigkagi si Hisus kandan, "Malogot sikan, hoy ogkagiyan ku kaniyu to soin no agad hontow no og-oyjow to baloy din hoy asawba, hoy mo sulod din hoy inoy hoy amoy din hoy mo anak din tongod to Gingharian to Diyus, ³⁰ makaangkon to mohon-in pad no garasiya to soin no panawon hoy ka kinabuwi no waro ogkooposan to oghinguma no panawon." ³¹ Inlimud ni Hisus ka sampulu no mo tinuonan hoy nigkagiyan din, "Pamminog kow! Ogpoiling ki diyo to Hirusalim ka banwa no natuman ka tibo no mo butang no insulat to mo purupita moyitongod to Anak to Otow. ³² Igdihal kandin diyo to kono no Hudiyu hoy oglian-liyan to mo otow hoy og-iloban. ³³ Ogbarasan dan hoy oghimatayjan si Hisus di ogbatunon to igkatatolu no aldow." ³⁴ Waro nakasabut ka mo tinuonan agad sagboka to sikan no mo butang, ka kohulugan to mo batbaton waro dan nasabut ka inkagi ni Hisus. ³⁵ To marani on si Hisus to Hiriku, duon sagboka no butud no nigpinnuu hoy namuyju ilis to dalan. ³⁶ To pogkarinog din no nangligad ka mo otow, nanginso kandin, "Nokoy a ka duon?" ³⁷ Nigtabak ka otow, "Si Hisus no taga-Nasarit ogbayjo kayi." ³⁸ Hoy nigpangiyak ka butud no otow, "Hisus, Anak ni Dabid! Kohoy-uwi a nikoykow!" ³⁹ Tongod to soini inkaboluan kandin to mo otow no nokohun-a hoy inpapoonong-onong. Di nasi nigmaagbot to pogpangiyak din, "Anak ni Dabid! Kohoy-uwi a nikoykow." ⁴⁰ Nokoy naan ka nighunung si Hisus to poghipanow hoy nigsugu no og-alapon ka butud diyo to kandin. To nokorani on si Hisus, nanginso si Hisus kandin, ⁴¹ "Nokoy man ka gustu nu oghimuwon ku koykow?" Nigtabak kandin, "Magbabayjo, igkaliyag ku poron no ogpakakita oglibod." ⁴² Inkagiyan kandin ni Hisus, "Pakakita ka! Ka pogtuu nu ka nokopouli koykow." ⁴³ Hoy saguguno nakakita on ka butud hoy nigsundul ki Hisus hoy nigpasalamat to Diyus. To pogkakita to mo otow to noyitabu, indayig dan tibo ka Diyus.