¹ Ka mo pangulu to pari in alam puun diyo to mo Hudiyu oyjow to pog alagad to Diyus hoy diyo to mo ko-otawan, katongdanan dan ka pog panalapag diyo to Diyus to mo ayjom hoy to mo duma pag oyjow nog kapasaylo ka mo salo ² ka mo pangulu to pari mo otow ro daan no iling kanta nog makasalo do, koy naan kag ay-ayjaran dan ka og makasuwaywog to tutuu hoy kanatagaahadan no maro-ot on ma naan ka noyimuran ³ hoy tongod to ogmakasalo do man kandan, kinangolan nog panalapog do kandin oyjow to kougalingon din no mo salo. Hoy ko do no salo to mo kaotawan. ⁴ Mabantug ki ko og koyimu ki no pangulu to pari di kono no kanta ka og alam oyjow nog koyimu ki no pangulu to pari. Ko kono no ka Diyus do iyan ka og alam kanta. Ka anak pog din no dongan ki Aarun. ⁵ Hoy ogka anak man o ki Kristu no kono no kandan ka nig pabantug to kougalingon din nog koyimu no pangulun pari, ko kono no ka Diyus do iyan so nig kagi ka Diyus ikow ka anak ko, hoy ig paila ko konto-on no kanak ka amoy no. ⁶ Hoy inkagi rin diyo to loiu no kasulatan. Koykow ka pari to waro katamanan, og ka anak to pogka pari ni Milkisidik. ⁷ To dongan no kayi pad si Hisus to kalibutan, nig sinogow kandin no nig-ampu oyjow nog kohid-uwan kandin to Diyus nog kaluwas ligkat to kamatayjon hoy agad to Diyus on kandin di duon pog po-obos din hoy nig masinongtanon kandin. Koy naan no nig paminog kandin ka Magbabayjo to pog ampo diu, ⁸ hoy agad anak kandin to Magbabayjo, di nataga kandin no kinangolan no og matinomanon pinabaybayjo to pogpabaybayjo ri kandin. ⁹ To napunga-on ka tibu no kinangolan nog Pabaybayjoran kandin. Noyimu on kandin no manluluwas to tibu no nig matinomanon diyo to kandin oyjow no konad-on kandan og kalogparan pinabayjo no mo salo dan, ¹⁰ hoy in himu on kandin to Diyus kaanak ki milkisidik no pangulu to mo pari. ¹¹ Moon-in pad poron ka igpanggugud noy kaniyo moyitongud to pog ka pangulu no pari ni milkisidik hoy ki Hisus. Di malisod pad soin no ig poyitaga kaniyo su kono now pad soin amana ogkasabot. ¹² Ogkoyimu kow on poron no talag panulu su no kani kow ro no nigpalintutuu di taman hangtud konto-on nog kinangolan kow pad nog panuluwan to an-anayjon no inpanulu on kaniyo moyitongod to mo lalag to Magbabayjo og kaanat kow pad to mo bato no ogsusu pad og koibog pa ta gatas to inoy su kono kow pad og pakako-on to mo mad-doson no mo koononn. ¹³ Ka nigkinabuyi pad to gatas og ka anat pad to mo bato no nig sususpad no kono kow pad og kataga ko maroyjow hoy ka maro-ot. ¹⁴ Di iyan do og makako-on to mad-doson no ko-ono-non ka natagaou to maroyjow hoy konon madoyjon.