¹ Su soin kag kaligayan ku nu igpasabut: Taguod to bato pad ka ug makasundul to karatuan to amoy rin, anat kandin to sagboka nu uripon agad to kandin ka kamunoy to tibo. ² Duon mo otow nug tanol kandin hoy ugdumalo to kalaglagan din poiling tog hinguma ka panahon nu innangon to amoy. ³ Kanta nun-a uripon to mo gohom nu kayi to kalibotan. Nu batu kipa ti ispirito. ⁴ Di to pog-uma to malugot no panahon, inpa-alap to Diyos ka Anak rin, in-anak to otawon nu inoy hoy nigkinabuhi diralom to balaod. ⁵ Oyjow to pogluwas to sooyjow nariralom to balaod hoy oyjow ogkohimo ki nu mo Anak to Diyus. ⁶ Oyjow to pogpoila nu kaniyo mo Anak rin, inpa-alap to Diyos ka Ispiritu to Anak din kayi to kanta nu pusung, ka Ispiritu nu oghonondu-o, "Amoy ko!’’ ⁷ Koy naan kono kow un uripon ko kono Anak un to Magbobayjo. Su tungod su Anak kow un kandin, ka Diyus nigbogoy kaniyo to tibo nu duon to kaniyo. ⁸ Nun-a waro kow mataga to Diyos koy naan nauripon kow to mo diyus-diyus. ⁹ Di kuntoon nu nokoila kow un to Diyus hoy kuntoon no ilahan kow on to Diyus, maniyo tog libod ko diyo to waro gohom hoy waro pulus no Ispiritu oyjow ugpauripon mandu kandan? ¹⁰ Nigtimaan kow to mo aldow, mo bulan, mo panahon hoy mo tuid. ¹¹ Nahaldok a atok waro pulus ka tibo nu panamantaman olog kaniyo. ¹² Mu sulod, nigholo a kaniyo nu ogpokoiling kow kanak anat nu kanak ugpokoiling kaniyo. Waro kow makasalo koddi. ¹³ Nataga kow nu nan lalag a to maroyjow nu lalagon diyo to kaniyu to kasagbuka tungod su nanaluwan a. ¹⁴ Di agad ko ka dalo nakapabugat amana kaniyo waro a nuw inliyan-liyan hoy inbalagad. Indawat a nuw nu anat to sagbuka nu diwata to Diyus iling nu si Kristu Hisus ka iyan indawat nu. ¹⁵ Naholo kow amana nun-a. No-umono kow un man kuntoo? Koddi iyan ogkagi to soin moyitungod kaniyu, kog kohimo pa lukata nu ka mata nu oyjow igbohoy koddi! ¹⁶ Nasilag kow buwa koddi tongod su inkagiyan ko kaniyu to tutuu. ¹⁷ Duon mo otow nog kaliyag amana nog dani kaniyu kuno maroyjow ka kandan no tuod. Ka tuod dan iyan no ug makasowoy kow kanak oyjow ug kasulod kow kandan. ¹⁸ Maroyjow iyan nog ug kadaral kow kanunoy to maroyjow agad ko waro a duma kaniyo. ¹⁹ Mo pinalango ko no anak, anat to sagbuka no inoy no nigguram, inguran ko to kasagbuka iling kasakit tungod kaniyo hantud nug kohimo nug hoy ogkoiling to kinaiya ni Kristu. ²⁰ Dakol ka kaliyag to pogpakigduma kaniyu kuntoon oyjow ug ugrayjon ka sumsumanon ku moyitungod kaniyu. Naaras a amana kaniyu. ²¹ Og-insoan ku kaniyu nogpariralom to balaod: waro kow buwa makadinog to inkagi to balaod? ²² Ka kasulatan nigkagi no si Abraham duon daruwa no anak nu lukos, ka sagbuka anak to uripon nu ka dangub anak ni Sara no kuno’n uripon. ²³ Ka anak din diyo to uripon no malitan naotaw sumalo to otawon di ka anak din to kono’n uripon naotow pinabayjo to Diyus. ²⁴ Ogkohimo nogsabuton soin sampitan; ka daruwa no malitan iyan ka daruwa no kasabutan si Hagar, hoy ka mo anak din naotow no mo uripon. Kandin ka kasabutan no nigligkat to Bubungan to Sinai. ²⁵ Si Hagar iyan ka Bubungan to Sinai diyo to Arabiya hoy to siyudad Hirusalim kuntoon no nauripon duma to tibo no mo otow. ²⁶ Di ka langitnon no Hirusalim kono’n uripon hoy kandin iyan ka kanta no inoy. ²⁷ Su ka kasulatan nigkagi; “Kaholo kow amana, maliyan no kono’g anak! pangiyak tungod to kahulo, ikow no waro inlosutan to kasakit to pog-anak! Su ka malitan no in-ongkoran ugpanganak pad to mohon-in ko kono to malitan no duon asawa.’’ ²⁸ Kuntoon, mo sulud anat ki Isaac, mo anak ki to Diyus tungod to insaad din. ²⁹ Di ilina nu nun-a nu panahon inbayjad-bayjad to anak no naotow to naanaran, ka anak nu naotow tungod to Ispiritu to Diyus, iyan daan soin ka ogkahitabo kanta kuntoon. ³⁰ Di nokoy man ka inkagi to kasulatan? Soin nigkagi “Paawa-a ka uripon no malitan hoy ka anak din su ka anak to uripon waro baad nogkaangkon to sooyjow anak to kono’n uripon.’’ ³¹ Koy naan, mo sulud, kono ki nu mo anak to malitan nu uripon ko kono to malitan nu kono nu uripon.