¹ No mo anak tumana no ka amoy hoy inoy now no sikan ka tumanan no oghimuwon ta sooyjo no nasagboka o diyo to Magbobayjo. ² No soini ka dongan no in sugu no nigbaad no soini “Tahura now ka koykow no amoy hoy ka inoy” no soini ka duma. ³ Di soini ka saad “No oyjow maroyjow ka pog-ugpo no hoy ogmalayjat pad ka kauyjagan kahi to ingod.” ⁴ No amoy kono now ogkabub-i ka kaniyu no mo anak, kono laysori now sikandan pinabayjo to pogdisiplina, hoy to pan-anad no diyo ligkat to Magbobayjo. ⁵ No ka mo uripon, tumana now ka mo agalon now kahi to ampow to tano duma to pogkahaldok now hoy to pogtahud now kandan, tumana now sikandin no ogligkat to mo pusung iling to pogtuman now ki Kristu. ⁶ Himuwa soini nogpitow kandin kanta oyjow ogpadayjandayjan kow ko kono himuwa kag pogbuut to Diyus to pusung no nigkagi to mo uripon ni Kristu. ⁷ Di tumana no ogmaroyjow on ka oghimuwon no ka Magbobayjo no soini ka og-alagaran kono ka mo otow do. ⁸ Sumsumana nogbalusan to Magbobayjo no kaghimu to maroyjow no uripon do ka kono. ⁹ Kaniyu mo pangulu, himuwa dayjun ni kaniyu soini to kaniyu no mo uripon no kono now sikandan oghinaldokon. No sumsumana niyu no kaniyu iyan ka uripon to Magbobayjo no waro iyan ogkarapitan din. ¹⁰ To katamanan lig-una ka kaniyu no kaugalingon diyo to pakigsagboka to Magbobayjo pinabayjo to dakol ka gohom. ¹¹ Isaluub now ka tibo no ka himan su og pakaatu no inbogoy to Diyus kaniyu oyjow maatu kow insaligkat to agalon to mo busow. ¹² Su ka usig ta kono no otow, ko kono siko so madoot no mo Ispiritu no diyo to maawang. Ka mo pangulu dan no duo mo gohom, talagmandu kayi to kalibutan no marukilom. ¹³ Hoy alapa now ka tibo no inbogoy to Diyus! Mokouma no madoot no aldow, nogmakaatakow oyjow togkaponga to samuk, to waro maka-onsig no kono og-inkasaluub no nigkagi no tubad now no matarong no nigkagi togpokoulat to pusung. ¹⁴ – ¹⁵ No mohon-in ka niglalag to maroyjow no nang-nangonon isip sapatus now no pakabogoy to maroyjow. ¹⁶ Alapa now duo uyana now ka pogpalintutuu now no pinabayjo soini ogkoobukan kanta to tibo no nigsiga ka inpano kaniyu ni moibulan. ¹⁷ No isaluub now ka kaluwasan no nigkagi to putow no kalu now, hoy gongoni now ka lalag to Diyus no inbogoy to Ispiritu nigkagi to kampilan now ¹⁸ ampu kow to tibo no timpu sumalo to inpanulu kaniyu to Ispiritu, tongod soini ogbantoy kaniyu hoy kono kow ongkod to og-ampu to tibo no kootawan to Diyus. ¹⁹ Ogdayjan koddi, hoy ka Diyus no nigbogayjan a to lalag no koddi no igpanggugud di ka waro ku ikahaldok no ogmakakagi a to inholos no palanu to Diyus no ka maroyjow no nang-nangonon. ²⁰ Tongod to soini no nohimu a no in paalap agad nighondiyo kuntoon no napirisu ad on kuntoon, no nig-ampu now no ogmabulut a ka oglalag to maroyjow no soini. Kakinangulan soini ka tumanon noghimuwon. ²¹ Si Tiquiku, no niggoynawa to mo sulod no matinumanon no ka suluguon to oghimuwon to Magbobayjo. Soini ka oglalag kaniyu to tibo no mahitongod koddi oyjow ogkataga kow to koddi no kuhintang. ²² No nig-alap ko kandin hondiyu to kaniyu, di nignangonan kow no mahitongod kanta tibo kayi no nigkagi mohon-in kow. ²³ No ka Diyus no Amoy no ka Magbobayjo Hisu-Kristu nigbogoy to karoyjow to niggoynawa no ka duma no nigpalintutuu diyo to tibo no mo sulod. ²⁴ Ka maroyjow hoy ka kohoy-u to Diyus, ogkaabin ko sooyjo to tibo niggoynawa to Magbobayjo ta no si Hisu-Kristu to waro ogtamanan no goynawa.