¹ Koy naan, su koddi pinirisu tongod so nigpamingod a to Mabobayjo, ogdaralon ku kaniyu to pogkinabuyi no tutuu iling to in-umow to Diyus ² poilub kow, dow poilub kow kanunoy, ipakita now ka kaniyu no goynawa diyo to pogbinuligay. ³ Panamantamana now no masagboka to in bogoy to Ispiritu to pogdahig no nabagkos kow. ⁴ Duon sagboka no lawa dow sagboka no Ispiritu iling to soin sagboka ro ka to pog-iman alang to soi in-umow kow to Diyus ⁵ sagboka ro ka Diyus, dow sagboka ro ka pogtuu dow pogbunyag. ⁶ Sagboka ro ka Diyus no Amoy to tibo no otow, kandin ka niglabaw dow nighimu to tobow pinabayjo to tibo ⁷ ka matag sagboka kanta inbogayjan to gasa sumalo to pogbuut ni Kristu. ⁸ So nig-iling ka kasulatan “To poghondiyo din to dibabow nig-alap kandin to dakol no bihag dow inbogayjan din to mgo gasa ka mgo otow. ⁹ Nokoy man ka kapailingan to “Pogbatuna kandin” nigpasabut soin no ligkat diyo to kinarawman to tano. ¹⁰ Ka niglono kandin dini to kalibutan, kandin ka nighondiyo to langit oyjow ogkasakup din ka tibo. ¹¹ No soini ka dasag ni Kristu: ka duma no mongo otow ogkagiyon no mongo Apustulis, ka duma mgo purupita, ka duma tiglalag to maroyjow no balita, ka duma mgo pastor dow magtutudlu. ¹² Inhinang din soi oyjow to pog-andam to tibo no otow to Diyus inhimu din soini oyjow ogmaroson ka lawa ni Kristu. ¹³ Taman to ogkasagboka ka tibo. Pogtuu ta dow pog-ila ta ki Kristu, no Anak to Magbobayjo, no maroson ka tibo dow igkapoila ka tibo diyo to Kristu. ¹⁴ Dow soin ko duon ogkahitabu kono ki ogkailing no maroot ka batasan ta dow ogkaisab ka tibo no pogsuman-suman, dow kono ta ogkaangod to batu dow mongo otow no maroot ka batasan. ¹⁵ Dow soin ogdakol ka tibo diyo to ki Kristu dow oglalag to tutuu duma to poghigugma. ¹⁶ Kono no iling to suon, iglalag ta ka tutuu dow duma to goynawa ta, koilangan no ogdakol to maroyjow mo batasan dow ka og-iling ki Kristu no pangulu ta og-iling sikan to ulu ta. Dow diyo ki Kristu ogkasabut ta ka goynawa woy ka lawa ta. Dow ko oghiso ka matag-sabuka ogkahiusa ka tibo no lawa ogtubo dow ogmaroson ka ogaling doon to poghigugma. ¹⁷ Dow diyo to katongod to Magbobayjo oghangonan ku kaniyu woy ogdaralu no ka kaniyu no batasan kono og kaangod to batasan to loin no otow no waro nokoila to Magbobayjo, su waro pogsumansumann dan. ¹⁸ Nigmaroson ka posumansuman dow woy mariyu ka kandan no kinabuhi no inbogoy to Magbabayjo woy waro pogtuo dow manikal ka ulu ran. ¹⁹ Nawaraan on kandan to kasipod: Nigpaalap on kandan to mongo bisyu woy hinang to mongo binuhatan no makasisipod. ²⁰ No kon soin ka natagahan now diyo to Kristu! ²¹ To wara igkaruwa-ruwa, nakarinog kow mohitongod kandin inpanuluan kow to kandin no natuloan su ka palinuuwan doon si Kristu. ²² Nokoy naan, luonga nu ka saa dongan no pogkootow nu no iyan makasaligkat to maroot no unton naon-ha. ²³ Kinangolan oghalinon now ka pusung now woy sumansuman. ²⁴ Isaluub now ka bag-o no unton ka bag-o no pagka-otow now no hinimo to Magbobayjo no ogkouling kandin ogkahimu kow no masuron hoy matularong woy balaan. ²⁵ Nokoy naan ka kono kow uubat! Ka tagsagbuka kinangulan no malurot ka oglalagon din tongod to kanta tibo sakup ki to lawa ni Kristu. ²⁶ Kuntoon ko ogkabulu ki bantoy kow no kono kow ogmakasalo. Kono now panginguma to songo aldow ka pogkabolu now. ²⁷ Woy kono now bohayi to dalan ka Satanas. ²⁸ Ka takawon, kinangulan kono on ogpanakow. Kinangulan ogsugud on kandin ogtarabaho to maroyjow no hinumuwan oyjow ogmakabugoy kandin to mongo waro ogkahimu. ²⁹ Kono kow lalag to maroot, ko kono sikan do si maroyjow no igkarigon to duma. Iyan now ra lalaga ka maroyjow woy ogmakabulig to ogpaminog kaniyu. ³⁰ Kono now pasundula ka Ispiritu to Magbobayjo su Kandin ka Paninoawan su diyo kow on to Magbobayjo woy ka kasiguruwan no ogbohayan kow to Aldow to Kaligwasan. ³¹ Ongkuri now on ka agad nokoy no maroot no batasan. ³² no koilangan no maroyjow kow to duma. Inolugay kow woy pinaubsanay kow kow to matagsagbuka to pagpaubus to Magbobayjo kaniyu, pinabayjo ki Kristu.