¹ Duon pila no otow no nonokouma to Antiquia ligkat to Hudiya, dow namasbas kandan to mo kasuloran, nigkagi kandan, "Kono kow ogkaluwas gawas kog dawat kow to sirimunyas to pogtuli sumalo to insugu to balaod ni Muwisis." ² Soin no pogtulun-an insupak amani ni Pablu dow ni Birnabi dow pila ka mo tinuonan to Antioquia mangondiyo to Hirusalim dow ogpakigkita to mo apustulis dow so mo pangulu bahin to soini no butang. ³ Koy na-an inpaligkat kandan to iglisya, dow to kandan no pogbayjo to Finicia dow Samarya inholos dan ka pogkakabig to mo konon Hudiyu diyo to Magbabayjo; soini no kagiyon no lalag nakaliyag amani to mo kasuloran. ⁴ Pogkouma noy to Hirusalim pigdawat kandan to iglisya, hoy to mo apustulis hoy to mo agalon to iglisya hoy piglalag dan to tibo to inghimo to Magbabayjo kandan ⁵ Di duon mo magtutuu no sakup to soikan no sungo punduk to mo Parisiyu no nigmansasindog hoy nigmangkagi, “Kinaanglan naan iyan no ogpangtulion kandan hoy ogtumanon to mo balaud ni Muwisis.” ⁶ Ka mo apustulis dow ka mo agalon niglilimudlimud oyjow to poghusoy to soini no mo butang. ⁷ Pogkaponga to malayjat no pogpaap-apulay, nigsasindog si Pidru hoy migkagi, ‘Mgo sulod, nataga kow no nahun-a pig-alam a to Diyus ligkat kaniyo oyjow og panglalag to maroyjow no lalagon diyo to kono no mo Hudiyu, oyjow makarinog kandan hoy ogtuu on. ⁸ Hoy ka Diyus no nataga to puspungon to mo otow nigpamaan no pigdawat din ka kono no mo Hudiyu pinabayjo to pogbogoy kandan to Ispiritu Santu, iling kanta pigbogayjan to soini. ⁹ Waro pigpalabi to Magbabayja iiling do ka pog-alap kanta no mo otow. Pig awangan din ka mo pusung dan so nanu-u on man kandan. ¹⁰ No maniyo naan iyan tog antiyan now ka Diyus pinabayjo to mo hibatoon hoy ka mo babahonon no ka mo kabuybuyjagan hoy kanta waro makababa to soini? ¹¹ Di nigtu-u ki no pinabayjo to grasya to Magbabayja no si Hisus ogkaluwas ki hoy iyan daan sooyjo ka koymtang dan." ¹² Nangahagtong ka songo panungan tagood naminog kandan ki Birnabi hoy ki Pablu no nanglalag to tibo no mo kabolonganan hoy mo koin-inowan no inhimu to Diyus diyo to mo kono no Hudiyu pinabayjo kandan. ¹³ To pogkaponga ran to pogkagi, nigtabak si Santiyagu hoy migkagi, "Paminog kow mo sulod! ¹⁴ Bag-u pad gugura ni Simun ka pogkakita rin to Diyus to pog otow-otow rin to kono no mo Hudiyu pinabayjo to pog-alam ligkat kandan hoy to mo kaot-otawan no kandin dod iyan. ¹⁵ Ka mo lalagonon to mo purupita katuman aman ¹⁶ soin. Sumalo to pigkagi to kasulatan. Kaponga to soini og libod a, nigkagi ka Magbabayja, hoy ogpasasindogon ko ka mo baloy ni Dabid, hoy og pos-ok ko mando soini. ¹⁷ Mamangho to Magbabayja ka duma no mo otow, iling dot tibo no konon mo Hudiyu no pig-omow no oyjow og kaabin kod. ¹⁸ Iyan soin ka pigkagi to Magbabayja, no nigpangmaan no nahun a pad. ¹⁹ Hoy nigparayjon nigkagi si Santiyagu, “Ka sumansuman ku kono tag samokon ka kono no mo Hudiyu no nigdawat to Diyus. ²⁰ Sum-sumana now, ogsulatan ta kandan no kono og mangkoon to maligsom nog kako-on tongod so soini pighalad man diyo to mo diyus-diyus, hoy kono og mahulhuliroy, hoy kono kandan ogkoon to mo ayjam no inpamukol, hoy agad nokoy no langosa. ²¹ Su nahun-a pad ka balaud ni Muwisis inbasa sulod to mo kamalig to aldow to tinghimoloy, hoy to kadaa lungsod piglalag ka mo lalagon din." ²² Nonokog-oyjonay ka mo apustulis, ka mo agalon hoy ka tibo no simabahan to pog-alam to mo otow ligkat to panungan dan oyjow igpaalap diyo to Antioquia duma ki Pablu hoy si Birnabi. Iyan dan alama si Hudas no pigngaranan ki Barnabas hoy si Silas no mo tow no duon katongod amana sulod dan. ²³ Hoy pigpaalap dan soini sulat kandan: "Ka mo apustulis hoy ka mo agalon to simbahan no mo sulod now no nigmaan maan to tibo no mosulod no kono no mo hudiyu no nig-ugpo to Antioquia, to Sirya hoy to Cilicia. ²⁴ Nakarinog koy no duon sakup to kapanungan ta no nigligkat to Hirusalim no nigsasow kaniyo tongod to pigpanglalag agad waro kandan sugua to poghimo to soin. ²⁵ Koy na-an to poglilimod doy, no nakoy oyjonay ka tibo to pog-alam to mo dinihalan oyjow igpohondiyo dan duma on si Birnabi hoy si Pablu, ²⁶ soini no mo otow nigbogoy to kinabuhi dan tongod to pogsunud dan to kanta no Magbabayja no si Hisu-Kristu. ²⁷ No ino-uyan si Hudas hoy Silas, no iyan og ikagi kaniyu isab to iling no batbatonon. ²⁸ Ka Ispiritu Santu hoy kanami nakag-oyjon no kono kow ogbogayjan to mohon-in no mo babatonon wa labot dot amana no og katumanan. ²⁹ Konog pakoonon dot intalapag diyo to mo diyus diyus, konog kakoon ka langosa hoy to mo ayjam no pigpokol hoy kono kow og hulid hy og otob-otob. Ko kono now soini og himowon maroyjow ka pighimo now." ³⁰ No inpaligkat ka mo tinugyanan hoy nigmanghondiyo to Antioquia hoy piglimod dan ka mo magtutu-u hoy pigpangbugayjan to sulat. ³¹ To pogkabasa to otow dot sulat, nangaholo kandan amana so nangabaggot to mo lalagon. ³² Si Hudas hoy si Silas no mo Purupita nanglalag to mo lalagonon diyo to mo mohon-in no mo sulod. Ka soini nakabaggot hoy nakapadoson kandan. ³³ Nalugoylugoy to pogtapus dan duon, pigpaligkat kandan to mo kasulsuluran dan duma to kalinaw hoy naglibod kandan dot nigsugo kandan. ³⁴ (Ka maroyjow no kupiya to soin ni kasulatan pig-awo) ³⁵ Si Pablu hoy si Birnabi nigpakibilin pad to malugoy diyo to Antioquia hoy diyo, binuligan dot duma, nigpang-anad kandan hoy naglalag to lalagonon to Magbabayja. ³⁶ Pogkaponga to pila no aldow si Pablu nigkagi ki Birnabi, “Manglibod ki hoy og looyjon ta ka mo sulod ta diyo to suyidad no pigpangguguran to lalagon to Magbabayja oyjow ogkabontolan ta ko namono on kandan. ³⁷ Kaliyag si Birnabi no igpaduma si Huwan Markus. ³⁸ Di iyan ginhawa ni Pablu no kono igparuma si Huwan Markus so waro man maka aguwanta nigduma kandan taman tog kaponga to mo himu dan di nig uli hoy nig ongkoran kandan diyo to Pampilia. ³⁹ To soini, nakag-apol si Pablu hoy si Birnabi hoy nigpasusuwayoy kandan, pigduma ni Birnabi si Markus hoy nigduhipag kandan diyo to Cipri. ⁴⁰ Hoy si Silas iyan induma ni Pablu hoy si Birnabi hoy nigligkat kandan ponga kandan indihal to mo kasulsuluran pinabayjo to grasya to Diyus. ⁴¹ Nigligad kandin to Sirya hoy to Cilicia hoy pigdusonan din ka simbahan diyo.