¹ Ka noyitabu diyo to Iconio, iyan dod ka noyitabu diyo to Antioquia. Nighondiyo si Pablu hoy si Birnabi to simbaan to mo Hudiyu. Moyitongod to pogpanulu to mo Hudiyu hoy ka kono no mo Hudiyu ka ogtu-u ki Hisus. ² Di ka mo Hudiyu no waro nigtu-u, og-usigon dan ka nigtu-u. ³ Nalugoy diyo si Pablu hoy si Birnabi waro kandan nahaldok to pogkagi moyitongod to Magbabyja. Inpakita to Magbabayja no tutu-u ka inpanulu moyitongod to kandin grasya, su nigbogayjan din kandan to goom to poghimu to mo kabolbolongan no mo kalaglagan. ⁴ Koy na-an, ka nabaad-baad ka mo otow to sikan siyudad; ka duma diyo nig-amut to mo Hudiyu no waro nigpalintutu-u hoy ka duma nig-amut to mo apustulis. ⁵ Duon mo Hudiyu hoy duon da-an ka kono no Hudiyu, duma ka mo pangulu ran, no nigpapalanu no’g hisakitan hoy og banggalon ka mo apustulis. ⁶ To pogkataga to mo apustulis to iyan palanu, namalaguy kandan diyo to Listra hoy Dirbi, to mo siyudad no sakup to Likunya, hoy dapit to palibut. ⁷ Inlalag dan diyo ka maroyjow no guguron. ⁸ To Listra duon otow no pogkol ligkat to pogkootow. ⁹ Tagood to nigpinpinuu kandin naminog kandin to inkagi ni Pablu, nigtongtongan kandin ni Pablu hoy nigkita rin no duon pogpalintutu-u to Magbabayjo no iyan ogmakaroyjow kandin. ¹⁰ Migkagi si Pablu to makosog no kandin “Sasindog ka tularong!” Nigsasindog ka otow hoy nighipanow. ¹¹ To pogkakita to mo otow to nighimo si Pablu, nig-ulaluy kandan to mo kinagiyan dan no mig-ikagi, "Ka mo Diyus nigmanlono dini to kanta no langlanguwan to otow!” ¹² Nigngaranan si Birnabi no ki Zius hoy si Pablu migngaranan ki Hirmis. Ka timpulu no kandan no Diyus no si Zius marani to libuwasan to siyudad. ¹³ Koy na-an ka pari ni Zius nig-alap to lukosan no mo baka no duon baliog diyo to gumawban to siyudad. Kaliyag kandin no mo otow noghalad to apustulis. ¹⁴ To pogkataga ni Birnabi hoy si Pablu to kandin nighimo niggisidan ka kandan no kinabo hoy namalaguy kandan diyo to taliwbaro to mo otow hoy nig-ulaluy. ¹⁵ “Mo sulud, maniyu tog halad kow kanami? Kanami otow koy ro iling kaniyu. Inlalag noy on kaniyo ka maroyjow no guguron oyjow og oo-ongkoran now on ka butang no waro pulus hoy ogdani diyo to Diyus no nighimu to langit, hoy tano, hoy to tibo kayit kalibutan. ¹⁶ Dongan inbalagad to Diyus ka mo otow to pogsunud to kandan no kaugalingon nog kaliyagan. ¹⁷ Di ka tibo no timpu inpoila to Diyus ka kougalingon diyo to mo otow pinabayjo to kandin poghimo no maroyjow nigbogayjan kow to mo uran hoy panahon to tinggaani. No nig tugahan kow to pogkoon oyjow ogkaliyag kow.” ¹⁸ Di agad iyan soini nigkagi to mo apustulis, malisod iyan kandan no og sambag to mo otow noghimatoy to mo baka oyow ighalad kandan. ¹⁹ Duon nokouma no Hudiyu no ligkat to Antioquia no sakup to Pisidia hoy ka duma ligkat to Ikuniyu. Nigdaniyan dan ka otow nog pasakup kandan. Nigbubuligan dan si Pablu tog banggal hoy nigganuy ran diyo to libuwasan to lunsud, to pogsumansuman dan namatoy on. ²⁰ Tagood to niglilingutan kandin to mo tumutu-u, nig-onow kandin hoy niglibod diyo to lunsud. Pogkaasolom nighondiyo kandan ki Birnabi to Dirbi ²¹ Niglalag si Pablu hoy si Birnabi to maroyjow no guguron diyo to Dirbi hoy moon-in ka noyinggat no nigsunud ki Hisu-Kiristu. Pogkataman to sikan niglibod on kandan to Listra, Ikuniyu hoy to Antioqua no sakup to Pisidia. ²² Nigtalosonan dan ka mo tumutu-u duma to pogsayjo no igparayjun dan ka pogtu-u. Dayjun nig-ilingan dan ka tumutu-u, "Dakol ka malogon nog kalisoran no kanta no koilangan nog kabayjaan to pogsulud to gingharian to Diyus.” ²³ To agad hondoi no duon mo tumutuu niglimudlimud, iyan si Pablu hoy si Birnabi nog alam to mo otow no iyan pangulu. Nigpuasa kandan duma to pog-ampo to mo otow no naalam diyo to Magbabayja no nigtuuwan dan. ²⁴ Pogkaponga to sikan, nigbayjo kandan diyo dapit to prubinsiya to Pisidiya hoy nokouma kandan to Pamfilia. ²⁵ Niglalag kandan diyo to Pirga hoy nigsulung kandan to Atalia. ²⁶ Ligkat diyo niglibod kandan to Antioquia no sakup to Sirya, nig-ampu pad ka mo tumutu-u no’g bugayjan to Diyus no waro kaamonuwan to poghipanow ran no kuntoon ogkoimpus dan on. ²⁷ To nokoumoon si Pablu hoy Birnabi to Antioquia nigpagutasan dan ka tibo no tumutuu hoy inpangugud dan ka tibon nighimu to Diyus pinabayjo kandan, hoy ko nokoy ka sumansuman to Diyus ogbogoy to karoyjawban oyjow ogtuu ka kono no Hudiyu. ²⁸ Hoy nalugoy kandan ka nig-ugpo to Antioquia duma ka sumusunud ki Hisus.