¹ Diyo to Iglisya to Antioquia duon mu purupita hoy tagapanulu no si Birnabi, si Simun (no inhimuwan to ngaran no si Nigro), si Lucio (no taga-Cirene), si Manain (no diyo on nig dakol ki Gobirnador Hirodis) hoy si Saulu. ² Sagbuka no aldow to sikan tago-od to nigsimba kandan to Magbabayja hoy nigpuasa, migkagi kandan ka Ispiritu Santu, "Ila-in now si Birnabi hoy si Saulu tongod to hinimu nu iyan hinungdan to pog-umow ko kandan." ³ Koy naan ka nig puasa kandan hoy nig-ampu hoy ingun-gunan dan to mo bulad si Birnabi hoy si Saulu dayjon inpohipanow kandan. ⁴ Koy naan mo sinugo man to Ispiritu Santu si Birnabi hoy si Saulu nangondiyo to Silicia hoy to ligkat diyo niglapas kandan diyo to Cipri. ⁵ To pog-uma ran diyo to Salamis, panggugud kandan to ikagihonon to Dios duma dan si Juan Marcus isip og-bulig kandan. ⁶ Tibaan dan solori ka tibo hantod diyo to Papus, duon dan kitaa ka salamangkiro nu nigngaran ki Barhisus, sagboka kandin no Hudiyu no nig pa tuu no sagboka kandin no Propita. ⁷ Duma kandin ni Sirgio Paulu, ka Gubirnadur to sikan no banwa sagboka no otow no magaan og sabot. Si Birnabi hoy si Saulu inpo-omow to Gubirnadur oyjow og paminog to kagiyon to Magbabayja. ⁸ Di nigbalabagan kandan ni Ilimas, ka salamangkiro soini ka ngaran din ko Griyigo, so ogkaliyag man si Ilimas no kunog tuu ka Gubirnadur. ⁹ Hoy si Saulu no namaanan to ngaran ni Pablu no napono to balaan Ispiritu nigtongtong dot salamangkiro. ¹⁰ Hoy nigkagi kandin, "Anak to tanas! Usig ka to tibo no maroyjow, koykow ka agalon to tibo no maroot hoy limbong, layjon ka og doot to karoyjawan to Magbabayja! ¹¹ Oglogparan ka kuntoon to Magbabayja, hoy og kabotod ka hoy kuno kad ogkita to layjag to aldow to malugoy. Duon dayjun nig-guram ni Ilimas no marosilom on ka og kito-on. Din hoy og kapolod-polod on kandin no og pamitow to og maka-gongon kandin. ¹² Ka gubirnadur nigtuu to Magbabayja tongod to nigkita rin no ko-in nowan no katounan to Magbabayja. ¹³ Si Pablu hoy ka duma rin nig-ongkod diyo to Papus hoy noko-uma diyo to Pirga no tano to Pampilya. Di si Huwan hoy si Marcus nig-bulag kandan hoy nig libod diyo to Hirusalim. ¹⁴ Ligkat to Pirga nighondiyo mando kandan to Antioquia to Pisidia. Hoy to aldow to igpoholay nigsolod kandan diyo to sinaguga hoy nigpinuu diyo. ¹⁵ Pogkatapus to pogbasa to balaud ni Muwisis hoy ka duma no purupita, nigpohondiyo-an kandan to mo agalon to mo sinaguga, no nigkagi, "Mo sulod ku, ko duon mo kinagihan now no moko po init to soini mo otow, ikagi now on kuntoon." ¹⁶ Nigsasindog si Pablu hoy nig-alatiyan din kandan to bulad, hoy nigkagiyan, "Mo sulod ko no Israilita hoy ka tibo no kunon Hudiyo no nigtuu to Diyus. Paminog kow kow! ¹⁷ Ka Dios kai to Israil no nig-alam to mo kaap-apuan ta hoy nighimo kandan no dadakol no nasod to aldow dan no lumalaag to tano to Ehipto. ¹⁸ Solod to 40 no tuig nig padiralom kandan diyo to kohilawwan. ¹⁹ Niglogparan din ka 7 no nasud to Canaan, hoy in bogoy rin kandan hoy kandan on soini. ²⁰ Solod to 450 no tuig, pogkatapus to soini nigbugayjan din kandan to maghuhukum taman to panahon ni Purupita Samuwil. ²¹ To duon no namoyjo kandan to hari, intalad to Magbabayja si Saul ka Kis kaliwat ni Binjamin, oyjow iyag hari to kandan to 40 no tuig. ²² To duon no inpaawwo on kandin to trunu, inhimo to Magbabayja si David no hari dan, soini ka inkagi kandin to Dios. 'Nigkita ko si David. No anak ni Isay, nakapaliyag kanak, no oghimo to tibo no igsugu ko kandin.' ²³ Si Hisus no kaliwat ni David iyan in alam to Diyos oyjow og luwas to koow-otawan to Israil so innangon on. ²⁴ To waro pad nighondini si Hisus, niglalag si Huwan diyo to tibo no otow to Israil no kinangolan og ongkod kow to salo now hoy ogpabonyag kow. ²⁵ Hoy to magaan on og kamatoy si Huwan, nigkagi kandin to ko-otawwan, 'Hontow aman to suman-suman now? Konon kanak ka in tagaran now, di sunud kanak duon oghondini no kono an tumanan agad to pogpowas to sandalyas din.' ²⁶ Mo sulod ku no kaliwat ni Abraham kaniyo tibo no konon Hudiyo no nigtuu to Diyos. Kanta ka nig alapan to kaluwasan! ²⁷ Ka mo otow to Hirusalim hoy ka mo agalon waro nataga no kandin ka ogmaka luwas, waro dan nasabot ka mo kinagiyan to mo purupita no nigbasa to aldow no igpopohulay, di nasi dando siloti si Hisus, natuman dan ka mo inkagi to purupita. ²⁸ Agad waro mabugat dan no katarongan oyjow og silotan si Hisus di nigboyjo dan diyo ki Pilatu oyjow og himatayjan si Hisus. ²⁹ Pogkatapus dan to nighimo ka in kagi mohitungod kandin, nigpurut dan si Hisus diyo to kurus hoy inlubong. ³⁰ Koy naan ka in-oyjag kandin to Diyos. ³¹ Hoy solod to mohon-in no mo aldow migpakita kandin duon to migduma kandin ligkat to Galiliya poiling diyo to Hirusalim. Soikan no mo otow iyan titigus diyo to mo otow to Israil ³² Hoy mighondini koy oyjow og-alap kaniyo to maroyjow no balita. ³³ Ka insaaran to Diyos diyo to mo kaap-apuan ta nog himuon din, inhimo rin soini para kanta no mo kabularan din, pinabayjo to pog oyjag din ki Hisus. Pinabayjo to nahisulat to dangob nu Salmo, 'Koykow ka anak ko; Kuntoon no aldow nohimo-a nu koykow no Amoy! ³⁴ Hoy mohitongod to pog oyjag din ki Hisus oyjow kono ogkamuho, soini ka inkagi to Diyos: 'Igbogoy ko koykow ka balaan hoy panalanginan pinabayjo to insahad ko ki David!' ³⁵ Pinabayjo to pigkagi rin diyo to lahi no kasulatan, 'Kono no isugot no mamuho ka talaan no sugu-onon nu.' ³⁶ No nigtuman si David to insugu to Diyus to kandin no panahun; hoy mamatoy, hoy inlobong diyo to mo kaap-apuan din, ³⁷ hoy mamuho. Di ka in oyjag to Diyos waro namuho. ³⁸ Koynaan mo sulod ku, kinahanglan ogkataga kow no pinabayjo ki Hisus inpanulu kaniyu ka pogpasaylu to mo salo; ³⁹ kinahanglan ogkatagahan now no ka tibo nu nigtuu kandin ogkaluwas to tibo no mo salo mo butang no kono ogkahimo to balaud ni Muwisis. ⁴⁰ Koynaan ka andam kow oyjow konog kohitabu kaniyu ka pigkagi to mo purupita: ⁴¹ "Mo mapampamawoy! kabolong-bolong hoy kangamatoy kow! Su mighimu a to sagboka no butang to kaniyu no panahun nu kono now amana ogtuowan, agad duon ogpanulu kaniyu to soini! ⁴² To pogpanglibwas on ni Pablu hoy si Birnabi diyo to sinaguga, inhangyu to mo otow kandan to poglibod to sunud no aldow to tinghimoloy oyjow ogpapanulu pad kandan mohitongod to soini no mo butang. ⁴³ Hoy naponga ka poglilimod diyo to sinagoga, insundul si Pablu hoy si Birnabi to mohon-in no mo Hudiyu hoy kono no mo Hudiyu kanakabig diyo to tinuuhan to mo Hudiyu. Pigdasig to mo apustulis to kono igpa-ongkod diyo to grasya to Diyos. ⁴⁴ Sunud no aldow to tinghimoloy, tibo no mo otow to lungsud mighondiyo to pogpaminog to lalagon to Magbabayja. ⁴⁵ To pogkakita to mo Hudiyu to mohon-in no mo otow, nasina kandan hoy nigsupak to in kagi ni Pablu hoy mig-insultu kandin. ⁴⁶ Hoy migkagi kandan, 'Kinahanglan kanIYU ka hun-a nog panuluon to lalag to Diyos. Di su waro now man dawata katamanan; ongkoran doy kaniyu hoy mongondiyo koy to mo otow no konon Hudiyu. ⁴⁷ Su iyan soini ka insugu kanami to Magbabayja: "In-alam ko koykow no kalayjag para to kono no mo Hudiyu, oyjow pinabayjo koykow ka kaluwasan ogpakaoma hangtud to uud to kalibutan." ⁴⁸ To pogkarinog soini to kono no mo Hudiyu naliyag kandan hoy indayjan dan ka lalag to Magbabayja, hoy ka in-alam para to kinabuhi no warog tamanan ogkohimo no matinu-owon. ⁴⁹ Hoy niglogob on ka lalag to Magbabayja to tibo no dapit to soikan no tano. ⁵⁰ Di ka mo tinahud hoy ka mo maninimba no mo boyi to soikan no siyudad pigdasig to mo Hudiyu oyjow ogpasipalahan dan si Pablu hoy si Birnabi hoy ogdugilon dan. ⁵¹ In ug-ug to mo pustulis ka abug to mo paa ran hoy migdayjon diyo to Iconio. ⁵² Naliyag amana ka mo tinuonan hoy napono to Ispiritu Santu.