¹ To panahon no nighari si Hirudis nigbunsuran din on tog pabaybayjaran ka mo sakup to simbahan. ² Inhimatayjan din si Santigayu no sulod ni Huwan pinabayjo to kampilan ³ To natagahan din no narago ka mo Hudiyu to inhimo rin, inparakup din do na-an si Pidru. Noyitabu soin to kohulugan to pan no waro parakol. ⁴ To nadakop on si Pidru in pa pirisu on hoy in patamongan to hup-at no panong no mo sundalu. Nigsuman-suman si Hirudis to pog pan-inso-inso kandin ko og kaponga on ka kohulugan to Pogligad. ⁵ Koy na-an si Pidru dayjon pad no napirisu di ka mo duma rin to simbahan aman no nig-ampu diyo to Diyus oyjow nog pakaliwas kandin. ⁶ To sikan no marusilom no igdayjun on ni Hirudis igbogoy diyo to mo otow, to nokohirogo on si Pidru inpataliwaroan to daruwa no kadina hoy in pabantayjan pad to mo sundalo ka gumawan to pirisuhan. ⁷ Hoy saguguno nigpakita ka sagboka no Diwata to Magbabayja hoy duon kalayjag no nakatang-ow to pirisuwan. Hoy in pan goyjong-goyjong to Diwata ka pananayjon ni Pidru, inpukow kandin no nigkagi, “Onow ka!” Hoy saguguno nangapokas ka kadina no inhikot to bulad din. ⁸ Hoy ka Diwata nigkagiyan kandin, “Suut ka to pakabo ka hoy sisinilas ka." Hoy intuman soin ni Pidru hoy ka diwata nigkagi, “Suot kat pakabo hoy sundul ka kanak.” ⁹ Nigsinundol si Pidru to Diwata hoy niglibwas kandan to gumawan to pirisuwan. Di waro kandin nataga ko tutu-u buwa iyan ka inhimo to Diwata so nangon din no nakakita ro kandin to sinoilow. ¹⁰ Nigbayjo kandan to an-anayjan no nigbantoy hantud to igkaruwa hoy noko-uma on kandan to gumawan no putow nog poiling diyo to siyudad ka gumawan natukasan do hoy niglibwas kandan no nigpagindaan hoy saguguno nig awo on ka Diwata. ¹¹ Hoy to natagaon si Pidru no tutu-u ka noyitabo kandin hoy nakakagi kandin, “Kuntoon nataga ad no tutu-u iyan ka Magbabayja inpoondini rin ka Diwata hoy ogluwas kanak ligkat to goom ni Hirudis ka tibon noyitabo no inpasabut to mo Hudiyu.” ¹² To pogkataga-taga ni Pidru to tutu-u no noyitabo kandin, nighondiyo kandin to baloy ni Mariya no inoy ni Huwan no in ngaranan dan ki Markus. Mohon-in ka mo otow no nangalimud-limud diyo hoy nig-ampu. ¹³ Nigpanoktok si Pidru to mintod, hoy si Ruda no suguanon iyan nigtukas. ¹⁴ Noilahaan din ka lagong ni Pidru di tongod to karago din nigliku nigsulud kandin no waro pad natubasi ka gumawan oyjow to pogpahitaga kandan no diyo si Pidru to libwasan. ¹⁵ Di nig-ikagi kandan, "Ogkalibog ka!" Di nigkagi iyan kandin dutun iyan si Pidru to libwas. Koy na-an nigtabak kandan, “Ka Diwata rin sikan.” ¹⁶ Tagood no si Pidru nigdayjon nigpanuktok diyo to gumawan to nigtukasan dan on ka gumawan nakita ran si Pidru hoy amani kandan noinu-inu. ¹⁷ Pinabayjo to bolad din nig alati to hagtong kow hoy inpangugud ni Pidru pig amono to Magbabayjo tog palibwas ligkat diyo to pirisuhan. “Inangon now soin ki Santiyagu hoy to tibo no mo sulod ta“ Nigkagiyan din kandan hoy nap-an nighondiyo on kandin to loin no banwa. ¹⁸ To masolom on , nanasasow on amana ka mo nigbantoy so waro dan natagoyi ko nokoy ka noyitabu ki Pidru. ¹⁹ Inpapamitow ni Hirudis di waro dan nakita hoy na-an inpanginsa-an din ka mo nigbantoy hoy in panhimatayjan to naponga soin, nighondiyo si Hirudis to Cisarya puun to Hudiya hoy diyo pad kandin nig-ugpo. ²⁰ Nalanglangotan si Hirudis to mo otow to taga-Tirus hoy to taga-Sidun koy na-an hoon-inan kandan no nighondiyo ki Hirudis oyjow to pogpakigkita hoy noyinggatan dan si Blastu no sinaligan in diyalan to palasyu to pogbulig kandan. Hoy naan nighondiyo kandan ki Hirudis. ²¹ To aldow to in kaujunan dan, nigkikinabu on si Hirudis to kinabu no harianon, nigpin-nuu kandin diyo to turunu hoy nigkiglalag kandan. ²² Namanguloyi ka mo otow, “Kono no otow ka nigkagi ko kono Diyus!” ²³ Hoy saguguno in logparan si Hirudis to Diwata to Magbabayja so waro din man pabantugi ka Magbabayja nig iyasan on kandin hoy namatoy. ²⁴ Di ka lalag to Magbabayja nigparayjon hoy niglogob. ²⁵ Si Birnabi hoy si Saulu naman liku puun to Hirusalim to napongo-on kandan to misyun dan induma si Huwan hoy si Markus.