¹ Nakarinog ka mo apustulis hoy ka mo karumaan to tibook Hudiya no ka mo kono no Hudiyo nakarawat daan to batbatonon to Diyos. ² To poghondiyo ni Pidru to Hirusalim, kandan ka nangosog to poghimo to Sirimonyas to pogtuli insuwa kandin. ³ "Maniyo nig hondiyo ka to mo otow no waro natuli hoy nakigtugon kandan?" ⁴ Koynaan inlalag ni Pidru diyo to kandin ka tibo no noyitabo ligkat pad to bunsoranan nigkagi kandin. To diyo a to siyudad to Hopa. ⁵ Nig-ampu a hoy napaypayjaan ko ka nasoilow ko no angod to sagboka no dakol no logdak no ongikutan ka upat no Iskina hoy intuntun ligkat to langit hoy nigsagdok to dani ko. ⁶ Insusi ko ka solod to soini hoy nakita ko ka mo ayjam no hup-at ka paa, mo ayjam nog pananap hoy ayjam no mo bayjako. ⁷ No nakadinog a to lagong no nigkagi, 'Pedro, sasindog ka! I-iyow ka hoy koon ka!' ⁸ Di nagtabak a "Kona-a Magbabayja, so ligkat pad huhon-a waro a makakoon to agad nokoy no maligsom.' ⁹ Ka lagong nigkagi man do ligkat to langit, 'Kono no sum-sumana no maligsom no inhiroyjawan on to Diyos.' ¹⁰ Katatulo soin mayitabo hoy ka logbak duma ka tibon solod to soini niglibod diyo to langit. ¹¹ No sikan iyan no higayona tatulo no otow ligkat to Cisarya no insugo to pogpurot kanak nako-uma to baloy no indatongan ko. ¹² Ka gimukod nigkagi kanak to pogduma kandan no waro duwa-ruwa. Soini hun-om no patalahari no taga-Hupa nigduma kanak diyo to Cisarya no tibo kanami nigparagas diyo to baloy ni Curnilio. ¹³ No inpamatbat koy mayitongod to diwata no napitow din no nigsasindog solod to baloy din hoy nigkagi kandin, 'Panugo ka to mo otow diyo to Hupa hoy ipapurot si Simon no in-ngaranan to Pidru. ¹⁴ Duon batbatonon din no makaluwas koykow dow ka baloy nu." ¹⁵ 15 To pogbugdang ko to pogkagi nigsuloran kandan to Ispiritu Santu angod to nigsuloran ki to binunsaran. ¹⁶ Nataga kanak to lalag to Magbabayja, ko inmonu pog-ikagi, "Si Juan ogbawtismu pinaagi to woyig, di kaniyu bawtismuhan pinaagi to Balaan no Pinisingon." ¹⁷ No ko Dios ogbogoy kandan to iling no gasa no inbogoy kanta ko ogtuu ki Hisu-Kristu no Magbabayja, hontow ma kanak no og-ohot to Dios?" ¹⁸ To pogkadinog dan, waro kandan nigtabak, koynaan pigdayjan amani ka Dios hoy nigkagi, "Ka Magbabayja inbogoy ka poghinulsul para to umul diyo to mo kono Hudiyu dogma." ¹⁹ Puun to pogpatoy ni Istiban, nonokogsuwoy-suwoy on ka migmalintutuu tongod to pogbayjad-bayjad kandan. Ka duma, nokohondiyo to Pinisiya, to Sipri, hoy diyo to Antiyukiya, no impangguhud dan ka Maroyjowno Batbatonon diyo do to mo Hudiyu. ²⁰ Piru duon duma no matig-Sipri hoy matig-Sirini no migpalintutuu ki Hisus no miggondiyo dogma to Antiyukiya, no migpabatbat to Maroyjow no Batbatonon mohitingodd to Magbabayja no Hisus diyo to kono no mo Hudiyu. ²¹ No duom goom to Magbabayja diyo to kandan hoy puun dutu, masalig amani ka migpalintutuu hoy migsalig to Magbabayja. ²² No soini so nohitabu, nadinog to mo punduk to migmalintutuu diyo to Hirusalim. Koynaan impohondiyo dan on si Birnabi to Antiyukiya. ²³ To pogginguma rin diyo, naliyag kandin to nakita rin no ingkoyid-u to Magbabayja ka mo otow diyo. No imbaggot din sikandan no og-ikul to Magbabayja puun to pusung dan hoy kono og-ongkod no ogsalig kandin. ²⁴ Maroyjow no otow si Birnabi, naponu sikandin to Panisingan to Magbabayja hoy manokal ka pogpalintutuu rin. No amani no masalig no otow ka migpalintutuu te Magbabayja. ²⁵ Nataman, miggondiyad on si Birnabi to Tarsu ka ogpammitow ki Saulu. ²⁶ To hongkayi to nakita rin on si Saulu, induma rin on diyo to Antiyukiya. No migduma-ruma kandan to mo punduk to migmalintutuu diyo solod to songo log-un, hoy masalig no otow ka napanulu dan. Ka mo tinuonan diyo to Antiyukiya ka an-anayan no migngaranan to Kristuwanon. ²⁷ To sooyo no timpu, duon mo prupita no migpangondiyo to Antiyukiya no diyo ogpuun to Hirusalim. ²⁸ No duon sagboka kandan no ogngaranan ki Agabu no migsasindog, no pinaahi to goom to Panisingan to Magbabayja, migpangguhud kandin to impanongnong to Magbabayja no duon dakol no gutas no ogginguma to intiru no kalibutan. Noyitabu soini to timpu no si Klawdiyu ka Impiradur diyo to Ruma. ²⁹ No puun dutu, nonokogsabut ka mo tinuonan no ka tagso sagboka kandan ogpouyan sumalo to ogkoyimu ran no igbulig to mo duma ran no migpalintutuu ki Hisus diyo to Hudiya. ³⁰ No innimu ran sooyo, no nataman, impouyan dan on ongki Birnabi hoy ki Saulu oyjow igbogoy diyo to mo igbuyag to migmalintutuu.