¹ Ka agad hontaw no nigpalintutuu no si Hisus ka Kiristu, anak kandin to Diyus. Ka agad hontow no niggoynawa to Amoy, niggoynawaan daan to anak din. ² Soini ka ogkatagaan ta no niggoynawaan ta ka mo anak to Diyus. Ko oggoynawaan ta ka Diyus hoy ogtumanon ta ka mo sugu din. ³ Su ka pogtuman ta to mo sugu to Diyus ka ilahanan no niggoynawaan ta kandin, no ka mo sugu din kono no amana mabogat. ⁴ Su ka agad hontaw no anak to Diyus, ogkaraog rin on ka kalibutan, ogkaraog ka kalibutan pinabayjo to pogpalintutuu ta. ⁵ No hontaw man ka ogpakaraog to kalibutan? Sooyjo do iyan so mo otow nu nigpalintutu-u no Anak to Diyus si Hisus. ⁶ Si Hisu–Kiristu ka nighondini to ampow to tano no nigbawutismo to woyig hoy nigpatigis to langosa rin, su kono no iyan kinangolan ka woyig, ko kono, ka langusa daan, no iyan titigus ka Ispiritu, su ka Ispiritu ka kamatuoran. ⁷ No duon tatulo no titigus moyitongod ki Hisu Kristo. ⁸ Ka Ispiritu to Diyus, ka woyig, hoy ka langosa, no soini so tatulo nokog-uyun. ⁹ Ko ogtuohan ta ka pogtitigus to otow. Labi pad no ogtuohan ta po titigus to Diyus su soini ka intitigos buhin to anak din. ¹⁰ Koy naan sikan so nigtuu to Anak to Diyus, nigpamatuod soini duon to pusung din. Di ka waro nigtuu to Diyus, nigsumansuman no ubaton ka Diyus su waro din tuuhi ka intitigos to Diyus moyitongod to anak din. ¹¹ No iyan soini ka pogpamatuod, nigbogayjan ki to Diyus to kinabuhi no waro ogtumanon, no soini so kinabuhi diyo nigligkat to anak din. ¹² Ka agad hontaw nu nigdawat to anak, duon on kinabuhi no waro ogtamanan di ka waro nigdawat to anak to Diyus waro iyan kinabuhi. ¹³ Insulatan ko kaniyu tibo no nigtuu to ngaran to Anak to Diyus oyjow ogpakataga kow to duon kinabuhi now no waro ogtamanan. ¹⁴ Hoy ogmakasalig ki to Diyus no agad nokoy ka ogbuyjoon kandin sumalo to kandin ka bubut-on. Ogpamminog kandin. ¹⁵ No tongod su nataga ki no ogpamminog kandin ko nokoy ka ogbuyjoon ta kandin, ogpakataga ki daan no ogkarawat ta ka inbuyjo ta kandin. ¹⁶ Aman ko duon ogkakita now no suwod now nu nakayimu to salo no ogkapasaylo to Diyus. Kinangolan no ig–ampu now kandin hoy ogbogayjan kandin to Diyus to kinabuhi, no iyan do ogbogayjan sooyjo su nokoyimu to salo nu ogkapasaylo. Di duon iyan salo no kono ogkapasaylo, hoy kono kinangolan no ig–ampu now pad ka nighimu to iling duon no salo. ¹⁷ Ka tibo himu maroot, salo, di duon salo no ogkapasaylo. ¹⁸ Nataga ki no waro anak to Diyus no ogparayjon oghimu to salo, su nigtantanuran kandin to anak to Diyus, nu ka Satanas kono ogpokohilabot kandan. ¹⁹ Ka soini so intiru nu kalibutan, in–alap ni Satanas, di nataga ki naan no anak kid on to Diyus. ²⁰ No nataga kid on daan no nighondini to ampow to tano ka anak to Diyus hoy inbogayjan kid kandin to pogsabut oyjow ogmokoila ki to tutuu no Diyus. Ka kinabuhi ta duon to tutuu no Diyus to anak din nu si Hisu–Kiristu. Kandin ka tutuu no Diyus hoy ka kinabuhi nu waro ogtamanan. ²¹ Mo anak, lipasi now ka mo diyus-diyus!