¹ Mo pinalanggo ko no mo anak, insulatan ku kaniyu oyjow kono kow ogpakasalo. Di ko duon man ogmakasalo, duon matarong no igpataliwaro kanta diyo to Amoy, no kandin si Hisu–Kristu. ² Kandin iyan ka inpanubad to mo salo ta oyjow ogkapasaylo ki, hoy kono ka kanta ro no mo salo, ko kono, ka mo salo mando to tibo no mo otow kayi to kalibutan. ³ Ko ogtumanon ta ka sugu to Diyus, makapamalohot ki no nokoila ki kandin, ko ogtumanon ta mo sugu din., ⁴ Ko duon ogkagi to nokoila ki kandin to Magbabayjo no kono ogtuman to mo sugu din, ubaton kandin hoy kono no tutu-u ka pogtuu ran. ⁵ Di ka nigtuman tu sugu din, diyad iyan to kandin ka pog–olog to Diyus no ligkat duon ogkatagaan kid on duon kid on to Magbabayjo. ⁶ Ko hontow ka ogkagi to duon o kandin to Magbabayjo, no kinangolan no ugpo kandin anat to pog–ugpo ni Hisu–Kristu. ⁷ Miggoynawaan ku no mo sulod. Kono no bag-u soini no sugu no insulat ku kaniyu. Dongan pad soini no mo sugu hoy duon on soini to kaniyu to binunsuran pad. Iyan soi ka lalagon no narinog now. ⁸ Di ka soini no sulat bag-u kaniyu no sugu, hoy ogkakita now ka tutuu no si Kiristu hoy duon mando to kaniyu, su ka karusilomi nigligad hoy ka tutuu no kaawang niglayjag on. ⁹ Ka hontow no nig–angkon no duon on kandin to malayjag di ogdomot do to mo sulod din, diyo pad kandin to marusilom. ¹⁰ Hoy hontaw ka niggoynawa to mo sulod din, duon on kandin to malayjag no waro agad nokoy no ogmakaamong-among no ogpalasalo ka duma rin. ¹¹ Di ko ogdomot to sulod din, duon pad to marusilom hoy marusilom pad ka pog–ugpo din. Nakaparagas kandin diyo to marusilom no waro nataga ko hondoi ogparolog su kaanat on to butod no marusilom so pogpitow rin. ¹² Mo anak, nigsulat a kaniyu su inpasaylo on ka mo salo now tongod ki Kiristu. ¹³ No kaniyu so mo Amoy, migsusulat a kaniyu so nakatukod kow on kandin, no duon on tahan to binunsuran pad. Migsusulat a mando kaniyu no mo lukos–lukos, su naroog now on si Tanas. ¹⁴ Migsulat a kaniyu no mo anak, su nakatukod kow on man to Amoy. Migsusulat a kaniyu to mo Amoy, tongod su nakatukod kow kandin no duon on tahan kaniyu to bunsuran pad. Nigsusulat a kaniyu to mo lukos–lukos, tongod so manokal on, hoy duon on to kaniyu ka lalagon to Magbabayjo, hoy nadoog now on ka Tanas. ¹⁵ Kono now goynawai ka maroot kayi to kalibutan hoy agad nokoy no kayi to ampow to tano. Ko oggoynawa on now sikand, waro goynawa now diyo to Amoy. ¹⁶ Su ka tibo no maroot kayi to kalibutan, anat to pogkoibog to kono no maroyjow, ogkaayjat ko nokoy ka ogkakita ta, hoy ka pogpahambog to mo otow, kono no diyo ogligkat to Amoy su kayi to kalibutan. ¹⁷ Ogkaawo ka kalibutan hoy ka tibo no maroot no ogkaibogan to mo otow. Di ka ogtuman to karoyjowi to Magbabayjo ogkauyjag to waro ogtumanan. ¹⁸ Mo anak, soinid on ka katamanan to timpu. No sumalo to narinog now, oghingumo on ka ogkuntoro ki Kristu, no agad kuntoon mohon-in on ka nanginguma no ogkuntoro kandin. No ligkat duon, ogkataga kid on no soinid ka katamanan to timpu. ¹⁹ Ka sikan no mo otow nangawo kayi to kanta, di kono no molohot no duma ta kandan ta no nigpalintutuu. Ko malohot pa kandan no mo duma ta, waro ki poron kandanongkoyi, hoy ka soini nigpoila no kono ta kandan tutu-u no duma. ²⁰ Di kaniyu pigbogayjan ni Kiristu to Ispiritu Santu. Di nataga kow tibo to kamalohotan. ²¹ Nigsulatan ku kaniyu no kono su waro kow mataga to kamalohotan, ko kono su nataga kow on, hoy natagaan now mando no waro ubat no ligkat to kamalohotan. ²² Hontow naa ka ubaton? Sooyjo no nakig–apul no si Hisus kon kono no Kiristu. No soikan no otok ka ogkuntoro ki Kiristu mig–apul moyitongod to Amoy hoy Anak. ²³ Ka tibo no kono og–angkon to anak, waro maan diyo to kandin ka Amoy. Ka og–angkon to Anak, diyo naan to kandin ka Amoy. ²⁴ Gon-goni now ka narinog now no ligkat pad to bunsuranan. Ko ogtumanon now soini ogpabilin kow no nasagboka duon to Anak hoy Amoy. ²⁵ Hoy ka intugon ni Kristu kanta iyan naan ka kinabuwi ta waro ogtamanan. ²⁶ Insulatan ko kaniyu, mayitongod to sooyjo otow no palaag-laag kaniyu. ²⁷ No kaniyu, nig-ugpo on duon to kaniyu ka Ispiritu no narawat now ligkat ki Hisus hoy konad on no ka anatan no ogpanuluon kow pad to agad hontow, su ka Ispiritu din on ka ogpanulu kaniyu tibo, no malohot ka igpanulu din, kono no ubat. Koy naan parayjon kow no ogpo diyo to kandin sumalo to inpanulu din kaniyu. ²⁸ Sikan naan mo anak, parayjon kow ugpo diyo to kandin su oyjow to timpu to pogpakita rin, waro kahaldok ta hoy waro ogkasipod ta kandin to aldow to poglibod din. ²⁹ Natagaan no no si Kiristu matularong, koy naan nakasiguro kow iyan no ka tibo no mo otow no nigtularong ogkoyimo no Anak to Diyus.