¹ Nayan dimolod ki Jesus se kandin menge Tinoladaan aw neg-insa, "Sinu lay se onto melangkaw te kedita nga nekeawop te peghari te Timanem?" ² Tinawal i Jesus se sebad ke bata aw impesinalo din kandan. ³ Alayan minikagi sikandin, "Te pegkebenal, kon eked niyo todai se kenyo pegkeotawen iling te menge dedeitek mengisu siini, eked kaw onto pekeawop te peghari te Timanem. ⁴ Kay se otaw egpedana iling te bata siini, yan se melangkaw te kedita nga sakop te peghari te Timanem. ⁵ Aw si bisan sinu tongod te kandin pegtaking kanak kominawa te bata nga iling kani, kiminawa heman kanak. ⁶ Meneng bisan seini nga meinang lekatan te pegtanan te menge dedeitek kemengisuan te kandan pegpemenal kenaken, mepiya pa iketan se kandin lieg te gilingan nga bata aw idagdag sikandin doton te lawod. ⁷ Mekeido se menge otaw dini te keneyonan so se pegtintal gayed domateng kandan. Hinuon, mehitabo gayed ini. Meneng mekeido onto se menge otaw nga sikandin se menintal te kandin isig ke otaw. ⁸ Kon se kamno belad aw benis meinang lekatan te kamno pegtanan kenaken, tepoi iyan aw egbeli! So mas mepiya pa nga sebad olo se kan belad aw benis meneng doen pedowa nikaw nga wedad tinemanan kay se kumplito se kamno balad aw benis meneng iagbel ka man doton te apoy nga neglegablegab te wedad tinemanan. ⁹ Aw kon se kamno mata meinang lekatan te kamno pegtanan kenaken, logiti iyan aw egbeli! So mas mepiya pa nga sebad olo se kamno mata meneng doen pedowan nikaw nga wedad tinemanan kay se kumplito se kamno mata meneng iagbel ka man doton te apoy te impirnu. ¹⁰ Bentayi nga eked niyo lindoi bisan se sebad ke menge bata siini kay se benal se menge Anghil te Timanem nga negsagman kandan kioen gayed te sinelohan te kenaken Amay te langit. ¹¹ Kay siak se Bata te Otaw dimini dini te keneyonan te pegpelowa te menge otaw nga nengetalon tongod te menge sala. ¹² Kon se sebad ke otaw doen 100 ke menge karniro aw metalon se sebad niya eden man se kandin inangen? Sigorado gyod nga tenanan, din se kesiyaman teg siyam (99) nga nenabsab doton te buntod aw pemehaen din se karniro nga netalon. ¹³ Aw kon kitaen din den ini meleba onto sikandin, se benal onto dakel se kandin keluba te sebad nga netalon nga kinita din kay te 99 nga weda ketalon. ¹⁴ Yan heman se betien te kenyo Amay doton te langit eked sikandin keibeg nga metalon se bisan sebad ke dedeitek menge bata. ¹⁵ Kon se kamno doma egpemenal nekesala kamno, dotoni sikandin aw ikegihi te kandin ininang nga sala. Meneng inangi ini nga kenyo olo! Ken menenalan sikandin kamno, megkesinabot kaw toda, aw mepeliko mo sikandin te Timanem. ¹⁶ Meneng kon eked, pengibing ka te sebad o dowa megtotoo amon metoman no se nesolat nga te kenyo pegbelawbelaway doen meketistigos te dedowa aw telo ke otaw. ¹⁷ Meneng kon eked pa gyod sikandin penenalan kandan, ikegihi ini diya te simbaan, meneng kon eked pa gyod sikandin penenalan kandan ikai niyo den egtagad. Eneng-enengi den niyo nga iling sikandin te menge otaw nga weda pemenal te Timanem aw iling te menge mengoliktahay te buwis. ¹⁸ Se kebanalan, pengkey eden se eked niyo tuguti dini te lanto tana yan heman se eked tuguti te Timanem, aw pengkey eden itugut niyo yan heman se intugut te Timanem. ¹⁹ Aw ibeg ko nga metegahan niyo kon se dowa kenyo dini lanto tana megkeoyon te bisan eden se kenyo pemoyoen pineokit te pegtawal-tawal, inangen iyan para kenyo te kanak Amay te langit. ²⁰ Kay kon doen dowa aw telo nga metipon tongod kena ken siak doma kandan." ²¹ Dimolos si Pedro ki Jesus aw neg-insa, "Timanem, kon se kanak kedowa gayed mekesala kenaken, kepila ko ba pegwedadi se kandin sala, mekepito ba?" ²² Timaba si Jesus kandin, "Kena olo kepito, kon kena kepitoan teg pito. ²³ Kay se peghari te Timanem iling te sebad ke hari nga neg-osay te menge otang te kandin menge sugoenen . ²⁴ Te peg-osay din te kandan menge otang, inibing diya kandin se sogoenen nga nekeotang kandin te milyun. ²⁵ Tongod kay eked sikandin pekeimpas se hari negsogo nga ibeligya sikandin amon iallang dom te kandin esawa aw menge bata. Aw beligya heman se kelahat din menge kedonan amon mebeyadan din se kandin otang. ²⁶ Se sogoenen limohod kidoen te sinelohan te kari aw migpeido-ido nga minikagi, 'Pasensiyahi a bag ona kay beyadan ko lang sikona te kelahat.' ²⁷ Neido se hari kandin, nayan pigpesaylo sikandin aw wedad den pebeyadi se kandin otang, aw pigpeoli sikandin. ²⁸ Te peg-uli sidekey sogoenen nesongon din se kandin doma sogoenen nge nekeotang kandin te deitek kentidad. Pig-ogpas din sikandin, pineleng, aw pigkegihan, 'Beyadi se otang nikaw kanak!' ²⁹ Limohod se kandin dema sogoenen aw negpeido-ido kandin, 'Pasensiyahi a bag ona kay beyadan ko lang sikona.' ³⁰ Meneng weda gayed sikandin keibeg. Impepriso in beling sidekey nga sogoenen taman te sikandin nekebayad. ³¹ Pegkita nida te doma nga menge sogoenen negoal dan onto, aw yan dimoton dan te kandin hari aw in-indan dan se neinang siyan. ³² Impetawal te hari se sogoenen aw pigkegihan, 'Onto ka medaet sogoenen, pigpesaylo ko sikona aw kamno otang kenaken kay negpeido-ido ka. ³³ Ngalay man weda no keidowi se kamno doma sogoenen iling te pegkaido te kamno?' ³⁴ Neopal onto se hari kandin. Impepriso din ini amon nga mesilotan taman te mebeyadan din se kelahat din otang." ³⁵ Aw yan minikagi si Jesus kandan, "Yan heman se inangen kenyo te kenaken Amay te diatas te langit kon eked kaw pekepesaylo te kenyo doma otaw te lekat te kenyo pusung."