¹ Siini menge keduwa, aw doen sebad kenyo nga medagdag te pegpekesala, sikeyo se toltolan te Espirito Santo angay talaban sikandin amon lumiko sikandin te benal pegkinabuhi. Meneng keilangan niyo ini te keido nga pemeokit. Aw eg-aha kaw peman te kenyo pegkaotawen se besi aw mekesala kaw peman toda. ² Pagtalabanay kaw te kenyo menge problima. So nayan ini se kenyo inangen meluman niyo se sugo i Cristo. ³ Aw doen sebad kenyo neg-aneng-aneng nga impurtanti sikandin se benal wedad linekatan, eglimbongan den se kandin pegkeotawen. ⁴ Se meteg sebad keilangan onto megsusi te kandin pegkeotawan, aw kon kitaen din se mepiya se kandin ininang, meluba sikandin. Meneng eked din kendii se kandin pegkeotawen te duma otaw. ⁵ Kay se meteg sebad doen serili tulubagon te kandin ininang. ⁶ Se negkeliwat te Kristohanon nga mege tulumanon angay telabanan begayan megtulada kandin. ⁷ Eka niyo eglimbong te kenyo pegkeotawen. Wedad otaw nga mekelimbong te Timanem. So aw eden se egtanem te otaw yan peman se kandin popoen. ⁸ Aw sunuden tadon se keugelingon ibeg tadon, medawat tadon se silot nga wedad tamanen. Meneng aw sunuden tadon se ibeg te Espirito Santo, medawat tadon lekat kandin se pedowan wedad tamanan. ⁹ So nayan eked ki lenga te peg-inang te mepiya, kay aw megpedeleg kidon, dumateg se penahon medawat tadon se ganti. ¹⁰ So nayan doen kehigayonan eked tadon pepengahi se inang te mepiya doton te kelahat menge otaw, aw labi pa te kenita menge keduwa te pegpemenal. ¹¹ Siak si Pablo se simolat te tenenaman te kagi, tengtengi niyo aw eden se kedaekl te menge litra. ¹² Se menge otaw migleges kenyo megpetuli ibeg ulo megpelangkaw doton te kandan duma Judio nga simunod kandan menge Seremonya. So nelemitan dan pemelengen aw itulada dan se kemetayen olo i Cristo. So nayan se mekeluwa se menge otaw lekate sala. ¹³ Pengkey negpetuli dan mismo weda heman tumani se belaud, ibeg dan ulo megpetuli kaw amon ipalangkaw dan aw sumonod kaw te kandan seremonya. ¹⁴ Meneng alang kenal. wedad a lain ikepelangkaw aw kena kemetayon te krus te kenitadon Ginoong Jesu-Cristo. Kay tepad te kandin kemetauen te krus, se mnge kedunan dini te keneyunan weda den bili alang kanak. Kagi nga siak wedad bili te keneyonan. ¹⁵ Kana mehinungdanon aw tulien kidon aw weda, se labing mehinungdanon yan kelingen tadon den se Timanem. ¹⁶ Se kelahat peden menge otaw nga pinemalli te Timanem aw negtuman te kanak pigtulada mekedawat te kelinaw aw keido. ¹⁷ Lekat siini, eka den niyo egpemegay kanak belisi se menge se menge ugat te kanak lawa nagapamatuod nga pigtoltol ko se menge insugo i Jesus. ¹⁸ Menge keduwa, penelenginan kaw peden te kenita Ginoong Jesu-Cristo. Amin