¹ Nematay kaw kedengan te etobangan te Timanem tanda te kenyo menge peglapas aw sala. ² Eg-ilingen niyo se medaet aneng-aneng te menge otaw dini te keneyonan. Kedengan, sakop kaw i Satanas yan se pengolo te menge ispirito egbaya-baya dini te kenegonan. Aw sikandin geman se ispirito egbaya-baya te menge otaw kena egtolo te Timanem. ³ Kedengan, unawa kidon heman kandan; neg-ugpa kidon kidoen te kenitadon tawhanon pedowan. Se ibeg te kenitadon aneng-aneng aw te kenitadon lawa yan olo se kenitadon tinolo, aw sidekey keogpa tedon, meapil kidon peden te kelahat dan anay ipelumun. ⁴ Meneng onto egkeido se Timanem, aw dakel se pedowan di kenitadon. ⁵ Pengkey nematay kidon te kandin etobangan tanda te kenitadon menge sala, inantay kidon din doma te Cristo. (Nayan pineokit te tabang te Timanem impelowa kidon din te sala.) ⁶ Aw tanda te kenitadon pegsebad ki Cristo Jesus neantay kidon doma kandin oglomowan doma kandin te langitnon gingharian. ⁷ Ininang din ini amon ipekita te kelahat, te domateng menge adlaw, aw eked matupngan tabang aw kepiya imbegay din kenitadon pineokit ki Cristo Jesus. ⁸ So tanda te tabang te Timanem melowa kaww pineokit te kenyo pegpemenal ki Jesu-Cristo. ⁹ Seini bowang lekat te Timanem aw kena pineokit te kenyp menge eg-inangen, nayan wedad palos megpelangkaw-langkaw. ¹⁰ Ininang kidon te Timanem; aw te kenitadon pegsebad ki Cristo Jesus imbegayan kidon din kaling pedowan, amon meinang tadon se mepiya menge inang. Lekat pa kedenga yan ini se pig-aneng-aneng te Timanem kenitadon eg-inangen. ¹¹ Aneng-anengi niyoo se kenyo keogpa kedengan, neotaw kaw kenan menge Judio, aw kagi pa te menge Judio wedad relasyon niyo te Timanem tanda te kena kaw iling kandan menge netoli. (Menneg sidekey pegtoli te lawa olo.) ¹² Aneng-anengi heman niyo kedengan weda kaw pa kilala ki Kristo. Weda kaw pekeakop te Nasod te Esrael, aw weda kaw pa pekeakop te menge kesebotan te Timanem pinasikad te kandin menge saad doton te kandin menge otaw. Minogpa kaw di te kenyonan weda paglaom aw weda timanem. ¹³ Meneng tanda te kidoen kaw doen ki Cristo Jesus, sikeyo kedengan mediyo te Timanem, seini medapag den pineokit te dipanog i Cristo. ¹⁴ Aw pineokit te kandin pegkematay, ginobal din se elet te tenga-tenga aw meinang linekatan te bolaw te menge Judio aw se menge kena Judio. Nayan sikandin yan se negsebad kinetadon. Pigsebad din se menge Judio aw menge kena Judio. ¹⁵ Se elet ginobal din yan se kesogoan te menge Judio nagalakip te menge Judio aw se menge tulumanon. Ininang din ini amon megsebad kidone kandin se menge Judio aw se menge kena Judio, aw amon tomeneng se kandan pegbolaw. ¹⁶ Nayan seini, kagi sebad den ke lawa se menge Judio aw menge kena Judio pineokit te kemetayen i Cristo te krus, pigwedad den din se kenitadon pegpeopalay aw gipasig-uli din den kidon te Timanem. ¹⁷ Dimateng dini si Cristo aw migtolada sikandin te mepiya kagi egbegay te kelinaw kenyo menge Judiyo kedengan mediyo te Timanem, aw kenami heman menge Judio medapag te Timanem. ¹⁸ Pineokit ki Cristo, kelahat tedon menge Judio aw menge kena Judio mekepedapag den te amay pineokit te sebad ka Ispirito Santo. ¹⁹ Nayan seini, sikeyo menge kena Judio kena den menge langyaw o menge dumuduong awkena menge katagi lungsod den te menge otaw te Timanem aw menge sakop den te kandin pemilya. ²⁰ Kenitadon menge egpemenal iling te balay bato tollokanan, aw si Cristo yan se bato tollokanan. Se menge suguonon aw menge telekeliwat te Timanem yan se menge aligi. Sikeyo yan se doma menge bahin te balay. ²¹ Pineokit ki Cristo se kelahat bahin te balay gipasibo amon meinang balaan ogpaan alang te Timanem. ²² Aw tanta te sikeyo kidoen ki Cristo, neakop kaw heman te seini ininang balay eg-ogpaan te Timanem pineokit te kandin Ispirito.