¹ Doen menge otaw lekat te Judiya nga dimoton te Antokiya aw negtolada te menge egpemenal nga sikandan menge kena Judio eked pekeluwa kon eked dan pegpetoli sumala te pigtolada te punu ni Moises. ² Negkeinitay se peglantog dan ni Pablo aw Barnabas tepad te menge otaw siyan. Nayan negkeoyon se menge egpemenal nge si Pablo aw si Barnabas aw se doma egpemenal te Antokiya domoton te Jerusalem amon megkita se menge sogounun aw te menge kelengkawan doton tepad te intodada dan siyan. ³ Nayan inpeibing te simahan sikandan si Pablo. Te peg-okit dan te Fenisya aw te Samarya, pig-ikagi dan te menge egpemenal nga doen menge kena Judio heman nga nemenal ki Cristo. Pegkedineg dan niyan neleba dan onto. ⁴ Pegdateng dan ni Pablo te Jerusalem pigkinawa dan te Simbahan, te menge sogounun aw te menge kelengkawan te Simbahan pig-indan-indan dan se kelahat pig-inang te Timanem pineokit kandan. ⁵ Meneng doen menge egpemenal doton nga sakop te grupo te menge Parisiyo. Timindeg dan aw minikagi dan aw minikagi, "Keilangan nga tolien se mge kena Judio aw ikegihan dan nga metoman se punu ni Moises." ⁶ Nayan negtipon se menge sogounun aw se menge kalangkawan se Simbahan amoa te pegsulbad seini menge botanga. ⁷ Penga te kenamay te peglantogi Timindeg si Pedro aw minikagi, "Menge kedowa, netegahan de niyo nga pinemalli a te Timanem lekat kenyo kedengan pa amoa itolada ko se mepiya indan te menge kena Judio, aw amon mekedineg dan heman aw memenal. ⁸ Netegahan te Timanem se posoug te menge otaw. Aw pigpekita din nga pigkinawa din heman se menge kena Judio tongod kay inbegay din heman se Espirito Santo kandan iling te kandin pig-inang kedengan mona. ⁹ Te penengteng te Timanem sikita nga meng Judio aw sikandan nga menge kena Judio nig-onawa olo, tongod kay piglinisan din heman se kandan menge posong te kandan menge sala kay nemenal dan man. ¹⁰ Ngalay sulayan man niyo se Timanem? Ngalay ebeg mga niyi begayan lokdohenen se kinitadon menge doma mga simonod ki Jesus pineokit te pegsonod te menge tolomanen nga bisan gani sikita aw se kinitadon mge kemonaan eked peketoman? ¹¹ Nemenal kidon nge nekelawa kidon pineokit te grasya ni Ginoong Jesus-Cristo, aw yan man heman doton te menge kena Judio. ¹² Pegdineg dan niyan nepenek dan kelahat, aw pigpenalan dan se pgi-indan indan ni Barnabas aw si Pablo tepad te menge kepelahan aw menge milagro nga pig-inang te Timanem doton te menge kena Judio pineokit kandan. ¹³ Pegkepenga dan neg-indan-indan, minikagi si Santiago, "menge kedowa, penelahi a niyo." ¹⁴ Pig-indan kinitadon ni Simon Pedro se mona pegtawal te Timanem te menge kena Judio amon doen menge otaw heman nga lekat kandan nga meinang metig apo te Timanem. ¹⁵ Seini tepad heman se menge pigsolat te menge propita kedengan, tongod kay kesolatan neg-ikagi. ¹⁶ Penga nini lomilo a , aw petindegun ko toda heman se gingharian ni David. Petindegan ko ini toda heman lekat te kandin pegkepalay, ¹⁷ amon sedoma menge otaw mengaha kanak, apil se kelahat menge kena Judio nga kanak pigtawal nga meinang kanak menge otaw. ¹⁸ Yan ini se inikagi te Timanem, aw namay den din ini impetagataga." ¹⁹ Mipedeleg te peg-ikagi si SAntiago, "Nayan alang kanak eked tadon lisod lisodi se menge kena Judio nga nemenal te Timanem. ²⁰ Hinoon sulaten tadon dan nga eked kaen te mge kanen nga indogso doton te menge timanen, temanon tongod kay melipa ini. Eked dan pesimbolay gawas te nengesawa, eked dan haman kaen te dipaneg te karne te menge ayam-ayam nga te pegkematay seda pekelowa se dipanog. ²¹ Yan ini se menge punit ni Moises nga kailangan sonoden dan amon eked kelipai se mge Judio kandan, tongod kay lekat pa kedengan pigbasa den te menge Judio kada aldaw nga etod kidon te kandin menge simbahan se nesolat te puna nga pigtenanan ni Moises, aw pigtolad dan ini te kada longsod. ²² Penga niyan negkeoyan se mge sogounun aw se menge kelangkawan te simbahan aw se kelahat menge egpemenal doton nga megpili dan lekat te kandan gropo te menge meama amon kandan ipeibing te Antokiya doma dan ni Pablo aw si Barnabas. Si Judas nga pigtawal nga Barnabas aw si Silas yan se kandan nepilian seini menge otaw pigbasa te mge egpemenal. ²³ Se lolat nga impeibing kandan neg-ikagi."Sikami mge sogounun aw menge kelangkawan te simbahan dini, nga kenyo mge kedoma ki Cristo, nengemusta kenyo menge kena Judio kidoen te Antokiya aw te doma ogpaanan nga sakop heman te Sirya aw te Cilisya. ²⁴ Dinineg day nga doen menge otaw lekat dini kenami nga kimidoen kenyo aw piglibog dan se kenyo menge aneng-aneng tongod te kandan menge intolada kidoen. Weda kay pegsogo kandan nga domoton kidoen aw megtolada te iling keuyan. ²⁵ Nayan pegkedineg day nini negtipon kay dini aw negkeoyan nga memalli te menge otaw nga kenami ipeibing kidoen amon megpekelabet kenyo te kenami pigkeoyonan. Doma dan ni Barnabas aw si Pablo nga kinitadon menge nedekelan te pedowan menge kedowa ki Cristo. ²⁶ Kandan si Barnabas aw si Pablo neg dogsote kandan pedowan te pegsagman te kinitadon Timanem Jesu Cristo. ²⁷ Si Judas aw si Silas kenami pigpeibing kenyo amoy mikagi heman tepad se menge kekana nga pighisgotan dini seini te kanami insula. ²⁸ Negkeoyan kay doma te toltol te Espirito Santo nge eked dogangi se kenyo menge tolomanon gawas seini simonod nga kailangan ng tomanen niyo. ²⁹ Ika niyo egkoen te menge kanen nga pigdogso donto te mege inotaw ika niyo egkaen te dipanog aw te pengelapen te menge ayam-ayam nga te pegkamatay weda pekelowa se dipanog aw ika niyo eg-asawa te kena kenyo esawa. Mepiya kon melikayan niyo seini menge punu taman den olo dini." ³⁰ Penga niyan minipanaw se menge otaw nga kandan impeibing pegdateng dan doton te Antokiya pigtipon dan se kedita egpemenal aw inbegay dan dayon se solat. ³¹ Pegkebasa nini te menge egpemenal nadasig aw neluba dan onto. ³² Si Judas aw si Silas menge propeta heman nayan medita pa se kandan menge intolada te mge egpemenal amon te pegdasig kandan aw peglig-on te kandan pegpemenal. ³³ Penga te pila si aldaw peg-ogpa dan doton limiko dan te Jerusalem te mge negpeibing kandan te weda dan pa kenayo migtawaltawal dan pa una se mge egpemenal nga meinang mepiya se kandan peg-ipanew. ³⁴ Imeneng si Silas nekedisisyon nga megpetanan doton. ³⁵ Si Pablo aw si Barnabas negpetanan te Antokiya te pila pa si aldaw. Medita se kandan doma nga negtolada negwali te kagi te Timanem. ³⁶ Penga niyan minokit se menge aldaw, minikagi si Pablo ki Barnabas, "Likoen tadon se kedita menge longsod nga kinitadon newalihan te kagi te Timanem aw bisitahen tadon se menge egpemenal amon ketegahan tadon kon eded se kandan ke ogpa." ³⁷ Mig-oyon si Barnabas meneng ebeg din ibingen si Juan nga pigtawal Marcos, ³⁸ meneng eked keibet si Pablo ng petekingen si Marcos pigtenanan din dan doto te Panfilya. ³⁹ Negkeinitay se kandan peglalis nayan nigsaway dan. Inibing ni Barnabas si Marcos aw miglawig dan pesalo te Sipro. ⁴⁰ Aw si Silas yan se inibing ni Pablo. Te weda pa kesayo si Pablo aw si Silas negtawal-tawal se menge egpemenal te Timanem nga tabangan dan te kandan peg-ipanew. ⁴¹ Dimoton dan si Pablo te probinsay te Sirya aw Cilisya aw lig-onon dan se mge egpemenal doton.