¹ Penga niyan, dinineg te menge sogounun aw te menge nemenal te Judiya se mge kena Judio kiminawa human te punu te Timanem. ² Nayan pegliko i Pedro te Jerusalem, piglindoan sikandin te menge egpmenal Judio nge nemenal se menge kena Judio keilangan magpatuli ona te eked pa tipon kandan. ³ Minikagi dan ki Pedro, "Sikona sebad ka Judio, nenga dimoton ka te balay te menge kena Judio, menge otaw kena tinuli aw kimaen doma kandan? ⁴ Nayan pigsaysay i Pedro kandan se kelahat nehitabo kandin lekat onto e kelekatan. ⁵ Minikagi sikandin, dalem te migtawaltawal a doton te siyodad te Jopa doen impekita kenak te Timanem. Kinita ko se onawa te mebelad bekas migpedana lekat te langit. Se epad ka eskin nini iniketan, aw seini timeneng medapag kenak. ⁶ Tinengtengan ko ini aw kinita ko se awop nini doen negkelainlain kemolo te menge ayam-ayam se menge ayam-ayam minipanaw, lakip se menge mebolot menge ayam-ayam kimemad, aw se mge limayang. ⁷ Aw dinineg ko se kagi nga minikagi kenak, "Tindeg, Pedro! Pengiyaw aw kaen!" ⁸ Meneng timaba a, 'Timanem, eked ini kepakay tanda te lekat kedengan weda a palos pekekaen te menge ayam-ayam onaw kani, sumala te kesogoan melipa aw pigeded kani.' ⁹ Penga niyam minikagi toda se kagi lekat te langit,' ika eg-aneng-aneng melipa se pengkey eden sawol-sawol nga piglinisan den te Timanem. ¹⁰ Nehitabo ini meketelo aw pegkepenga ginoyod idekey liko doton te langit. ¹¹ Te oras sekekey doen heman telo ke otaw lekat te Cesaria dimateng doton te balay egpenitan ko. Sidekey menge otaweni insogo amon pengebelen a. ¹² Se Espirito Santo minikagi kenak te eked a pegdowadowa te pegtaking kandan. Seini enem tedon ka menge kedowa ki Cristo nga tage Jopa doma ko te pegdoton te balay ni Cornelio te Cesaria. ¹³ Pegdateng day doton inikagihan kay i Cornelio doen kinita din Anghel dalem te kandin balay, aw minikagi se Anghel kandin, "Penogo ka te mge otaw domoton te Jopa manon te peg abat ki Simon tinawal Pedro. ¹⁴ Ikagihan din kamno aw te eden peokit mekelowa ka aw se kamno pemilya te sala. ¹⁵ Aw te negsogod aden te peg-ikagi, dimateng se Espirito Santo kandan onawa heman te kandin pegdateng kenitadon sikekey mona. ¹⁶ Aw neaneng-anengan ko se inikagi ni Ginoong Jesus: Nemonyag si Juan te wayeg, meneng kamno banyagan kidoen te Espirito Santo. ¹⁷ Nayan sikedey penghitabo nagapamatuod se imbegay te Timanem kenitadon menge Judio te kidoen sikita nemenal ki Ginoong Jesu-Cristo imbegay din heman se menge kena Judio. Nayan aw don din ini se kebobot-on te Timanem, sine a memelabag nini?" ¹⁸ Te pegdineg nidekey te menge egpemenal Judio, weda dam den peglindo ki Pedro aw dimeyen dan beling te Timanem. Minikagi dan, "Aw ya kedi, imbegay heman te Timanem te menge Judio se kehigayonan megselsel amon mekadawat dan nema te pedowan wedad Timanem." ¹⁹ Lekat te pegkematay i Esteban migkebilit-bilit den se menge egpemenal tanda te pegbadas kandan, se doma kandan dimateng te Fenisya, te isla te Sipro, aw te lonson te antyokyo. Pig-indan dan sa mepiya belita pengkey kenan dan pesalo, meneng doton olo te menge Judio. ²⁰ Meneng se doma menge egpemenal tege-Eyprus aw tege-Cyrene dimoton heman te Antyokya, aw pengkey se menge kena Judio pig-indanan dan heman te mepiya belita tepad ki Ginoong Jesus. ²¹ Se tolos te Timanem kidoen kandan aw medita onto se nemenal aw neinang egpemenal te Timanem. ²² Seini menge nehitabo dinineg te menge egpemenal te Jerusalem, nayan impeibing dan si Bernabe doton te antyokya. ²³ Pegdateng din doton neleba sikandin tanda te kinita din se mge penelangin te Timanem te menge otaw doton, aw gidasig din sikandan tomolo aw lobosen se kandan pegpemenal te Timanem. ²⁴ Seini si Bernabe mepiya onto otaw. Egbaya-baya kandin se Espirito Santo aw ligpet onto se kandin pegpemenal te Timanem, nayan medita doton se nemenal te Timanem. ²⁵ Penga niyan dimoton si Bernabe te Tarso amon te pegpengabel ki Saolo. ²⁶ Pegkita din ki Saolo inibing din sikandin liko te Antyokya. Tayod te omay dan pigdomadoma se mge egpemana. doton aw medita menge otaw se kandan tinotedaan. Se mge sumusunod i Jesus te Antyokya yan se mona tinawal menge Kristohanon. ²⁷ Te aldaw sidekey doen menge telekeliwat te kagi te Timanem te Jerusalem dimoten te Antyokya. ²⁸ Se sebad kandan iningedoman agabus. Timindeg sikandin aw pineokit te tolos te Espirito Santo impeikagi sikandin te doen sebad ke dakel bitil domateng te tayod te keneyonan. (Seini nehitabo te penahon si Claudio yan se Emperador te Roma.) ²⁹ Nayan se menge sumusunod i Jesus te Antyokyo negsebad se podowan te tegsebadsebad kandn megpeibing te kandang tabang te kandan mge kedomaan ki Cristo doton te Judia taman te kandan mebabatog. ³⁰ Impeibing dan ini pineokit ki Bernabe aw ki Saolo amon ibegay te menge egpengibeng te menge egpemenal te Jerusalem.