¹ Sikona Timoteo, iling ka te onto bata ko. Pegpekagsen ka pineokit te tabang te Timanem, iyan negtabang medawat no tepad kay sikona kidoen ka ki Cristo Jesus. ² Sen metolada ko nge dinineg no nge kanak itolada te kodeta heman te menge otaw nge keseligan, nge meketolada heman te doma otaw. ³ Pegpeketagad te aw pemilanegn iling te Mepiya se sundalo i Cristo Jesus. ⁴ Aw keilangan megdoma ka te sundalo nge doen te serbisyu. Wedad enin ininang uyan, keilangan toloen din sen menge punu te kandin Opisyal. ⁵ Keilangan megdoma ke heman te megdengohay: Aw eked heman sikandin pekedawat te premyo aw eked heman sikandin sunod te menge belaed te denga. ⁶ Menseb ka mekedawat aw gasa lekat te Timanem. Iling te menge otaw megpawa ng meghago, kana ba sikan din man sen mona mekeontong te kandin geniyen. ⁷ Eneng-enengi se kagi ko aw mepiya iyan, tebangan kaw te Timanem amon mekelabet ka kadita niyan. ⁸ Peg-aneng-aneng ka te mepiya indan nga kanak intolada tepad ki Jesu-Cristo nge neantay, nge bowad-bowad i David. ⁹ Pengkey se kanak pegtolada te mepiya indan nelimahan a din aw ginapos a pa iling te telebono. Meneng sen mikagi te Timanem eked te gepos. ¹⁰ Nayan se egpeketayad a te kelimahan ko sen kedita te menge otaw para pemallen te Timanem. Amon mekeluwa den heman pineokit ki Cristo Jesus aw kominawa den heman te mepiya aw wedad tomanan te pengkinabuhi. ¹¹ Benal gayed sen eg-ikagihan nge, "Aw nematay kidon doma i Cristo, metoma gayed nge meantay heman kidon doma kandan. ¹² Aw megpadeleg kidon te kelimahan te menge kepelekan, metoman heman nge pengolo tadon heman se kandin doma meneng aw inbolo kidon din te menge otaw penga niyan inbolan, kidon heman din. ¹³ Pengkey kena kidon egkeseligan, begayan tadon te higayon nge egkeseligan kidon, meneng eked kepekay nge eked din tomani sen kandin inikagi." ¹⁴ Kidoen te atbang te Timanem aneng-anengan nikaw sen menge kedita te otaw tepad kenyan, aw peaneng-anengi heman sikandan nge pegweda den dan sen wedad ontong nge pegpedin dilay. Wedad menbet dan niyan, sol olo iyan mekebaet te pegpemenal te menge otaw menenalan kenyan. ¹⁵ Pengkey kenan teman mepakay nikaw inangen amon meluba sen Timanem kamno, kailangan meg-inang ka te metolid nge tolada amon wedad mekeyaya kamno, itolada te benal nge pemeokit sen inikagi te Timanem nge yan sen kebenalan. ¹⁶ Ika-eg-inabut te medaet belaw nge wedad ontong aw kana para te Timanem, kay siyan megpekediyo olo te menge otaw lekat te Timanem. ¹⁷ Siyan nge menge medaet balaw iling te mesakit nge kanser nge gayed egkedakel diya te lawa ipegtolada dan te doma otaw yan se Himeneo aw si Filetu. ¹⁸ Simoway dan te kebenalan, migpebelaw-belaway dan nge sen pegkeantay adon domateng se menge aldaw weda den negemakan pa. Nayan nabatan dan se pegpemenal te doma otaw. ¹⁹ Meneng pengkey pa siya, mesalig heman sen pundayon nge insawol te Timanem, tepad kidoen insolat se inikagi, "Kinilala te Timanem se kandin keotawon," aw 'Geda sebad kandan mikagi nge sikandin se tigapo te Timanem dapat nge somoway den sikandin te pengkey eden se medaet domateng diya kandin." ²⁰ Kidoen te menge dakel nge balay doen migpetanihay nge menge kedonan, doen menge ininang lekat te bulawan, salapi, aw doen heman lekat te kayo nge telapagan, aw tana. Sen menge telepagan nge lekat te bolawan aw salapi gamiten olo iyan aw doen gomemaw nge bisita. Meneng sen menge telepagan nge ininang lekat te kayo aw tana, para olo iyan te inaldaw nge eggemitten. ²¹ pengkey sinu nge eked peginabut te medaet ininangan iling te telepagan nge mehalan nge pigtani amon gamiten aw meelaga te Timanem, aw mepakay nikaw gemiten te peg-inang se mepiya pengkey eden orasi. ²² Nayan ikagayed eg-inabut sen menge aledaet nge ibeg te keling-otaw, ibug ko nge meg-ineng ka te metolid, keseligan, aw megpedakel ka te pedowan nikaw aw mepiya sen kamno peg-ibing doton te doma otaw, doma nikaw se menge otaw nge migpedapag te Timanem doma te melinis nge pedowan. ²³ Pegpekediyo te wedad ontong aw egpekelibog sen menge egpedindilay pengkey netagahan no nge sen medetengan niyan bolaw. ²⁴ Eked kepakay megbolaw sen sineligan te Timanem, aw kena kailangan mepiya baling sen inangen din diya te kedita te menge otaw, keilangan biyasa, sikandin megtolada kailangan melayat se pedowan din. ²⁵ Kailangan nge mepiya sen pedowan din te pegtolada sidekey menge negbatok kandin, se pengkey din olo siyan sen pemeokit te ibegay te Timanem kandan kehigayonan nge megselsel amon metagahan din se kebenalan. ²⁶ Aw yan meanyagan sen kandan menge aneng-aneng aw mekeluwa den te laang i Satanas nge migdekaop kandan amon ibeg dan sikandan se toloen.