¹ Phimaana, khuuvo othukeliya wa yaale ari mwa Kristo Yesu. ² Kontha Ekettelo yo N'nepa we kumi mwa Kristo Yesu hokithukula Nketteloni wo tampi ni n'nookhwani. ³ Vano yeel ekettelo yahakhutiriaaya opanka, kontha yaari yovololatja mwaha we ruthu, Muluku thipankale. Yena honruma Mwaamwanawe wolattanatja ni ruthu yotheka, aphelaka okhala yoovaha wo tampi, ni Yena hothuka etampi mwiiruthuni. ⁴ Yena pankale iyo wo wiira ekettelo ehaana yiraniaaka mwa hivano nineetta, kahi wo nayeeli wo ruthu, massi wo nayeeli N'nepa. ⁵ Yaale ankhala ni eruthu an'nowehesesa tjinene tjithu tjo mwiiruthuni, massi yaale ankhala ni N'nepa, mwa tjithu tjo mwi N'nepani. ⁶ Kontha mupuwelelo wo mwiruthuni nookhwa, massi mupuwelelo wo N'nepa ekumi ni nrettele, ⁷ kontha mupuwelelo wo eruthu khuninwanana ni Muluku, kontha khininwelela Ekettelo tja Muluku, ni khumphwanela okhala. ⁸ Yaale ari mwiiruthuni khaan'notjiveliha Muluku. ⁹ Phimaanan khanri mwiiruthuni, massi mwi N'nepani, wakhala wiira N'nepa wa Muluku onaakhala mwa nhuuva. Massi akhala nthu kharina N'nepa wa Kristo, khanakhala aWawe. ¹⁰ Wakhala Kristo ri mwa nhuuva, eruthu eri yookhwa nlatto wo tampi, massi N'nepooyo nkumi nlatto wo sariya. ¹¹ Wakhala N'nepa wa yoole n'hihimussale Yesu mwanookhwa naakhala mwa nhuuva, Yena phin'hihimussale Kristo mwanookhwa naavaha ekumi eruthutjinhu tjookhwa nlatto wo N'nepaawe, onkhala wi nhuuva. ¹² Vano, assuna, khaninakhala namalokiha kahi wo ruthu, wo wiira nikhale ni ruthu. ¹³ Vano, mwakhala ni eruthu, n'naakhwa, massi, wakhala mwi N'nepooyo n'nawinva tjithu tjo mwiiruthuni, n'nakhala akumi. ¹⁴ Vano yaale anettihiya ni Nnepa wa Muluku, yaayo phari assaana a Muluku. ¹⁵ Kontha khamwakhenlale n'nepa wo mwipiphini tootho wopheela woova, massi mwakhenlale n'nepa wookhalihiya, vavale wankhuweleehu: "Abba, paapa". ¹⁶ N'nepa yooyo onakhalela ossahiti ni n'nepeehu niriihu assaana a Muluku. ¹⁷ Nakhala wiira nassaana, ninkhala athu ohiyeriya, ohiyeriya ni Muluku, ni ohiyeriya ni Kristo, wakhala wiira nin'haawa ni Yeena wo wiira tho nikhale ottittimihiya ni Yena. ¹⁸ Kontha kinoona wiira mahuviho owakatho yoola khanphwanela wophela olikanihiya nu ttittimihiya onkelehu othonheriya. ¹⁹ Kontha ekhiyumpi enawanriha othonheriya wasaana a Muluku. ²⁰ Kontha mumpeliyo ohokhala ohiphwanela, kahi wothunawawe, massi othuna wa yoole inwenlale, muuwehenrani, ²¹ wo wiira ekhiyumpi ekhale yothukuliya mwipiphini wotheka wo taphuleliya wo waaria wassaasa a Muluku. ²² Kontha ninatjuwela wiira ekhiyumpi yootene enathukumela ni en'noona oweria oyarawaya elelovaava. ²³ Kahi yaayo paahi, massi hata nihivano, nirina mihokhorokho tjopatjera tjo N'nepa, hata nihivano ninathukumela n'hina-n'hina, niwehenraka ohiyeriya wihu, wopoliya weruthuiihu. ²⁴ Kontha muwehenrani nihokhala owoopoliya. Massi yeele enwehenrehu wiira yiraniee, khinaaya woonia, ntoko tjinwehenriyaaya yeele enoonia? ²⁵ Massi nawehenra ehinoneehu, nuvilela ninawanriha. ²⁶ Wo manan'na yaayo, N'nepooyo onanikhavihera mulolovatjani wihu. Kontha khaninthuwela ovekela, massi N'nepa yooyo onavahenra mavekeloeehu nahikhuitiriki wuluma. ²⁷ Yooyo, phinweha mirima, onatjuwela mupuwelelo wo N'nepa, kontha Yooyo onawavahenra attakattifu, wo nayyeli nuthuna wa Muluku. ²⁸ Ninatjuwela wiira tjithu tjootene tjinawinwanana wo rerela wa yaale anonfenta Muluku, wa yaale anihaniya ntoko Tjimphelaawe. ²⁹ Kontha, yaale antjuwelale khalayiiru, Yena honipanka wiira nikhale ntoko enatarato ya Mwanawe, wo wiira Yena akhale opatjeriya wasun'na entji. ³⁰ Yaayo akusaliaawe, hata yaayo howihana. Wa yaale wihanaliaawe, yaayo, hata Yooyo hohimiakatja. Yaayo ahimiakatjaliaawe, yaayo hattittimiha. ³¹ Nihimiekeni mwaha wa tjithun'nha? Muluku akhala nihivano, tipani n'hala okhala nihivano? ³² Yooyo, hipopanri Mwaamwanawe, Nvaliaawe nlatto wa wihu, n'hin'hala onivaha tjani ni Yena tjithun'nha tjotene? ³³ Tipani n'hala owotheriatja yaale othanliya ni Muluku? Muluku phin'nihimiakatja. ³⁴ Tipani n'hala wathukela? Kristo thikhwale nlatto wa wihu, ni, nifaita tjinene, hohihimuwa, Yena ri moono welopuana wa Muluku, yooyo nonivekelela. ³⁵ Tipani n'hala onihiha nifento na Kristo? Mahuviho, womolanihiya, etala, othaleliya, wopopihiya walani espada? ³⁶ Ntoko tjantikhiyaya: "Nlatto wa Winhu, ninawinviya kuta nihuku, nihokhaliya ntoko epwittipwithi enruaniya wuhitiyani" ³⁷ Wa tjithu tjotenen'ya, nihokhala othema mwaha wa Yool e ni fentale. ³⁸ Kontha kihokhala okhuitiriya wohikhala okhwa, walani ekumi, wala malaikha, wala akhulupale elapo, walani owakathi orihula, walani owakathi onwehenrehu, wala ekuru, ³⁹ wala otjuli, wala vathi matji, walani ethu ekina enkela okihin'ha nifento na Muluku, niri mwa Kristo Yesu, Pwiyeehu.